1 Samuel 26 - Biblia en Guaraní - ?anderuete ?e’? Por? 2015

1Upéi umi Zifgua ou Saul rendápe, Gibéape, ha he’i ichupe: David oiko kañyháme Haquila cérro rembe’y rehe, pe desiérto, kuarahyresẽ gotýo.

2Upéramo Saul opu’ã ha oguejy Zif desiértope, ha ogueraha hendive 3000 kuimba’e ojeporavopyréva Israel apytégui, oheka hag̃ua Davídpe Zif desiérto rehe.

3Ha Saul opyta Haquila cérro rembe’ýpe, oĩva kuarahyresẽ gotýo pe desiértope, tape rembe’ýpe. Ha David oiko pe desiérto rupi, ha ohechakuaa Saul oikoha hapykuéri.

4Upérõ David omondo hembijokuáipe omaña ñemi hag̃ua, ha upéicha oikuaa porã Saul ou hague hapykuéri.

5Ha David og̃uahẽ Saul opytahápe; ha oma’ẽ porã moõpa oke Saul ha Abner, Ner ra’y, isoldádo ruvicha. Ha Saul okehína pe atyguasúpe, ha hetãyguakuéra oke joa ijerekuévo.

6Upéramo David he’i Ahimélec, Hetguápe, ha Abisai, Sarvia membýpe, Joab pehẽngue: Mávapa oguejýta chendive Saul atýpe. Ha Abisai he’i: Che aguejýta nendive.

7Upéicha David ha Abisai oho upe pyharépe Saul oĩháme; ha péina Saul ojepyso okehápe, ha ijyvyra puku akua ojekutu yvy rehe iñakã gotýo; ha Abner ha opaite isoldadokuéra iñasãi joa ijerekuévo.

8Upéramo Abisai he’i Davídpe: Ko árape Ñanderuete omoĩma nde pópe nderehe ija’e’ỹvape; ehejána chéve taikutu peteĩ jevýnte ijyvyra puku akuápe, ha natekotevẽmo’ãi aikutu jevy.

9David katu he’i Abisaípe: Anítei rejuka ichupe. Oimeraẽ omopu’ãva ipo Ñanderuete oiporavova’ekuére ojehavirava’erã katuete.

10David he’i avei: Ñanderuete rérape ha’éta, ipo voi tojapi ichupe, térã tog̃uahẽ hi’ára omano hag̃ua, térã tomano ñorãirõme.

11Ñanderuete anítei oheja che aipyso che po Ha’e voi oiporavova’ekue rehe. Eraha katu ijyvyra puku akua oĩva iñakã gotýo, hi’y ryru avei ha jaha.

12Upéicha David ogueraha ijyvyra puku akua ha hi’y ryru oĩva’ekue Saul akã gotýo, ha oho hikuái; ha ndaipóri avave ohecháva térã oñandúva peteĩ mba’e jepe, ha avave noñangarekói iñirũnguéra rehe okepa joaitégui hikuái; Ñanderuete voi omboúgui hi’arikuéra topehyietéva.

13Upéi David osẽ upégui ha oñemoĩ cérro ári pe ijyvatevehápe, opyta hag̃ua mombyry ojuehegui.

14Ha David osapukái tetãyguakuérape, ha Abner, Ner ra’ýpe, he’ívo: Nerembohováiripa Abner. Upévo Abner ombohovái ha he’i: Máva piko nde resapukáiva tetã ruvichápe.

15Ha David he’i Abnérpe: Nde ningo ndaha’éi kuimba’e añetéva. Ha máva piko ndeichagua Israélpe. Ha mba’érehepa nereñangarekóira’e nde jára, pe tetã ruvicha rehe. Oikékuri peteĩ tapicha ojuka hag̃ua nde jára, pe tetã ruvichápe.

16Ko ne rembiapo kóva naiporãi, Ñanderuete rérape ha’e ndéve pemanombava’erã napeñangarekóigui pende járare, Ñanderuete oiporavova’ekue. Ehekána tetã ruvicha yvyra puku akua ha hi’y ryru oĩva’ekue iñakã gotýo.

17Ha Saul ohechakuaávo David oñe’ẽha, he’i: Péva piko ndaha’éi ne ñe’ẽ David, che ra’y. Ha David he’i: Che ñe’ẽ voi ningo tetã ruvicha, che jára.

18Ha he’ive: Mba’érehepa péicha che jára reiko remuñávo ne rembiguáipe. Mba’éiko ajapo. Mba’e mba’e vaípa oĩ che po rehe ne renondépe.

19Ajerure, tetã ruvicha, che jára tohendu ko’ágã hembiguái ñe’ẽ. Oime ramo Ñanderuete omoinge ne akãme rejapo hag̃ua mba’evai cherehe, toñekuave’ẽ ichupe g̃uarã; ha oime ramo kuimba’e ra’ýnte, toñemaldeci ichupekuéra Ñanderuete renondépe, chemosẽgui Ñanderuete rogaygua apytégui, aiko hag̃ua ambue jára rembiguáirõ guáicha.

20Anítei che ruguy otyky yvýpe Ñanderuete renondépe, Israel retã ruvicha osẽgui oheka hag̃ua peteĩ tũngusúpe, ku oñemuñárõ guáicha ynambu cerrokuéra rehe.

21Upéramo Saul he’i: Añemoangaipa; eju jevýna, che ra’y David, ndajapomo’ãvéima nderehe mba’eve ivaíva, che rekove hepyetégui nde resa renondépe. Péina ko’ã mba’e ajapóva nderehe itavyetéva rembiapo ha tuicha ajayvere nendive.

22Ha David oñe’ẽ jevy ha he’i: Péina ápe nde yvyra puku akua; embou peteĩ ne rembiguái ha togueraha jevy ndéve.

23Ha Ñanderuete tomyengovia opavavépe oiko haguéicha, Ñanderuete nemoĩ ramojepe che pópe, che ndaipysoséi che po Ha’e oiporavova’ekue rehe.

24Eikuaa porãke nde rekove hepyetégui che resa renondépe, taupéicha avei che rekove Ñanderuete renondépe, ha tacheguenohẽ opaichagua jepy’apýgui.

25Ha Saul he’i Davídpe: Ñanderuete nderovasáma, che ra’y David; katuete nde rehupitypaitéta ha ndepu’akapava’erã. Upéramo David oho hapére, ha Saul ojevy hendaguépe.