1Oimeraẽ oikuave’ẽséva kuave’ẽmby tembi’u reheguáva pende Ruetépe g̃uarã toiporavo trígo ku’i iporãitéva, hi’ári oñohẽva’erã acéite, ha omoĩva’erã hi’ári mba’e ryakuã porã.
2Upéi ha’e ogueruva’erã pa’i, Aaron ra’y rendápe; ha pe pa’i ogueruva’erã ipo renyhẽngue pe trígo ku’i ha acéitegui, mba’e ryakuã porã reheve, ha omyendyva’erã kuave’ẽmby renda ári; koichagua kuave’ẽmby hendýva hyakuã asy pende Ruetépe g̃uarã ha Ha’e imandu’a hese.
3Ha pe so’o hembýva pe kuave’ẽmbýgui opytáta Aaron ha ita’yrakuérape g̃uarã; péva ningo mba’e oñemboykéva pende Ruetépe g̃uarã, ojehapýva kuave’ẽmby ramo ichupe g̃uarã.
4Ha pe oikuave’ẽséva pan he’ẽva ogueruva’erã pan, ojejapóva trígo ku’i porãgui ha levadura’ỹre, oñembojehe’apyréva acéite reheve, térã mbeju oñemonáva acéite reheve;
5térã oikuave’ẽse ramo ambue mba’e ñembochyryrypyréva, upéva tojejapo trígo ku’i porãgui, levadura’ỹre ha oñembojehe’áva acéite reheve.
6Upéi ha’e oipehẽ’ava’erã ha omoĩta hi’ári acéite, péva ningo ikuave’ẽmby.
7Upe oikuave’ẽva tembi’u jypyréva japepópe (óllape), ojapova’erã trígo ku’ígui acéite reheve.
8Ha’e ogueruva’erã ko kuave’ẽmby pende Ruete renondépe ha omoĩva’erã pa’i pópe, ha’e ogueraha hag̃ua kuave’ẽmby rendápe.
9Ha pe pa’i ohapyva’erã ko kuave’ẽmbýgui peteĩ pehẽngue oñekotevẽva mandu’aha ramo pe kuave’ẽmby renda ári; péva ningo kuave’ẽmby hyakuã asýva pende Ruetépe g̃uarã.
10Ha pe hembyre opytáta Aaron ha ita’yrakuérape g̃uarã; péva ningo mba’e oñemboykéva Ñanderuetépe g̃uarã, ojehapýgui ichupe g̃uarã.
11Anítei peikuave’ẽ pende Ruetépe g̃uarã tembi’u ojejapova’ekue levadúra reheve; tembi’u ojejapóva levadúra térã eíra reheve anítei peikuave’ẽ pende Ruetépe g̃uarã.
12Ko’ã kuave’ẽmby peguerukuaa me’ẽmby ypykue ramo pende Ruetépe g̃uarã, anítei pehapy umía kuave’ẽmby renda ári mba’e hyakuã asýva ramo.
13Opaichagua kuave’ẽmby pemohe’ẽva’erã jukýpe; pe juky penemomandu’a pende Ruete ñe’ẽme’ẽ rehe; upéicha opaite pene kuave’ẽmby reheve peikuave’ẽva’erã avei juky.
14Peikuave’ẽ ramo pende Ruetépe kuave’ẽmby ypykuégui, pemaimbeva’erã tatápe pe espíga hi’akýva ha ha’ỹingue oñemongu’ipyréva peikuave’ẽta kuave’ẽmby ramo pene ñemitỹngue ypykuégui.
15Pemoĩta hi’ári acéite ha mba’e ryakuã porãva, péva ningo pene kuave’ẽmby.
16Ha pe pa’i ohapýta peteĩ vore ko trígo ku’i ha acéitegui, mba’e ryakuã porã reheve; ko kuave’ẽmby kóva rupi oñemomba’eguasúta pende Ruetépe.
Who We AreWhat We EelieveWhat We Do
2025 by iamachristian.org,Inc All rights reserved.
