Salmokuéra 73 - Biblia en Guaraní - ?anderuete ?e’? Por? 2015

Ñanderuete ipy’a porã - Asaf purahéi

1Añetehápe, Ñanderuete ipy’a porã Israel ndive g̃uarã, ha umi ipy’a potĩva ndive g̃uarã.

2Ha che katu, haimete añepysãnga, haimetete chepysyrýi.

3Che chepy’arasy ahechávo mba’éichapa oiko porã umi oñembotuicha reíva ha hembiapo oho porãmba.

4Ndohasa asýi omano meve ha hesãi hikuái opaite árape.

5Ndoikói hikuái po’a’ỹme ambue yvyariguakuéraicha, ha ndoikói jehavirahápe ambue kuimba’ekuéraicha.

6Upévare oñembojegua ha’enteségui, ha ñorãirõme oñemonde hikuái.

7Ikyraitégui hikuái hesapopa ha oñohẽ hembipota vai ipy’apýgui.

8Oñembohorýnte ha oñe’ẽvai, oñembotuicha jave hikuái oporojopyse.

9Ijuru ha iñe’ẽvaikuéra opu’ã hikuái yvága rehe, ha ikũ oñe’ẽvai yvyarigua rehe.

10Upévare che retãyguakuéra oñemboja hendápe ha omokõ hikuái hekombo’e ku y ro’ysãvaicha.

11Ha he’i hikuái: Mba’éicha piko Ñanderuete oñandúne térã oikuaáne upéva.

12Péicha ápe ko’ã tekove vai oikohína, iñangekõi’ỹ rehe ombyaty hikuái mba’erepyeta.

13Reiete piko ra’e aiko py’a potĩme ko yvy apére, ha namongy’ái che po tembiapo vaípe.

14Ára pukukue ahasa asy ha pyharekuépe chehavira hikuái.

15Che ha’e rire ha’ekuéraicha che añemoĩva’erãmo’ã ne retãygua ra’ykuéra rehe.

16Upéicha heta ajepy’amongeta ha añeha’ãmba aikuaa porã hag̃ua, péva ndoikéi katu che akãme.

17Ha aike rire ae Ñanderuete rogaguasúpe ahechakuaa mba’éichapa hekovekuéra opa rei.

18Añetehápe remoĩra’e ichupekuéra tenda isỹiháme, ha Nde reitýta ichupekuéra oiko hag̃ua tapere.

19Sapy’aitépe Nde rehundi ichupekuéra ha kyhyjepópe omanomba hikuái hapére.

20Ku opa reírõ guáicha umi ta’ãnga jahecháva ñande képe ha japáy rire opa rei, upeichaite Nde, che Ruete, rembohesaráita ha’ãnga yvyariguakuéra apytégui.

21Cherenyhẽ rire py’arógui ha che py’apy oñemoĩ rire gueteri nderehe,

22che aikova’erãmo’ã peteĩ itavyetévaicha ha che nacheakã porãmo’ãi ha ajogua mymbakuérape ne renondépe,

23upeichavéramo jepe che aĩ tapiaite nendive, Nde chejoko porãgui che po akatúagui.

24Nde chemboguata porã ne rekombo’e rupi, ha ipahápe chemog̃uahẽ porãta ne rendápe.

25Nde’ỹre, mba’éiko arekóta yvágape. Ha nde’ỹre mba’eve ndaipotái ko yvy ape ariguágui.

26Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

27Ha peikuaa porãke umi oñemomombyrýva Ñanderuetégui omanombava’erã; Nde rehundíta opaite oñemboykévape guive ndehegui.

28Che katu añemboja ramo Ñanderuete ypýpe avy’aitéta, che ajeroviágui Ñanderuete rehe, amombe’u hag̃ua hembiapo tuichaitéva.