Deuteronómio 26 - Biblia en Guaraní - ?anderuete ?e’? Por? 2015

Kóga’a ypykue ha diézmo

1Peike vove pe yvýpe Ñanderuete, Ñandejára, ome’ẽtava peẽme pene mba’erã ramo, peñemomba’évo hese ha peiko rire ipype,

2pembyatyva’erã mayma koga’a ypykue peguenohẽtava pende kokuégui, Ñanderuete, Ñandejára ome’ẽtava peẽme, ha pemoĩva’erã peteĩ ajakápe, ha pegueruva’erã pe yvypehẽngue Ñanderuete, Ñandejára oiporavotahápe omopu’ã hag̃ua hóga jojohuha.

3Ha peñembojava’erã pa’i rendápe, omba’apóva pe árape ha pejeva’erã ichupe: Ko árape che ha’ese Ñanderuete, Ñandejárape, añetehápe aike hague pe yvýpe Ñanderuete oprometeva’ekue ore rukuérape.

4Ha pe pa’i orecebiva’erã pe ajaka nde pógui, ha omoĩva’erã Ñanderuete kuave’ẽmby renda renondépe.

5Upévo reñe’ẽva’erã Ñanderuete renondépe: Che ru ningo peteĩ Aramgua ova ohóva, ha oguejy Egíptope mbovymi hogaygua reheve, ha upépe oñemboheta ha oiko ichugui peteĩ tetã ndetuicháva, imbarete ha hetaitereíva;

6ha umi Egiptoygua ojahéi orerehe ha orepy’apy asy, ha oremoĩ tembiguái reko pohýi guýpe,

7ha rojerure asývo ore Ruetépe, ore rukuéra Járape, Ha’e ohendu ore ñe’ẽ, ha ohecha ore jepy’apy asy, ore rembiapo ha ore jejopy vai;

8upévare Ha’e oreguenohẽ Egípto retãgui pyapy mbarete ha ijyva jepysopópe, tuicha ñeporomondýipe, ha tembiapo tuicha ha milágro reheve,

9ha oregueru ko yvy kóvape, ha ome’ẽ oréve ko yvy, osyryhápe kamby ha eíra,

10ha péina ág̃a agueru che koga’a ypykue ichupe g̃uarã, Nde voi che Jára, reme’ẽva’ekue chéve. Upéi ehejáta Ñanderuete, Ñandejára renondépe, ha emomba’eguasúta ichupe rejeitývo henondépe.

11Ha torýpe reimeva’erã henondépe opaite mba’e Ñanderuete ome’ẽma rehe ndéve ha nde rogayguápe. Upéicha ovy’ava’erã avei Leviguakuéra ha tetã ambueygua oikóva pende apytépe,

12reme’ẽmbávo nde diézmo opaite nde koga’águi pe áño mbohapyhápe Leviguakuérape, tetã ambueyguápe, ityre’ỹvape ha imenave’ỹvape, ha’ekuéra okaru hag̃ua nde reikohápe hyg̃uatã meve.

13Ha ereva’erã Ñanderuete, Ñandejárape: Aguenohẽ che diézmo ame’ẽ hag̃ua Leviguápe, tetã ambueyguápe, ityre’ỹva ha imenave’ỹvape, ajapopa Nde ere hagueichaite chéve ajapo hag̃ua; napyrũi ne rembiapoukapykuéra rehe, ni ndacheresaráiri ichuguikuéra.

14Nda’úikuri ichugui che mba’embyasy jave omanógui che génte ha ndajavykýi ichugui chepotĩ’ỹ mboyve, ha naikuave’ẽi ichugui omanomava’ekuépe; cheñe’ẽrendu uvei che Ruete, che Jára ñe’ẽme, ajapo hekoitépe opaite mba’e Nde ereva’ekue chéve ajapo hag̃ua.

15Ema’ẽ yvágagui, nde rekohágui ha emoingo porã ne retã Israélpe, pe yvy reme’ẽva’ekue rehe oréve, repromete haguéicha ore rukuérape; yvy osyryhápe kamby ha eíra.

16Ñanderuete, nde Jára he’i voi ndéve (Israélpe) ko árape rejapova’erãha ko’ã ñe’ẽ, ko’ã tembiapoukapy; eñangarekókena rejapo hag̃ua hekoitépe ko tembiapo kóva, nde py’aite ha ne ánga mbytete guive.

17Peẽ peje ko árape: Ore Ruete, ore Járateete roikóta nde rape rehe, rojapota ne ñe’ẽ ne mbo’epy, ne rekombo’ekuéra ha ne rembiapoukapykuéra.

18Ha Ñanderuete he’i avei ko árape nde ningo che retã, che mba’eteéva Che apromete haguéicha ndéve, upévare ejapo mayma che rembiapoukapykuéra;

19upéicharõ Ha’e penembotuichavéta mayma tetã ha’e omopu’ãva’ekuégui, penemomba’eguasúta, penemoherakuã porãta ha penemomimbipáta, ha peikóta peteĩ tetã heko potĩva ramo Ñanderuetépe, pende Járape g̃uarã; Ha’e he’i haguéicha peẽme.