Daniel 11 - Biblia en Guaraní - ?anderuete ?e’? Por? 2015

1Ha che voi, aĩ amombarete hag̃ua Miguélpe, Darío, pe Mediaygua, oñepyrũvo oisãmbyhy tetã ruvicha ramo.

Tetã ruvichakuéra yvate (nórte

) gotyogua ha yvy (sur

) gotyogua

2Ko’ág̃a ahechaukáta ndéve pe añetegua, eikuaa porãke, oĩ gueteri mbohapy tetã ruvicharã Pérsiape, ha pe irundyha oñembopirapire hetaitereivéta ambuekuéragui ha oñemombaretévo imba’erepyeta reheve, oñemoĩta Grécia retã rehe.

3Uperire opu’ãta peteĩ tetã ruvicha ipy’aguasúva, ha’e oisãmbyhýta pu’akaguasupópe ha ojapóta ha’e ojaposéva guive.

4Ha’e opu’ã porã rire oñehundi jevýta hetã oñemboja’óta irundy yvytu gotýo, hetã ndopytamo’ãi iñemoñarenguérape g̃uarã, hesegua’ỹvape katu oñeme’ẽta, umi tetã ruvicha katu ndohupitymo’ãi pe tetã ruvichakue pu’aka.

5Ha pe Egípto retã ruvicha oñemombaretéta, peteĩ isoldádo ruvicha katu oñemoĩta hese, ha oikóta tetã ruvicha ramo hendaguépe ha ipu’aka tuichaitereíta.

6Heta áño rire ha’ekuéra oikova’erã peteĩ ñe’ẽme ha pe Egípto retã ruvicha omomendáta itajýra pe Síria retã ruvicha rehe, oñembopy’apeteĩ hag̃ua. Kóva nosẽporãmo’ãi katu heta áño. Ha’e ndaipu’aka aremo’ãi, omanótagui ha’e, ha hendive avei hembireko pyahu, hembiguaikuéra, imemby ha hembireko pyahu ru.

7Itúva ñemoñare apytégui opu’ãta peteĩ ha oguapýta Egípto guapyhaguasu ári ha oúta isoldádo aty reheve ojeity hag̃ua Síria retã ruvicha ári, ha oikéta itáva oñemombareteva’ekuépe ha ombopoguy rire ojapóta ipype ojaposéva guive.

8Ha’e ogueraháta Egíptope Síria jára ra’ãnga ha opaite imba’erepy ojejapova’ekue pláta ha órogui, ha heta áño pukukue ha’e imbaretevéta Síria retã ruvichágui.

9Ha ohasa rire heta áño, Síria retã ruvicha oike Egípto retãme ombopoguy hag̃ua Egiptoyguakuérape, ha ndaipu’akáigui hesekuéra ojevy jey hetãme.

10Upéi Síria retã ruvicha ra’ykuéra ipochy joáta, ha ombyatýta isoldádo aty ndetuicháva, ha pya’e pya’e oúta ha oñu’ãmbáta ysyrýicha, ha ohasáta tenonderã gotýo, ha upéi ojeréta ogueraha pe ñorãirõguasu itáva oñemombaretéva peve.

11Upévare pe Egípto retã ruvicha ipochýta ha osẽta ondyry hag̃ua Síria retã ruvicha soldádo aty ndetuichapa jepéva rehe, ha ombopoguýta ichupekuéra.

12Pévarupi Egípto retã ruvicha oñembotuicháta ipy’apýpe ha ojukaukáta 10.000-pe. Ipu’aka katu ndahi’aremo’ãi,

13pe Síria retã ruvicha ombosako’i jevýgui ambue soldádo aty ituichavéva pe tenondeveguarégui, ha ohasa mboyve heta áño ou jevýta isoldádo atyguasu reheve ha hetaiterei ñorãirõ rembiporu reheve.

14Umi ára umívape oĩta heta opu’ãva Egípto retã ruvicha rehe, ha umi kuimba’e oñorãirõkuaáva ne retãme, umi Judaygua, opu’ãva’erã avei omoañete hag̃ua umi mba’e ojehechaukava’ekue ndéve, ha’ekuéra katu ho’apava’erã.

15Pe Síria retã ruvicha oúta omopu’ã heta soldádo rete ñemo’ãha rendag̃ua, ojeity hag̃ua hi’ári ombopoguy peve pe táva imbaretetéva, ha Egípto soldádo aty jeporavopyre jepe naimbaretemo’ãvéi ipu’aka hag̃ua umi Siriaygua rehe.

