1Sáulo oĩ avei hendivekuéra ha ovy’a ojuka haguére hikuái Estébanpe. Umi árape oñepyrũ hikuái opersegui tuicha Hesu Crísto reheguávape Jerusalénpe, ha upévare oñemosarambipa hikuái opaite Juda ha Samária departaménto rupi umi apóstol katu opyta Jerusalénpe.
2Ha kuimba’ekuéra ojeroviáva Ñanderuete rehe ogueraha Estéban retekue ha oñotỹ ichupe, ha heta ojahe’o joáva hese.
3Sáulo oñeha’ã ombyai hag̃ua Hesu Crísto iglesiayguakuérape, oike mbaretépe hogakuérape ha oipokua ichupekuéra omoinge hag̃ua cárcelpe.
4Umi oñemosarambiva’ekue katu oñepyrũ omyasãi opárupi Hesu Crísto evangélio (marandu porã).
5Felípe oho Samária tavakuéra rupi, ha omyasãi avei Hesu Crísto réra.
6Hetãyguakuéra ojapysaka porã Felípe he’íva rehe ichupekuéra, ha ohecha hikuái avei umi milágro ha’e ojapóva.
7Heta mba’epochy osẽ sapukaipópe hetãyguakuéragui, ha heta oguata’ỹvape ha hete oĩ vaívape ha’e omonguera.
8Upévare tuicha vy’a oĩ umi távape.
9Oiko upépe avei peteĩ paje apohára, hérava Simon, ombopajéva Samariayguakuérape, ha ha’e he’i ijehe mba’eguasuha.
10Opavave ojapysaka hese ha iñe’ẽrendu ichupe imichĩva guive ituicháva peve, ha he’i hikuái hese: Kóva ningo ñande jára pu’akaguasu.
11Hetãyguakuérape g̃uarã ha’e mba’eguasu imba’ekuaa rupi ha ojapo haguére are guive milagrokuéra ijapytepekuéra.
12Ha Felípe omombe’u rire ichupekuéra Hesu Crísto evangélio ha Ñanderuete retãguasu rehegua, kuimba’e ha kuñakuéra ojebautizauka.
13Ha ko Simon ojerovia avei, ha ojebautizauka rire omoirũ Felípepe, ha ohechávo mba’e techaukaha ha milagrokuéra, ohecharamoite ha’e.
14Ha umi apóstol Jerusalénpe oĩva, ohendúvo heta Samariaygua ojeroviaha Hesu Crísto rehe, omondo hikuái Pédro ha Juánpe hendapekuéra.
15Ha og̃uahẽvo upépe Pédro ha Juan oñembo’e hesekuéra oñeme’ẽ hag̃ua ichupekuéra avei pe Pytu Porãmbáva.
16Kóva ne’ĩra gueteri oguejýra’e hi’arikuéra, ojebautizaukánte ra’e Hesu Crísto rérape.
17Upérõ Pédro ha Juan omoĩ ipo hi’arikuéra ha pe Pytu Porãmbáva oguejy avei ipypekuéra.
18Ha Simon ohechávo umi apóstol omoĩ ramo ipokuéra kuimba’ekuéra ha kuñakuéra ári, oñeme’ẽha ichupekuéra pe Pytu Porãmbáva, ha’e ome’ẽse Pédro ha Juánpe pirapire oñeme’ẽ hag̃ua ichupe avei koichagua pu’aka.
19Ha’e he’i ichupekuéra: Peme’ẽna chéve avei koichagua pu’aka, che amoĩ ramo kuimba’e térã kuña ári che po pe Pytu Porãmbáva toike avei ipypekuéra.
20Pédro katu ombohovái ichupe: Nde pirapire toñehundi nendive, reimo’ã haguére Ñanderuete me’ẽmby ikatuha ojejogua pirapirére.
21Ndaipóri ne rendag̃ua ni ne mba’erã Ñanderuete retãguasúpe, nde py’apy ndojeroviáigui hekópe.
22Eñembyasy repensa vai haguére ha ejevy nde py’aite guive Ñanderuete rendápe, ha ejerure Ñanderuetépe Ha’e operdona hag̃ua nde reko ñaña.
