1 Pédro 1 - Biblia en Guaraní - ?anderuete ?e’? Por? 2015

Ñemomaitei

1Che, Pédro, Hesu Crísto apóstol ahai ko kuatiañe’ẽ Israelguakuéra oñemosarambiva’ekuépe ha oikóva tetã ambueygua ramo Pónto, Galácia, Capadócia, Ásia ha Bitíniape.

2Ñandejára Ñanderuete pendeporavo yma guivéma, pe Pytu Porãmbáva tapenemboheko porã, Hesu Crísto ruguy rupi, peẽ peneñe’ẽrendu hag̃ua; imborayhu ha ipy’aguapy tapenemyenyhẽve pehóvo.

Hesu Crísto ñane esperánza

3Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve,

4ha upéicha ñaha’ãrõ jahupity hag̃ua ime’ẽmby ñane mba’erãva oñeñongatúva yvágape, ha ko Ñanderuete me’ẽmby kóva noñembyaimo’ãi araka’evénte, noñemongy’amo’ãi ni ndaipirumo’ãi.

5Ñanderuete ipu’aka rupi, oñangareko penderehe pejeroviaháre hese ha pehupity hag̃ua pe salvacion ojehechaukátava ára pahápe.

6Upévare peẽ penderory, tekotevẽ ramo jepe pehasa ñembyasy mbovymi ára pukukue heta jepy’ara’ã rupi ha péva ogueru peẽme ñembyasy.

7Tojekuaa pende jerovia, ohasáva jepy’ara’ã rupi, iporãve órogui, oñehundikuaáva tatápe. Ha pembopoguy ramo pende jepy’ara’ã, peẽ pemomba’eguasu ha pemboete Ñanderuetépe Hesu Crísto ou jevy ramo g̃uarã.

8Peẽ ndapehechái ramo jepe Hesu Crístope, pejerovia hese, pehayhu ichupe ha pemomba’eguasu ichupe vy’a tuicha reheve, ndaikatúiva ja’e yvy arigua ñe’ẽ rupi ha peẽ penerenyhẽ heko jajáigui,

9pehupity hag̃ua pende jerovia oha’ãrõva: Salvacion pene ángape g̃uarã.

10Ko salvacion kóva rehe umi proféta ojepy’amongeta (opensa) ha ojetypeka hetava’ekue, oikuaaségui mba’épa he’ise upe salvacion. Ha’ekuéra he’imava’ekue Ñanderuete ome’ẽtaha peẽme, Ha’e ipy’a porãgui.

11Ha’ekuéra ohekámi oikuaa hag̃ua araka’épa ha mba’eichagua árapepa upe salvacion oikóta, Hesu Crísto Pytu Porãite, oĩva ipypekuéra he’iva’ekue ichupekuéra: Ha’e ohasa asy raẽtaha ha uperirémante Ha’e og̃uahẽtaha teko jajaipápe.

12Hesu Crísto Pytu Porãite ohechaukava’ekue ichupekuéra ko mba’e kóva, ha’ekuéra oikuaaséva; ko mba’e katu ndaha’éi ichupekuéra g̃uarã, peẽme g̃uarãnte uvei ha’ekuéra omombe’ukáva. Ha ko’ág̃a oñemombe’úma avei peẽme Ñanderuete salvacion ha umi omyasãiva’ekue ko ñe’ẽ kóva pende apytépe ojapo hikuái Pytu Porãmbáva pu’aka rupi. Ko’ã mba’e yvága rembiguaikuéra (angelkuéra) jepe oikuaa porãse avei.

Peñemboheko porãke

13Upévare peñembosako’i porãke, pejepy’amongeta hekópe ha peha’ãrõmba Hesu Crísto ou jevy peve ijopoiguasu (iporiahuvereko) reheve.

14Mitã iñe’ẽrendúvaicha peha’ãrõ ichupe, ha anítei peiko jevy pene rembipota vai poguýpe.

15Upéva rãngue peñemboheko porãkena peguataha rupi, Hesu Crísto penerenoiva’ekue peiko porã hag̃ua.

16Ñanderuete kuatiañe’ẽme he’i voi: Pende reko porãke; Che, chereko porãgui, (Levítico 11,44).

17Ha peẽ peñembo’e ramo Ñanderuetépe, peikuaa porãke Ha’e ombojovakéta peteĩteĩme hembiapokue rehe oporombojuavy’ỹva, upévare peiko kyhyjepópe yvy apére.

18Peikuaa porãke Ñanderuete nañandejoguaiva’ekue mba’e opa rei jevyva’erã rupi, ku óro térã plátaicha, pendesalva hag̃ua pende reko vaígui, pende rukuéra ombohasamava’ekue peẽme.

19Ha’e ñandejoguava’ekue Hesu Crísto ruguy porãite rupínte, ijovecha ra’y imarã’ỹ ha oñemongy’a’ỹvaicha.

20Hesu Crístope ojeporavóma voi ojejapo mboyve ko múndo (univérso), ojehechauka hag̃ua ko’ã ára pahápe penderayhupápe.

21Hesu Crísto rupi pejerovia Ñanderuete rehe, Ha’e voi omoingove jevy ichupe omanova’ekue apytégui, ha ome’ẽ ichupe teko jajaipáva, upéicha Ha’érupi peñemoĩ avei jeroviapópe Ñanderuete pópe ha peha’ãrõ Ha’e ojehechaukaha ára peve.

22Peẽ pemopotĩ rire pene ánga peneñe’ẽrendu hag̃ua Ñanderuete ñe’ẽ añeteguápe ha pejohayhu hag̃ua tapia hermáno mborayhu añetegua ha tova mokõi’ỹ reheve.

23Peẽ ningo peikove jevy, ndaha’éi pende ru ha sy yvy arigua omanótava rembipota rupi, Ñanderuete rembipota rupi uvei penace jevy.

24Ñanderuete kuatiañe’ẽ he’i avei: Kuimba’ekuéra ha kuñakuéra oiko ka’avóicha, ha iverapy ka’avo potýicha, pe ka’avo ipiru ha ipoty ho’a, (Isaías 40,6-8).

25Ñanderuete ñe’ẽ katu oiko tapia g̃uarã. Ha ko ñe’ẽ kóva oñemyasãiva’ekue pende apytépe, Ñanderuete ñe’ẽ porãite (evangélio) rupi.