Salmokuéra 71 - Biblia en Guaraní - ?anderuete ?e’? Por? 2015

Ani chereja chetujámagui

1Nderehe, che Ruete, añemo’ã, aníkena araka’eve añemotĩ.

2Ndepy’a porã rupi chepytyvõmína ha cheguenohẽmi che jejopy vaígui, ehendumína ha chepytyvõmína.

3Eiko chéve g̃uarã peteĩ itaguasu ramo, ikatu hag̃ua che aju tapiaite hendápe. Nde chepytyvõukava’ekue. Nde ha’égui che itaguasu chemombytu’úva.

4Che Jára, cheguenohẽmína umi tekove vai pógui, umi tekove ñaña ha umi oporojukaséva pógui.

5Che Ruete, nderehénte che ajejoko che mitã guive ha Nde reñangareko porã cherehe.

6Nde reme’ẽmba che remikotevẽ che sy rye guive, Nde voi cherenohẽva’ekue che sy ryepýgui, upévare che romomba’eguasu tapiaite.

7 Milágro ramo aiko hetápe g̃uarã, Nde katu che mo’ãha mbarete.

8Che juru henyhẽ ñembo’e tuichágui ndéve g̃uarã ha amombe’u nde reko jajaipa opaite árape.

9Ani chemboyke che tuja ramojepe, opa ramo che mbarete, ani chereja rei.

10Umi cherehe ija’e’ỹva oñemongetáma oñondive ha umi oha’ãrõva che amano hag̃ua he’i voi hikuái:

11Ñanderuete oheja reíma ichupe, pemuña ha pejapyhy ichupe, ndaipórigui oipytyvõtava ichupe.

12Nde, che Ruete, ani reñemomombyry chehegui, che Jaratee pya’emína eju chepytyvõ hag̃ua.

13Toñemotĩmba ha tomanomba umi cherehe oñemoĩva, ñemotĩ ha ñembohory tohupity umi chejukasévape.

14Che katu tapiaite ajerovia nderehe, ha ko’ýte ko’yteve romomba’eguasuve ahávo.

15Che juru tomombe’u tapiaite nde justícia ha ne rembiapo porãita, umía ndojepapakuaái.

16Amombe’u, Che Jára, che Ruete rembiapo tuichaitéva; amomandu’áta nendivénte oĩha ñembojovake añeteguáva.

17Nde, ore Ruete, chembo’eva’ekue che mitãrusu ára guive, ha ko’ág̃a peve amombe’u’aína ne rembiapo tuichaitéva.

18Chetujáma ningo ha che akã rague morotĩmbámarõ jepe, Nde, che Ruete, ani chereja rei, amombe’uve hag̃ua nde pu’aka ha ne mbaretekue che ñemoñarenguérape ha mayma ouva’erãvape.

19Nde, ore Ruete, nde justícia og̃uahẽ yvága peve, Nde ningo rejapo tuichaite mba’e; ore Ruete, máva piko ndeichagua.

20Nde, che Ruete, chemboguatava’ekue heta jepy’apy ha mba’evaiete rupi, Nde katu chemoingove jevy, ha cheguenohẽ jevy umi yguasu pypukúgui.

21Nde chemoĩ porãve aiko haguégui, ha chemoangapyhy porã jevy.

22Upévare che romomba’eguasúta avei árpa púpe. Nde, che Jaraite, Nde reñangareko porã haguére che rekove pukukue rehe che rogueropurahéita mbaraka púpe, Nde ha’égui Israel ha che Jára heko porãva.

23Torypápe che juru ndegueropurahéita, ha romomba’eguasúta reguenohẽ haguére che ánga jejopy vaígui.

24Ha che juru tomombe’u tapiaite nde justícia, toñemotĩmba umi ohekáva chéve g̃uarã mba’evai.