1Péicha he’i Yvága Atykuéra Jára, ha Israel Jára, Moab rehe: Angái, nde Nébo, oñembyaipa ha oñemotĩmbágui; Quiriataim ho’áma; ha Misgab ipy’a kangypáma ha ho’áma yvýre.
2Moab noñembotuichamo’ãvéima; Hesbongua omoheñói ijehe mba’evai ha he’i hikuái: Peju ñahundi hag̃ua hetãme, tetãnguéra apytégui. Ha nde avei Madmen reñehundíta, kyse puku ohóta nde rapykuéri.
3Horonaímgui oñehendu sapukái, ñehundi ha jehasa asy ndetuichaitéva.
4Moab oñehundíma, isapukái asy oñehendúma Zóar peve.
5Jahe’opópe ojejupíta pe cérro Luhit gotýo; Horonaímgui okañy umi hese ija’e’ỹva, jepy’apy sapukái reheve.
6Pekañy, pesalva hag̃ua pende rekove, ha peiko ku jukeri desiérto rupiguáicha.
7Nde rejerovia haguére ne mba’eporã reguerekóva rehe ha ne mba’e repyeta rehe, ha’ekuéra katuete ndejapyhýta avei; ha Quemos, nde jára gua’u, ojegueraháta jepokuapýpe, ipa’ikuéra ha imburuvichakuéra hendivekuéra.
8Ha opaite pende tavakuéra oñembyaíta, ni peteĩ nahembymo’ãi, oñehundíta avei umi tetãygua oĩva cerrokuéra pa’ũme ha oñehundíta avei ijyvy, Ñanderuete he’i haguéicha.
9Peme’ẽna Moábpe ipeporã, toveve mombyry; itavakuéra itaperéta ha avave ndoikomo’ãvéima ipype.
10 Toñemaldeci oimeraẽ oñeha’ã porã’ỹva ojapo hag̃ua Ñanderuete rembipota ha toñemaldeci avei upe ojoko jokóva ikyse puku tuguýgui.
11Moab oiko py’aguapýpe imitãha ára guive, ojogua víno oguapy are porãvape ha noñeñohẽiva peteĩ mba’yrúgui ambue mba’yrúpe, ha araka’eve ndojeguerahái jepokuapyhápe ambue tetãme, upévare he’ẽ asy ha hyakuã porã ndojeíri gueteri ichugui.
12Upévare pema’ẽ porãke outahína peteĩ ára, he’i yvága Jára, Che amondotaha hendápe umi omonandítava ivíno ryru ha upéi ojokáta ikambuchikuéra.
13Ha Moab otĩva’erã ijára Quemósgui, Israel róga otĩ haguéicha Betel jára gua’úgui.
14Mba’éicha piko upéicharamo pejekuaa: Ore ningo kuimba’e py’aguasúva ha ore soldádo ikatupyrýva.
15Oñehundipa Moab ha itaperepa itavakuéra oñemombaretéva, isoldádo pyahu ojeporavopyréva oguejypa jejukaguasu rendápe, he’i Tetã ruvicha guasuetevéva, hérava Yvága Atykuéra Jára.
16Hi’ag̃uietéma Moab ojeity hag̃ua, iñehundi oñembopya’e pya’éma.
17Peñembyasy peẽ peikóva guive ijerekue rehe; ha peikuaáva guive héra, peje: Mba’eichaite piko ipu’aka ha imbaretekue opa rei.
18Nde táva Dibon eguejy nde guapyhaguasúgui ha eguapy yvy nandihápe; Dibon mbyaihára og̃uahẽmbotáma ombyai hag̃ua nde táva oñemombaretéva.
19Nde, Aroergua, eñembo’y tapére ha ema’ẽ porã ha eporandu umi oñaníva ha umi okañývape mba’épa ojehúra’e.
20Moab opyta otĩete. Sarambi oiko ichugui; pejahe’o ha pesapukái; Arnon rupi pemoherakuã Moab oñehundi hague.
21Og̃uahẽ ningo jehaviraguasu ára Moab tavakuérape g̃uarã: Holon, Jahaza, Mefaat,
22Dibon, Nebo, Bet-diblatáim,
23Quiriatáim, Bet-gamul, Bet-meon.
24Queriot, Bósra ha mayma ambue Moab távape g̃uarã, umi mombyry ha ag̃uívape g̃uarã.
25Oñekytĩma Moab pu’aka ratĩ, ha ijyva opẽma, he’i Ñanderuete.
