Jeremías 16 - Biblia en Guaraní - ?anderuete ?e’? Por? 2015

Ñanderuete ohavira Juda retãme

1Ñanderuete oñe’ẽ chéve ha he’i:

2Nde neremendamo’ãi, nereñembota’yramo’ãi ni nereñembotajyramo’ãi.

3Péicha he’i Ñanderuete umi ta’ýra ha tajýra rehe onacéva ko tetãme, ha isy ha ituvakuéra rehe omoheñóiva ko tetã kóvape:

4Mba’asy hasyetéva rupi omanóta hikuái; ha avave ndojahe’omo’ãi hesekuéra ha noñeñotỹmo’ãi; opytáta ku mymba repotícha yvy apére; kyse puku ha ñembyahýi rupi oñehundíta, ha hetekuérakue opytáta guyra ha mymba saite rembi’urã ramo.

5Péicha he’i Ñanderuete: Ani reike umi ógape ojejahe’ohápe omanóvare, ani reho rembyasy hag̃ua hendivekuéra, ha ani remoangapyhy ichupekuéra; Che aipe’águi che py’aguapy ko tetã kóvagui, he’i pende Ruete, ha aipe’a avei che poriahuvereko.

6Umi tuicháva ha umi michĩva omanóta ko tetã kóvape, noñeñotỹmo’ãi ichupekuéra ha hesekuéra ndojejahe’omo’ãi, noñemondoromo’ãi ijao noñekytĩmo’ãi ipire ha noñemyakã perõmo’ãi avei.

7Avave nome’ẽmo’ãi pan omoangapyhy hag̃ua umi oñembyasývape omano haguére hogaygua ni noñeme’ẽmo’ãi ichupekuéra omboy’u hag̃ua peteĩ váso omoangapyhy hag̃ua ichupekuéra itúva ha isy omano haguére.

8Upévare anítei reike peteĩ ógape oikohápe karuguasu, reguapy rekaru térã remboy’u hag̃ua hendivekuéra.

9Péicha he’i Yvága Atykuéra ha Israel Jára: Peikuaa porãke, Che voi amokirirĩta ko yvy kóvape, pende resakuéra renondépe, ha peẽ peikove aja, opaichagua tory ha vy’a, opaite menarã ha tembirekorã ñe’ẽ ha purahéi opava’erã.

10Ha remombe’u ramo ko tetãme ko’ã mba’e, he’íta ndéve: Mba’érehe piko Ñanderuete he’i ojehutaha oréve ko mba’evai kóva. Araka’épa oreñaña, térã ore roja’yvere, térã ore rojapo mba’evai Ñanderuete, pe Jaraitéva Járape g̃uarã.

11Ha upevove eréta ichupekuéra: Pende rukuéra chemboyke haguére, he’i pende Ruete, ha oiko hikuái ambue jára gua’u rembiguaikuéra ramo, henondépe oñesũ hikuái; ha’ekuéra chemboyke chéve ha ndojapovéima hikuái che rembiapoukapykuéra.

12Peẽ katu pejapo vaieteve pende rukuéragui; peẽ peiko pende py’apy ñañaitéva he’i háicha peẽme, ha napeneñe’ẽrendúi che ñe’ẽme.

13Upévarehe, Che pomosẽta ko tetã kóvagui peteĩ tetãme, peẽ ha pende rukuéra ndapeikuaáivape, upépe peikóta ambue jára rembiguái ramo ára ha pyhare; Che katu ndahechaukamo’ãvéi peẽme che jeporiahuvereko.

14Upérõ Ñanderuete he’i: Og̃uahẽta katuete pe ára ndoje’eveiva’erã: Ñanderuete, tapia oikovéva rérape, oguenohẽva’ekue Israelguakuérape Egípto retãgui,

15hendaguépe katu oje’éta: Ñanderuete rérape, oguenohẽva’ekue Israelguakuérape pe tetã yvatéguio ha opaite umi tetã mamo omosẽ haguégui ichupekuéra; Che voi aguerupa jevýta ichupekuéra hetãme, ame’ẽva’ekue ituvakuérape.

16Ñanderuete he’i: Upéi Che amondóta heta pira kutuhára, oguenohẽ hag̃ua ichupekuéra, ha upéi amondóta heta mymba apihakuéra, opaite cérro ha cérro rembe’y rupi oheka hag̃ua ichupekuéra.

17Che resakuéra oma’ẽ hapekuéra rehe, chehegui nokañýi mba’eve, ni umi heko ñañáva nokañymo’ãi che resa renondégui.

18Che amyengovia jo’a raẽta ichupekuéra hembiapo vai rehe; omongy’apágui che yvy ambue jára ra’ãnga oikove’ỹva rupi, ha omyenyhẽ che retãpy tembiapo chembojeguarúvagui.

Jeremías oñembo’e Ñanderuetépe

19Nde, che Ruete, chembopu’akáva ha chemombaretéva, Nde ningo che mo’ãha pe jepy’apy vaiha árape, heta tetã ou joava’erã ne rendápe yvy apýra guive ha he’i joava’erã hikuái: Añetehápe ore rukuéra orembo’e roporombotavy hag̃ua ha ijára gua’u noipytyvõkuaái ichupekuéra.

20Ikatúnepa pe yvyarigua ojapo ijararã, ha ojapo ramojepe umía, ndaha’éi mba’eveichagua jára,

21upévare ko’ág̃a Che ambo’éta ichupekuéra, ha ahechaukáta ichupekuéra che pyapy ipu’akapáva oikuaa hag̃ua che réra Yvága Atykuéra Jaraha.