Miquéas 6 - Biblia en Guaraní - ?anderuete ?e’? Por? 2015

Ñanderuete oñe’ẽ pohýi hetãme

1Pehendúke umi mba’e pende Ruete he’íva: Epu’ã, eñorãirõ cerrokuéra ndive ha umi cerro’i tohendúke ne ñe’ẽ.

2 Cerrokuéra pehendúke, Ñanderuete ombojovakéta hetãme ha peẽ yvy pyenda pejapysaka porãke Ñanderuete oñorãirõgui hetã Israel ndive.

3Nde che retã eréna chéve: Mba’e piko ajapo vai nderehe, térã mba’épepa romyangekõira’e. Embohovaimína chéve.

4Che ningo roguenohẽva’ekue Egípto retãgui, ha tembiguaikuéra retãgui rojoguava’ekue hepýre, ha pene renonderãme amondova’ekue Moises, Aaron ha Míriampe, pene sãmbyhyhára ramo.

5Nde, che retã, nemandu’áke mba’épa Balac, Moab retã ruvicha, ojaposeva’ekue penderehe ha mba’épa Balaam, Beor ra’y, ombohovái ichupe, ha mba’épa ojehu pe tapére Sitim guive Gilgal peve, peikuaa porã hag̃ua Ha’e penepytyvõ porã hague, (Números 25,1; Josue 4,19-20).

6Mba’e reheve piko añembojáta Ñanderuete renondépe, amomba’eguasu hag̃ua Yvága Járape. Añembojáta piko henondépe kuave’ẽmby ojehapýva reheve térã tóro ra’yrusu ombotýva peteĩ áño reheve.

7Ovy’a piko Ñanderuete aru ramo 1.000 ovecha mácho térã 10.000 acéite arróyo osyryrývaicha. Térãpa añembojakuaa Ñanderuete renondépe aikuaave’ẽ ramojepe che ra’y tenondeguápe, che ánga rembiapo vai rupi.

8Nde, yvyarigua, pende Ruete omombe’umava’ekue mba’épa iporã ndéve. Ha mba’épa pende Ruete oha’ãrõ ndehegui. Eiko hekoitépe, eporoporiahuvereko, ehayhu nde Járape ha eñemomirĩ pende Ruete renondépe.

9Pehendúke, pende Ruete ohenói itávape. Ñande ñanearanduñaína jakyhyje ramo héragui. Peẽ peikóva táva térã ñúme pejapysaka porãke pe jehavira oútava rehe.

10Oĩpa gueteri mba’e oñemondava’ekue mba’evai apoha rógape ha pe kambuchi japu (ojeporúva medída ramo) ombotavy hag̃ua hapichápe oha’ã jave itrígo.

11 Aperdona piko upe oiporúva balánza japu ha pésa japu.

12Umi tavaygua heta mba’e oguerekóva, ojopy reiete hapichakuérape, ijapupa rei ha ijuru oporombotavysénte.

13Upévare Che avei roikutu ha rohundíta ne rembiapo vai rehe.

14Rekaru ramo naneryg̃uatãmo’ãi, neñembyahýita gueteri, remono’õta ha reñongatu ramojepe nde kóga’a oñehundipáta ñorãirõme.

15Reñemitỹta ramojepe, mba’eve neremono’õmo’ãi, rehykue’óta ramojepe olivo’a, ndere’umo’ãi ijacéite, ha reñami ramojepe parral’a, ndere’umo’ãi ne víno.

16Pejapo haguére avei Omri rembiapo vai, ha opaite mba’e Acab rógape ojejapova’ekue, ha’ekuéra penerekombo’e haguéicha, upéicha peẽ avei pejapo haguére, Che pohundíta, peẽ peiko hag̃ua ñembohoryhára ramo ha peñemotĩete hag̃ua, (1 Réyes 16,23-28; 1 Réyes 16,29-33).