16Pe Síria retã ruvicha ojapóta hesekuéra ojaposéva, ha ndaiporimo’ãi avave ikatúva oñemoĩ hese. Upéi ha’e oikéta avei Israel retãme, pe yvy iporãitévape, ha upépe ojapóta avei sarambiguasu.

17Uperire ha’e oñeha’ãta oñemomba’e hag̃ua opaite Egípto retã rehe, upévare oñembopy’apeteĩ Egípto retã ruvicha ndive ha ome’ẽ ichupe peteĩ itajýra hembirekorã ramo, ohundi hag̃ua ichupe, ndopyta aremo’ãi katu ha nosẽ porãmo’ãi mba’eve,

18upévare pe Síria retã ruvicha ojeréta yguasu rembe’y gotýo, ombopoguy hag̃ua heta ísla, peteĩ mburuvicha guasu katu ojokóta ichupe, ha noñembohorymo’ãvéi ojevýtagui ñemotĩ tuicha reheve hetãme.

19Upéi ombojeréta hova hetã megua táva mbarete rehe, oipe’a hag̃ua mbaretépe imba’erepy, upévare oñepysãngáta, ho’áta, ha hekove opa reíta.

20Hendaguépe opu’ãta ambue tetã ruvicha, ha kóva omondóta hembiguaiguasúpe omono’õ hag̃ua impuésto Israel retãme, pe yvy porãitépe; ha mbovyete ára haguépe oñehundíta, ha ndaha’emo’ãi pochyhápe, térã ñorãirõháme (py’ajoyvy rupi uvei, traicion rupi uvei).

21Hendaguépe ojupi peteĩ kuimba’e heko vaietéva, nome’ẽséi katu ichupe hikuái pe tetã ruvicha guapyha, oñeha’ãrõ’ỹháme katu ha’e omoĩta ipoguýpe pe tetãme, juruhe’ẽ ha ñembotavy rupi.

22Umi soldádo aty opu’ãva’ekue hese, ha’e oitypeíta henonderãgui ku ysyry oñuãmbávaicha, ha’e omboykéta avei pe ñe’ẽme’ẽ mburuvicha Jerusalen peguápe ndive oguerekóva.

23Ha’e oñembopy’apeteĩ rire hendive, ha’e ombotavy ichupe ha ambuekuérape, ipu’aka okakuaa porã avei, ndahetái ramojepe umi soldádo oĩva ipoguýpe.

24Pe tetã oiko aja py’aguapýpe, ha’e oikéta pe yvy iporãitévape, Judápe, ha ojapóta itúva ni ijypykuéra ndojapoiva’ekue. Ha’e omboja’óta umi hendive oĩvape umi mba’e mondapyre ha heta jopói. Ha’e oñembosako’i ondyrységui umi táva oñemombaretévare, ko’ã mba’e katu ndahi’aremo’ãi.

25Upéi ombyatýta peteĩ soldádo aty tuicháva ojeity hag̃ua Egípto retã ruvicha ári. Egípto retã ruvicha katu oho ojohu hag̃ua ichupe isoldádo aty tuicha ha imbaretéva reheve, ndaipu’akamo’ãi katu hese, oĩgui umi ñemiháme oñemoĩva hese.

26Ha umi ho’úva hembi’u hevéva jepe oñemoĩta hese ñemiháme ha isoldádo aty oñembopoguýta ha heta omanóta.

27Ko’ã mokõi tetã ruvicha oñeha’ãmbáta oñombotavy hag̃ua ha heta japu reheve oñomongetáta hikuái oguapy jave peteĩ mesápe okaru hag̃ua, nosẽ porãmo’ãi katu mba’eve ichupekuéra, nog̃uahẽigui gueteri pe ára umi mba’e ojehu hag̃ua.

28Ha pe Síria retã ruvicha oho jevýta hetãme heta mba’erepy reheve, ha ohokuévo ipy’a oñemoĩta Jerusalen rehe, ha ojapóta ojapose háicha, oho mboyve hetãme.