26Emonga’u ichupe, opu’ã haguére pende Ruete rehe; ha Moab tojapajeréi ig̃ue’ẽnguépe (ivomitokuépe), ha toñeñembohory hese.
27Nandéi piko Moab reñembohorymava’ekue Israel rehe, ojejapyhýva ramoguáicha peteĩ mondaha. Nde reñembohory haguéicha Israel rehe, oñembohory jevýta nderehe.
28Peẽ Moabgua pesẽ pende távagui ha peiko itaguasukuéra pa’ũme, peikóta ku pykasúicha oikóva ojehaitypo cérro ykére.
29Rohendúma Moab oñembotuicha ha ojejapo hague. Oñembopy’aguasu ha oñembopy’ahatã, ha ojeroviaiterei ijehe, ha itĩ’atã ipy’aite guive.
30Ñanderuete he’i: Che aikuaa porã ha’e oñembotuicha hague ha oiko japu rekópe, ha imburuvichakuéra ombojovake vaipa.
31Upévare, Che cherasẽta Moab rehe, aguahúta Moab tuichakue rehe, ha chepyahẽta umi Kir-heresgua rehe.
32Cherasẽta nderehe cherasẽ haguéicha Jazer rehe, nde Sibma pegua parralty, nde parral rakã pyahu ohasa pe yguasu, ha og̃uahẽ Jazer yguasu peve; ko’ág̃a katu oñehundíma nde parral’a ñemono’õ.
33Opáma Moab vy’a ha tory oĩva’ekue ikóga ha ijyvy porã rupi, Che ambyaíma ivíno ñongatuha ndojosomo’ãvéima puraheipópe parral’akuéra, ha umi opurahéiva ndopuraheimo’ãvéima vy’apópe.
34Hesbongua sapukái asy oñehendu Eleale ha Jaháza peve, iñe’ẽpu ohasa Zoar guive Horonáim ha Eglat-Selísia peve, hypa haguére avei Nimrim yvukuéra.
35Che ahundipáta umi oikuave’ẽva umi yvypu’ã rupi, ha umi oikóva oikuave’ẽ mba’e ryakuã porã ijarakuérape, he’i pende Ruete.
36Upévare che py’a ipyahẽ ku hasyetévaicha Moab ha umi kuimba’e Kir-heresgua rehe; ha’ekuéra ohundipágui imba’erepyeta ombyatyva’ekue.
37Oñemoperõmbáma iñakã ha hendyvakuéra, ipo oikarãimbáma ha oñemonde hikuái ao vosakuépe.
38Moab róga ape ha hapekuéra rehe tasẽmante oñehendu; Che ajoka haguére Moábpe, ku kambuchi tujaite ojepota’ỹvaicha, he’i pende Ruete.
39Pejahe’o Moab rehe, ojepy’apy etereígui. Moab oñemondyiete ha oñemotĩ. Umi tetã oikóva guive ijerekuévo oñemondýi ha upéi oñembohory joa hese hikuái.
40Péicha he’i pende Ruete: Pema’ẽ porãke ku ñapykani iñarõ ha iñorãirõ háicha, péicha umi hese ija’e’ỹva, ojeitýta ipepo jepysópe Moab ári.
41Ojejapyhypáta umi táva ha umi hekoha oñemombaretéva; ha upe ára upévape umi Moabgua ipy’aguasuvéva ojoguáta kuña imembypotávape.
42Moab oñembyaíta, ha hetã opáta, oñemoĩ haguére Ñanderuetére.
43Ñemondýi, yvykua ha ñuhã oñemoĩta ndéve, he’i Ñanderuete.
44Upe okañýva oñemondýi haguére ho’áta yvykuápe, ha upe osẽva yvykuágui katuete ho’áta ñuhãme; ko’ã mba’e ojehúta Che ahaviraha árape, he’i pende Ruete.
45Umi okañýva Hesbónpe, opytu’u hag̃ua ikuarahy’ãme, oñemondýita ohechávo Hesbóngui osẽha tata ha Sehon rogaguasu okaiha ohapy hag̃ua Moab karaikuéra ha soldádo akãnguéra.
46Angái, angái Moab; oñehundi Kemos retã; nde ra’ykuéra oñemoĩma cárcelpe ha nde rajykuéra ojegueraha jepokuapýpe.
47Che katu amopu’ã jevýta Moab, hi’are ramojepe; ha agueru jevýta umi ojeguerahava’ekue jepokuahápe ambue tetãme. Ko’ã mba’e ko’ãva Moab jehavira.
Who We AreWhat We EelieveWhat We Do
2025 by iamachristian.org,Inc All rights reserved.
