Ester 8 - Biblia en Guaraní - ?anderuete ?e’? Por? 2015

Asuéro ohai ambue tembiapoukapy Judayguakuérape g̃uarã

1Ha pe ára pévape, pe tetã ruvicha Asuéro ome’ẽ tetã ruvicha rembireko Estérpe Aman róga, Aman ningo pe Judaygua rehe ija’e’ỹva, ha Mardoquéo ou tetã ruvicha renondépe; Ester omombe’úgui ichupe Mardoquéo itúva angaha.

2Ha pe tetã ruvicha oipe’a ikuãgui, pe kuãirũ oipe’aukava’ekue Aman pógui, ha ome’ẽ Mardoquéope. Ha Ester omoĩ Mardoquéo poguýpe Aman rogakue.

3Upéi Ester oñe’ẽ jevývo tetã ruvicha renondépe, ojeity ipy renondépe ha ojahe’ohápe ojerure asy ichupe ojoko hag̃ua pe tembiapoukapy Aman heko ñaña rupi ojapoukava’ekue Judayguakuéra rehe.

4Upémaramo tetã ruvicha oipyso Ester gotýo ijyvyra po’i oroguiguáva ha Ester opu’ã ha oñembo’y tetã ruvicha renondépe,

5ha he’i: Oĩ porã ramo tetã ruvichápe, ha ajohu ramo py’aporã ne renondépe, ha oĩ porã ramo tetã ruvichápe, ha che ha’a porã ramo nde resa renondépe, toñemoĩ kuatia rehe opyta rei hag̃ua pe kuatiañe’ẽ Aman, Hamedata ra’y, ohaiva’ekue ohundi hag̃ua opaite Judayguakuérape oĩva guive ne retãguasúpe.

6Mba’éicha piko che ikatu akirirĩ pe mba’evaiete ohupitýtava che retãyguakuérape. Mba’éicha piko che ikatúta aikove che retã oñehundi ramo.

7Ha tetã ruvicha Asuéro he’i tetã ruvicha rembireko Ester ha Mardoquéope, pe Judayguápe: Che ame’ẽma Estérpe Aman róga, ha oñemosãingóma ichupe ijejuvyhaenda rehe, omopu’ã haguére ipo Judayguakuéra rehe.

8Pemondóna kuatiañe’ẽ opaite Judayguakuérape peẽme iporãve háicha, tetã ruvicha rérape, ha pemoha’ãnga (pefirma) tetã ruvicha kuãirũme; peteĩ tembiapoukapy ojehaíva tetã ruvicha rérape, ha oñemoha’ãnga riréma tetã ruvicha kuãirũme, ndaikatuvéima opyta rei.

9Upémaramo oñehenói tetã ruvicha kuatiañe’ẽ haiharakuéra ko jasy mbohapyhápe, péva hína Sivan (Júnio), pe ára 23-hápe; ha ojehai peteĩ kuatiañe’ẽ Mardoquéo oipota haichaite, opaite Judayguakuérape g̃uarã, umi mburuvichápe, umi soldádo aty ruvichápe ha opaite tetã mburuvichápe oĩva Índia guive Etiopía peve, 127 tetãnguérape; peteĩteĩ tetãme ojehaiva’erã iñe’ẽ ha ilétrateépe.

10Ha Mardoquéo ohaiuka tetã ruvicha Asuéro rérape, ha omoha’ãnga (ofirma) tetã ruvicha kuãirũme, ha omondouka pe kuatiañe’ẽ tetã ruvichakuéra remimondo kavaju iñakuãva ári, umi kavaju iporãvéva tetã ruvicha omoñemoñaukava’ekue.

11Pe tetã ruvicha he’iuka ikuatiañe’ẽ rupi Judayguakuérape oikóva guive Pérsia retãguasúpe, ikatuha oñembyaty hikuái ha oñorãirõkuaaha hekovekuéra rehehápe, ha ikatuha oporohundi, ha oporojuka, ha ohundipakuaaha opaite tetãyguakuérape hogayguakuéra reheve ojeityséva hi’arikuéra, ha oñemomba’epakuaa hese ija’e’ỹva mba’erepy rehe,

12pe ára ojeporavova’ekue ojejukapa hag̃ua Judayguakuérape ningo pe ára 13-hápe, pe jasy 12-hápe, péva hína Adar (Márzo).

13Upe kuatiañe’ẽ rembiapoukapy pyahu oñemondo opaite 127 tetãnguérape, ha’ekuéra oikuaa hag̃ua Judayguakuéra oñembosako’ipamaha oñemoĩ hag̃ua hesekuéra ija’e’ỹva rehe.

14Ha umi temimondo kavaju iñakuãva ári, pya’e pya’e osẽ pe tetã ruvicha upéicha he’ígui; ha upéicha ojekuaaukapa ko tembiapoukapy kóva Súsa tavaguasúpe.

15Ha Mardoquéo osẽ tetã ruvicha rogaguasúgui, mburuvichaguasu ao hovy ha morotĩva reheve, ha peteĩ akã jeguaka (coróna) oroguigua tuichaitéva iñakã rehe, ha peteĩ póncho ao ka’avo inimbo pytãvagui. Upéramo umi Susaygua ovy’aite ha oiko toryguasúpe.

16Ha opaite Judayguakuéra apytépe oĩkuri ára sakã ha vy’a, tory ha terakuã porã.

17Ha umi tetã ha umi táva rupi mamo og̃uahẽha rupi tetã ruvicha rembiapoukapy, umi Judaygua ovy’a joa ha vy’apópe ojapo karuguasu pe ára pévape. Ha heta umi tetãygua yvy ape arigua apytépe oiko Judaygua ramo, okyhyjégui Judayguakuéragui.