29Ha pe ára ha’e he’i hague ou jevýta yvy (sur) gotýo, nosẽ porãmo’ãi pe tenondeve ou ramoguaréicha,

30oútagui hi’ári umi bárco Quitímgui, upévare ha’e oñemondýita ha pochypópe ojevýta oñemoĩvo Jerusalen rehe, ha ojapóta ojapose háicha, ha oñemoirũta umi Israelgua ndive opoimava’ekue Ñanderuetégui, oñemoĩ hag̃ua ambue Israelguakuéra rehe ojeroviáva Ñanderuete rehe.

31Ha’e omondóta isoldádo aty omongy’a hag̃ua Ñanderuete rogaguasu ha ojokáta umi kuave’ẽmbyrenda Ñanderuete róga peguáva ha hendaguépe oikuave’ẽta ijára gua’úpe g̃uarã.

32Juru he’ẽme ombotavýta umi opyrũvape Ñanderuete ñe’ẽ rehe; ha umi tetãygua ojerovia porãva oñemombareteve ohóvo ha ndopoimo’ãi Ñanderuetégui.

33Ha umi tetãygua iñarandúva guive oĩva tetãpýre ohekombo’éta heta hapichápe; ndahetái ára rire katu ho’áta hikuái kyse puku rupi térã oñehundíta tata rupi, oñemondáta imba’ekuéra térã ojegueraháta tembiguái ramo ambue tetãme.

34Ha ohasa asyete aja og̃uahẽ pe pytyvõmi, upévare heta oñemoĩta ijykére omoirũ gua’u hag̃uánte.

35Ha umi iñarandúva apytépe ho’áta avei ojepe’a hag̃ua ijapytégui heko ky’áva, oñemopotĩ ha oñemomorotĩ hag̃ua, upe ára Ñanderuete omoĩva’ekue pevénte; ha umi ára paha Ñanderuete omoĩva’ekue oĩta ñane renonderãme.

36Ha Síria retã ruvicha ojapóta ojaposéva, ha oñembotuicha ha oñemomba’eguasuva’erã opaichagua jára ári, ha pe Jára ruvichaguasu rehe oñe’ẽvaíta, ha osẽ porãmbáta ichupe g̃uarã Ñanderuete ipochy peve; ha umi mba’e Ñanderuete oipotáva katuete ojehúta avei.

37Ha’e omboykéta ituvakuéra jára ha nopenái avei kuñakuéra mborayhu rehe, ha’e nomomba’eguasumo’ãi avei mba’eveichagua járape, ha’e voi oñembotuichave katu opaichagua járagui.

38Hendaguépe ha’e oñepyrũta omomba’eguasu pe táva oñemombaretéva jára, peteĩ jára ituvakuéra ndoikuaaiva’ekue. Ha’e omomba’eguasúta ijára pyahúpe, óro ha pláta, ita vera ha mba’erepy reheve.

39Umi omomba’eguasúva hendive ijára pyahúpe omoingéta pe táva oñemombaretévape ha omoĩta ichupekuéra mburuvicha ramo ha ome’ẽta ichupekuéra yvy, ijopói ramo.

40Ha og̃uahẽvo umi ára paha pe Egípto retã ruvicha oñorãirõ jevýta hendivekuéra. Pe Síria retã ruvicha katu ondyrýta hese ku yvytu hatãicha, icárro, ikavaju ariguaita ha heta barcoguasu reheve, ha oikéta tetãnguéra sur peguápe, ha ýicha oñu’ãmbáta ombyaipa hag̃ua.

41Ha’e oikéta avei pe tetã iporãitévape (Israélpe), ha heta oñehundíta. Edom retã, Moab ha Amon ñemoñarenguéra yvy ndo’amo’ãi katu ipopekuéra.

42Upéi ipojáita ambue tetãnguéra rehe ha Egípto retã ndopyta reimo’ãi.

43Ha’e oñemomba’epáta Egípto mba’erepyeta rehe: Hi’óro, ipláta ha opaichagua mba’erepy iporãvare, Líbia ha Etiopiaygua omoirũta ichupe.

44Ha peteĩ marandu sapy’a oúva kuarahyresẽguio ha yvate gotýogui omongyhyjéta ichupe, ha pochypópe osẽta oporohundi ha ojukaukave hag̃ua.

45Ha’e omopu’ãta hogaguasu tymba pirekueguiguáva yguasu ha pe cérro Ñanderuete rogaguasu oĩha pa’ũme. Og̃uahẽta katu hi’ára paha, ha ndaiporimo’ãi avave oipytyvõtava ichupe.