Oséas 7 - Biblia en Guaraní - ?anderuete ?e’? Por? 2015

Israel ñañangue

1Aipohãno aja Israélpe, ojehechakuaáta Efrainguakuéra angaipa ha Samariaygua reko iñañaha, mondaháicha ijapueterei, oike hapicha rógape ha tapére oha’ãrõ omonda hag̃ua.

2Ha’ekuéra he’i ipy’apýpe Ñanderuete naimandu’amo’ãi ore rembiapo vaikuére, ko’ág̃a katu hembiapo vaikuéra omongoráma ichupekuéra, che resa renondépe oĩmbáma.

3Iñaña reko ombovy’a hetã ruvichápe ha ijapu ombohory imburuvichakuérape.

4Ombyaipa hikuái imenda reko, oiko hikuái ku tatakua hakuetereívaicha, hakuete rire katu pe pan apohára ndohatapyñavéima, ha oñembosako’ipa rire ovupa pe pan.

5Tetã ruvicha arambotýpe umi mburuvicha oka’upa hendive, ha pe tetã ruvicha ovy’aite hendivekuéra ha horyete aja hikuái oñembohory hapichakuéra rehe.

6Hembiapo vai hendy ipy’apýpe ku tatakuáicha, pe pyhare pukukue oguemive ipochykue, pe pyhareve katu hendy jevy tata rendýicha.

7Ha’ekuéra hendy tatakuáicha, imbojovakehára oñehundíma, imburuvichakuéra ho’apáma. Ijapytépe ndaipóri peteĩnte jepe chemomba’eguasúva.

8Efrain ojehe’a ambue tetãyguakuéra ndive, Efrain ojogua peteĩ pan pýrape.

9Tetã ambueygua ho’upa imbaretekue, ha’e oñandu’ỹre iñakãtĩmbáma, ha’e katu noñandúi mba’eve.

10Israel oñembotuicha haguére opu’ã hese ha ndojevýi Ñanderuete rendápe ni ndohekái ichupe, oikotevẽ asy ramojepe.

11Efrain ojogua peteĩ pykasu ra’y tavýpe, akãporã’ỹre oho ojerure pytyvõ Egíptope ha upéi Asíriape.

12Oho vove hikuái, Che aitýta che red hi’arikuéra, guyráicha ho’áta che ñuhãme, amyengovia hag̃ua iñaña reko.

13Cháke, ha’ekuéra opoi haguére chehegui ohasa asýta, upévare aguenohẽ jevýne ichupekuéra ijehasa asýgui, ha’ekuéra katu omopu’ã japu cherehe.

14Ha’ekuéra ndojeroviaséi cherehe ipy’aite guive, ojahe’ohápe oñembo’e (ambue járape) ha oñekytĩmba huguy osyry peve itrígo ha ivinorã rehe, chéve katu chemboyke hikuái.

15Che amopu’ãva’ekue ichupekuéra ha amombarete ramojepe ijyvakuéra, ha’ekuéra oñemoĩ cherehe.

16Ha’ekuéra omomba’eguasu ambue járape, ha’ekuéra oiko ku guyrapa ojepyso’ỹvaicha. Imburuvichakuéra ho’áta kyse pukúpe, oñe’ẽvai haguére cherehe, upévare oikóta puka puka hesekuéra Egípto retãme.