1Israel ra’ykuéra pehendúke Ñanderuete ñe’ẽ, Ha’e voi oñorãirõta hetãyguakuéra ndive, Israelguakuéra opoi haguére pe añeteguágui, pe mborayhu ha ijeroviágui.
2Israelguakuéra oñe’ẽme’ẽ gua’u, ijapu, ojuka, omonda, ombyai pe mendare reko ha oñorãirõ hikuái.
3Upévare Israel retã ohasa asyete ha péicha avei opaite hymbakuéra, umi mymba ñu megua, guyrakuéra ha pirakuéra jepe ohasa asyetéta.
4Avave nohendusevéima tekombo’e porã, oja’o ha oñe’ẽvai uvei pa’ikuéra rehe.
5Nde re’áta upe árape ha nendive ho’áta avei profetakuéra pyharekuépe, ha Che ahundíta nde sýpe (Israélpe).
6Che retãyguakuéra oñehundíta hendivekuéra nacherendúi haguére. Umi pa’i omboyke haguére pe arandu Che avei amboykéta ichupekuéra, ha nderesarái haguére nde Jára rembiapoukapýgui, Che cheresaráita avei ndehegui.
7Oñembohetamive ohóvo hetãyguakuéra, hetave avei hembiapo vai, ne rerakuã porã katu ambuekoviáta ñemotĩme.
8Peẽ pa’ikuéra peiko porãse pene retãygua tembiapo vai rupi ha peha’ãrõnte ikuave’ẽmbyrã (pe’uve hag̃ua pe kuave’ẽmby ro’o).
9Umi pa’i ha hetãyguakuéra peteĩcha ohasa asýta oñemoangaipa haguére che renondépe.
10Okarúta ramojepe nahyg̃uatãmo’ãi, ha omenda ramojepe naiñemoñaremo’ãi opoi haguére Ijapoharégui.
11Teko vai havíno oipe’a akãporã yvyariguakuéragui.
12Che retãyguakuéra oporanduhína ijára gua’úpe, ojejapova’ekue yvyrágui, ha oipota umi yvyra po’i ohechauka ichupekuéra umi mba’e ojehútava henonderãme, aña pytu ombotavy ichupekuéra opoi hag̃ua pende Ruetégui.
13 Cérro ru’ãme oikuave’ẽ hymbakuérape ha ohapy mba’e ryakuã porã avei umi yvyra kuarahy’ã porãva guýpe, upévare pende rajykuéra heko vaíta, ha pende ra’y rembirekokuéra oporomoakãratĩta.
14Che katu ndahaviramo’ãi pende rajykuérape ha pende ra’y rembirekokuérape oiko vai haguére, peẽ pa’ikuéra voi peikuave’ẽ jave peikopeína avei umi tupão pegua kuña reko vaíva ndive, upévare peẽ voi pende reko vai rupi peity tetãyguakuéra tembiapo vaípe oñehundi hag̃ua.
15Ambue Israelguekuéra omomba’eguasu ramojepe ambue jarakuérape, peẽ Judaygua katu anítei pejavy avei peho hag̃ua Gilgálpe ha Bet-avénpe ha ani peñe’ẽme’ẽ rei pende Ruete rérape, tapia g̃uarã Ha’e oikótava.
16Israel oñemomombyry ramojepe vaka saitéicha (ijáragui), Ñanderuete oñangareko jevýta hese ijovecha ra’ýrõ guáicha ñuguasúpe.
17Efraingua oñeñapytĩ ramojepe ijára gua’úpe, peẽ katu pepoi ichuguikuéra.
18Oka’upa hikuái ha oiko kuña vai ndive, imburuvicha ra’ykuéra ohayhu eterei pe teko vai.
19Pe yvytu vai pepokuéra tojapyhy ichupekuéra oñehundi hag̃ua ikuave’ẽmby hendapegua’ỹ rupi.
Who We AreWhat We EelieveWhat We Do
2025 by iamachristian.org,Inc All rights reserved.
