Jeremías 26 - Biblia en Guaraní - ?anderuete ?e’? Por? 2015

Ojejukase Jeremíaspe

1Joacim, Josías ra’y, Juda retã ruvicha, oñepyrũvo oisãmbyhy hetãme ou ko ñe’ẽ kóva Ñanderuetégui Jeremíaspe ha he’i ichupe:

2Péicha he’i pende Ruete: Eñembo’y che rogaguasu korapýpe, ha eñe’ẽ opaite Juda tavayguakuérape oúva guive chemomba’eguasu hag̃ua ha ere ichupekuéra, opaite ñe’ẽ Che ha’éva ndéve ha anítei hemby peteĩ ñe’ẽ nde erese’ỹva.

3Ikatu hag̃uánte nerendu hikuái, ha peteĩteĩva ojevy hape vaígui, ha natekotevẽmo’ãi ahavira ichupekuéra hembiapo vaikuéra rehe.

4Ha eréta ichupekuéra, péicha he’i pende Ruete: Peẽ nacheñe’ẽrendúi ramo peiko hag̃ua che rembiapoukapy he’i háicha, amoĩmava’ekue pende pópe,

5ha peẽ ndapejapysaka porãi ramo che rembiguái profetakuéra ñe’ẽ rehe, Che amondova’ekue peẽme, iñepyrũmby guive ko’ág̃a peve,

6upéicharõ Che ahundíta ko che rogaguasu ahundi haguéicha che rogakue oĩmava’ekue Silópe, ha Jerusaléngui oikóta maldicion rechaukaha ramo opaite tetãme g̃uarã oĩva guive ko yvy apére.

7Ha umi pa’i, proféta ha opaite tetãygua ohendupa rire Jeremías ñe’ẽ, Ñanderuete he’iukamava’ekue ichupe omombe’u hag̃ua Ñanderuete rogaguasu korapýpe,

8oñemoag̃uimive ohóvo ha ojapyhy hikuái Jeremíaspe ha he’i hikuái: Añetehápe ko’ág̃a remanova’erã katuete.

9Mba’érehe piko reprofetiza Ñanderuete rérape, erévo: Ko ogaguasu oñehundíta pe Silo peguaréicha, ha ko táva kóva itaperéta ha avave ndaiporimo’ãvéi ipype. Opaite tetãygua ijaty opu’ã hag̃ua Jeremías rehe Ñanderuete rogaguasu korapýpe.

10Ha umi Judaygua mburuvicha ohendúvo pe apañuãi ou hikuái tetã ruvicha rógagui Ñanderuete rogaguasúpe, ha oguapy hikuái hokẽ pyahu ypýpe.

11Upémaramo umi pa’i ha umi proféta he’i hetã ruvichápe ha mayma hetãyguakuérape: Ko kuimba’e kóva ojejukava’erã katuete hembiapo vaikue rehe; omomarandúgui mba’evai ko táva kóva rehe, peẽ pehendu haguéicha pende apysa rupi.

12Ha oñe’ẽ jevy Jeremías mayma mburuvichápe ha opaite tetãyguápe, ha he’i: Ñanderuete chembou amomarandu hag̃ua ko ogaguasu ha ko táva kóva rehe, umi ñe’ẽ peẽ pehendumava’ekue pende apysa rupi.

13Pepoi katu pende rape ha pene rembiapo vaígui, ha peneñe’ẽrendu Ñanderuete, pende Járape, ha Ñanderuete ndojapomo’ãi opaite mba’evai he’imava’ekue penderehe.

14Péina ápe, aĩ’aína pende pópe; pejapo katu chehegui peẽme hi’ã háicha ha iporãve háicha peẽme.

15Peikuaa porã katu, peẽ chejuka ramo, añetehápe peñohẽ pendeári peteĩ hi’ánga potĩva ruguy, ha ko táva ha ipypeguakuéra ári; añetehápe Ñanderuete chembou pene rendápe ha’e hag̃ua ko’ã ñe’ẽ ko’ãva pende apysápe.

16Upérõ umi mburuvicha ha tetãyguakuéra he’i pa’i ha umi profétape: Ko kuimba’e kóva ndojapói mba’eve ivaíva ikatu hag̃uáicha ojejuka, Ñanderuete, Ñandejára rérape oñe’ẽ haguére ñandéve.

17Uperire opu’ãmimi karai ancianokuéra ha oñe’ẽ mayma tetãygua ijatývape, ha he’i:

18Miquéas, peteĩ Moresetgua, omomaranduva’ekue Ezequías, Juda retã ruvicha árape, ha oñe’ẽra’e mayma Juda retãyguápe, ha he’i: Péicha he’i Ñanderuete, Yvága Atykuéra Jára, Sion ojejo’óta kokuerãicha, Jerusaléngui oikóta tapere ha Ñanderuete rogaguasu cérrogui oikóta ka’aguy yvate.

19Ezequías, Juda retã ruvicha, ha hetãyguakuéra ojuka piko ra’e Miquéaspe, (Miquéas 3,12). Ndokyhyjéi piko uvei hikuái Ñanderuetégui, ha oñemomirĩ hikuái Ñanderuete renondépe, ha Ñanderuete ndojapói jevy upe mba’evai he’imava’ekue ojapotaha hesekuéra. Ha ñande piko jajapóta mba’e ivaietéva ñane ánga rehe.

20Ha upérõguare oikova’ekue avei ambue kuimba’e omomarandúva Ñanderuete rérape, Urías, Semaías ra’y, Quiriat-jearimguáva, ha ha’e omomarandu avei ko táva ha ko tetã kóva rehe, Jeremías he’i hagueichaite;

21ha ohendupa rire iñe’ẽ pe tetã ruvicha Joacim ha mayma umi karaiguasu, ha mayma soldádo ruvicha ha pe tetã ruvicha oñeha’ã ojuka hag̃ua ichupe; ha Urías ohechávo upéva, okyhyje, okañy ha oho Egíptope.

22Ha pe tetã ruvicha Joacim omondo Elnatan, Acbor ra’ýpe, ambue kuimba’ekuéra ndive Egípto retãme,

23ogueru jevy hag̃ua Uríaspe Egíptogui, ha ogueru ichupe tetã ruvicha Joacim rendápe, ha ha’e ojuka ichupe kyse pukúpe, ha hetekue oity umi mboriahu retekue oñeñotỹháme.

24Ha Ahicam, Safan ra’y katu oipytyvõ Jeremíaspe, ani hag̃ua oñemoĩ ichupe tetãyguakuéra poguýpe ojejuka hag̃ua avei ichupe.