Isaías 42 - Biblia en Guaraní - ?anderuete ?e’? Por? 2015

Ñanderuete rembiguaitee

1Pema’ẽ porãke, che rembiguái tee rehe, Che ajoko ichupe, che rembiporavopyre, che ánga hory heseve, che Pytu Porãite amoĩma hi’ári, ha’e oguerúta justícia tetãnguérape g̃uarã.

2Ndosapukaimo’ãi, noñe’ẽ hatãmo’ãi ha nohendukamo’ãi iñe’ẽ umi táva pegua tape rupi.

3Ndojejokamo’ãi takuapi ojepepýmava, ha nomboguemo’ãi pe tataindykũ hendýva, hekoitépe omombe’úta pe añetegua.

4Naikane’õmo’ãi ha nomanomo’ãi omopu’ã meve justícia yvy apére, ha umi tetã yguasu rembe’y pegua oha’ãrõhína Ha’e ohekombo’e hag̃ua, (Matéo 12,18-21).

5Péicha he’i Ñanderuete, pe Jaraitéva, Ha’e voi ningo yvagakuéra apohare ha omyasãiva’ekue umía; Ha’e oipyso pe yvy ha ojapopa heñóiva guive ipype, ha ombopytuhẽva umi tetãygua ipype oikóvape, ha ome’ẽ Ipytu Porãite umi oguatávape yvy apére.

6Che, pende Ruete, rohenóikuri justícia rupive, ha nde pógui rogueraháta, añangarekóta nderehe ha romoĩta tetãyguakuérape g̃uarã ñe’ẽme’ẽ (promésa) ramo, ha tetãnguéra resapehára ramo.

7Rehesape’a hag̃ua umi ohecha’ỹvape, reguenohẽ hag̃ua cárcelgui umi ipype oĩvape, ha pe óga ñeñapytĩ hágui umi oikóva iñypytũháme.

8Che Jahve, péicha ningo che réra, ha avavépe name’ẽmo’ãi che reko jajaipa, ha che rerakuã porã ndahejamo’ãi ijára gua’u ra’ãngápe.

9Pema’ẽ porãke umi mba’e ymaguare oikopamava’ekue rehe ha upéicha oikopáta avei umi mba’e ko’ag̃agua, Che aikuaauka peẽme oiko mboyve, peikuaa porã hag̃ua Che aikuaapaha opaite mba’e.

Purahéi omomba’eguasuséva Ñanderuetépe

10Pepurahéi Ñanderuetépe peteĩ purahéi pyahu, pemomba’eguasu ichupe yvy apýra paha guive; peẽ pehóva yguasúpe, ha peñemomba’e opaite mba’e rehe pejohúva guive ipype, umi yguasu mboypyrigua oikóva guive pemomba’eguasu ichupe.

11Pepurahéi hatãke, peẽ peikóva ñuguasu ha itavakuérape ha avei umi tavaygua oikóva Cedárpe; topurahéi joa umi Selaygua, ha umi cérro rehe oikóva vy’águi tosapukái joa.

12Pemomba’eguasuke Ñanderuetépe, peĩ yguasu mboypyrigua pemombe’u joa ichupe.

13Ñanderuetégui osẽta peteĩ ipy’aguasuetéva ha oñorãirõ porãkuaáva, ojeity hag̃ua kyre’ỹpópe ha kyhyje’ỹre, iñorãirõ sapukái rupi hese ija’e’ỹvakuéra ári.

14Areiterei guivéma akirirĩ aikóvo, nda’evéima mba’eve, ajejokova’ekuégui, ko’ág̃a katu asapukáita peteĩ kuña imembymbotávaicha, che pyahẽ, chejuku’a peve.

15Umi cérrorusu ha michĩva ambotaperepáta, ambopirupáta opaite kapi’i oĩva guive ipype, umi ysyrýgui oikóta yvy perõ ha ambohypáta yrendakuéra.

16Ha aisãmbyhýta umi hesatũvape tape oikuaa’ỹva rupi, amboguatáta ichupekuéra tape oikuaa’ỹva rehe ha pe ypytũ oĩva henonderãme amyesakãmbáta ha aguenohẽta umi ita oĩva hapépe oguata hag̃ua tape potĩ rehe. Ko’ã mba’e katuete ajapóta ichupekuéra g̃uarã, ha ndapoimo’ãi che ñe’ẽgui ajapopa peve.

17Ojevypáta hapykuévo ha ojehesambotapáta umi ojeroviáva ta’ãnga rehe ha he’íva peẽ ore jára, opaite ko’ãva oñemotĩete ha oñehundiva’erã.

Israel hesatũ gueteri.

18Peẽ pendeapysapéva, pejapysaka hag̃ua; ha peẽ peneresatũva pema’ẽ, pehecha hag̃ua.

19Máva piko hesatũ, che rembiguái voi. Máva piko ijapysape, che rembijokuái voi. Ndaipóri ambue hesatũva che rembiguáicha, ha ndaipóri ambue hesatũva Ñanderuete rembijokuáicha.

20Nde rehecha heta mba’e ha nerepenái katu, ha rehendu heta mba’e rejapysaka porã’ỹre.

21Ñanderuete ohayhúgui justícia ombotuichaseve hembiapoukapykuéra rupi.

22Ko tetã kóvagui oñemondapa ha oñepyrũmba hese, ojejapyhýva guive oñemoinge itakuaguasúpe ha cárcelpe, oñemonda hag̃uánte oñemoĩ upépe, ha ndaipóri avave oipytyvõva ichupekuéra; oñemondapa ha ndaipóri he’íva: Pemyengovia jevýke ichupekuéra.

23Mávapa pende apytépe ojapysakáta ko’ã mba’e ko’ãva rehe. Mávapa ojapysaka porãta ha oikuaaséta umi mba’e oikótava.

24Máva piko ome’ẽra’e Jacóbope hese ija’e’ỹvape, ha oity Israélpe mondahakuéra pópe. Ndaha’éipara’e Ñanderuete, Israelguakuéra oñemoangaipáva henondépe, ndoikoséi hapére ha ndojaposéi haguére hembiapoukapykuéra.

25Upévare Ha’e oñohẽ hi’ári ipochy ha ñorãirõ ipohýiva; ojatapy hese ijerekuévo, ha’ekuéra katu ndohechakuaái; ombokusugue ichupekuéra, ha’ekuéra upeichavéramo jepe nopenái.