23Ahecha porãgui ne ánga oñeñapytĩ mbareteha aña rekópe.
24Upérõ Simon he’i Pédro ha Juánpe: Pejerure peẽ cherehe Ñanderuetépe ani hag̃ua ko mba’e ivaíva pejeva’ekue, ho’a che’ári.
25Ha Pédro ha Juan omombe’u porã rire Ñanderuete ñe’ẽ ojevy Jerusalénpe, ha ohokuévo omombe’u Samária távape Hesu Crísto evangélio.
Felípe ha pe Etiopiaygua26Ñanderuete ángel oñe’ẽ Felípepe ha he’i: Epu’ã ha tereho sur gotýo, pe tape oguejýva Jerusaléngui Gáza gotýo pe desiérto rupi.
27Upérõ Felípe oho, ha ojohu peteĩ kuimba’e Etiopiaygua oñekytĩ’oitévape, ha’e omba’apóva Etiopía retã kuña ruvichápe g̃uarã, Candáce hembiguaiguasuetéva ramo, oñangarekóvo opaite imba’e repy rehe, kóva ouva’ekue Jerusalénpe oñembo’e hag̃ua Israel Járape.
28Ko karaiguasu kóva ojevyhína hetãme icárrope. Ha’e oguapy jave omoñe’ẽ proféta Isaías kuatiañe’ẽ.
29Ñanderuete Pytu Porãitehe’i Felípepe: Tereho hendápe ha eñemboja icárro rehe.
30Ha Felípe og̃uahẽvo hendápe ohendu ha’e omoñe’ẽha pe proféta Isaías kuatiañe’ẽ. Ha Felípe oporandu pe Etiopiayguápe: Hesakã porã piko ndéve umi mba’e remoñe’ẽva ko kuatiañe’ẽme.
31Ha pe karaiguasu ombohovái Felípepe: Mba’éichapa ikatúta hesakã porã chéve, avave nachembo’éi ramo. Ha ojerure Felípepe ejupi ha eguapy che ykére.
32Ha kóa ningo pe ñe’ẽ ha’e omoñe’ẽva: Ovecháicha ningo ojegueraha ichupe ojejuka hag̃ua ha ovecha ra’ýicha okirirĩ iñapĩhára pópe, upéichante Ha’e ndoipe’ái avei ijuru.
33Iñemomirĩ rupi ojepe’áma pe ñembojovake jehavira (castígo) ha máva piko oikuaáta iñemoñare retakue. Hekove pyahu reheve ojehupíta yvágape, (Isaías 53,7-8).
34Upérõ pe Etiopiaygua oporandu Felípepe, ha he’i: Eréna chéve, máva rehe piko pe proféta he’i ko ñe’ẽ kóva, ijehe voi piko térã ambue rehe.
35Upérõ Felípe omombe’u porã ichupe Hesu Crísto evangélio.
36Ha ohóvo hikuái pe tapére og̃uahẽ hikuái y oĩháme, ha pe Etiopiaygua he’i Felípepe: Ma’ẽ, oĩ ningo y, ko’ápe ikatu piko nde chebautiza.
37Ha Felípe he’i ichupe: Nde rejerovia ramo nde py’aite guive, ikatu. Upérõ ha’e ombohovái ha he’i: Arovia Hesu Crísto Ñanderuete Ra’yha.
38Upérõ omombyta icárro, ha mokõivéva oguejy pe ýpe, ha Felípe obautiza pe Etiopiayguápe.
39Ha ojupívo pe ýgui, Ñanderuete Pytu Porãite ogueraha Felípepe, ha pe Etiopiaygua ndohechavéi ichupe. Ha pe Etiopiaygua vy’apópe oguata ohóvo hape rupi.
40Ha Felípe katu ojejohu Azótope, ha ohasávo omombe’u Hesu Crísto evangélio opaite umi táva rupi, og̃uahẽ meve Cesaréape.
Who We AreWhat We EelieveWhat We Do
2025 by iamachristian.org,Inc All rights reserved.
