Matéo 17 - Biblia en Guaraní - ?anderuete ?e’? Por? 2015

Ñanderuete reko jajaipa ojehechauka

1Ha ohasa rire 6 ára Hesu ogueraha hendive Pédro, Jacóbo ha ityvýra Juánpe, ha’eñoháme peteĩ cérro yvate ári.

2Ha upépe Hesu rete oñemoambue hemimbo’ekuéra renondépe; hova ojajái kuarahýicha ha ijao katu morotĩ tesapéicha.

3Ha ojehechauka ichupekuéra Moises ha Elías oñemongeta hag̃ua Hesu ndive.

4Upérõ Pédro he’i Hesúpe: Che Jára, reipota ramo iporã japyta ko’ápe ha ajapóta mbohapy tapỹi (ráncho), peteĩ ne mba’erã, ambue Moises mba’erã ha mbohapyha Elías mba’erã.

5Ha oñe’ẽ jave gueteri ou peteĩ arai omimbipáva ha oñu’ã ichupekuéra; ha peteĩ ñe’ẽpu ou pe arai guive he’íva: Kóva ningo che Ra’y ahayhuetéva ha chembopy’arorýva, pehendúke ichupe.

6Ohendúvo péva hemimbo’ekuéra ojeity hova yvýre okyhyjeitereígui.

7Upémaramo Hesu oñemboja hendápe ha opokóvo hesekuéra, he’i: Pepu’ã ha ani pekyhyje.

8Ha ha’ekuéra ojesaupívo ndohechavéi avavépe, Hesúpe añómante.

9Oguejývo hikuái pe cérrogui Hesu he’i ichupekuéra: Aníke pemombe’u avavépe ko pehechava’ekue, yvyarigua Ra’y oikove jevy peve omanóva apytégui.

10Ha hemimbo’ekuéra katu oporandu ichupe: Mba’érehe piko umi kuatia haihára he’i Elías ou raẽva’erãha.

11Ha Hesu he’i ichupekuéra: Añetehápe Elías ou raẽva’erã, omoĩmbava’erã hekoitépe opaite mba’e.

12Che katu ha’e peẽme Elías oúma hague ha ndoikuaái ichupe hikuái, ha ojapókuri hese opaite mba’e ojaposéva guive. Ha upéicha avei pe yvyarigua Ra’y ohasa asyva’erã ipopekuéra.

13Upépe ae hemimbo’ekuéra ohechakuaa oñe’ẽ hague ichupekuéra Juan Bautísta rehe.

Hesu omonguera peteĩ mitãkuimba’épe oikóva mba’epochy poguýpe

14Hesu og̃uahẽvo hetãyguakuéra apytépe, peteĩ kuimba’e oñemboja hendápe ha oñesũháme he’i:

15Che Jára, eiporiahuverekomína che ra’ýpe, hasýgui ohasa asyeterei jepi; heta jevy ho’áma tatápe ha ýpe avei.

16Aguerúma ichupe ne remimbo’ekuérape, ha’ekuéra katu ndaikatúi omonguera ichupe.

17Hesu ombohováivo he’i ichupe: E’a, peẽ ningo ñemoñare ojerovia’ỹva ha heko vaíva. Araka’e peve piko aropu’akava’erã.

Pegueru chéve pe mitãme

18Ha Hesu oja’o pe mba’epochýpe, ha upevove ha’e osẽ pe mitãgui; ha pe mitã okuera opytávo pe ára guive.

19Upévo hemimbo’ekuéra oñemboja Hesu rehe ha oporandu ichupe ha’eñoháme: Mba’érehe piko ore ndaikatúira’e romosẽ pe mba’epochy ichugui.

20Ha Hesu he’i ichupekuéra: Pejerovia’ígui. Añetehápe Che ha’e peẽme, pende jerovia ituicha ramo peteĩ mostáza ra’ỹicharõ jepe, ikatu peje ko cérrope: Ehasa ko’águi amo gotýo, ha pe cérro ohasava’erã. Ha ndaiporimo’ãi mba’eve ikatu’ỹva peẽme.

21Koichagua pytu vai osẽta karu’ỹre (ajúno) ha ñembo’e rehevémante.

Hesu he’i hemimbo’ekuérape Ha’e omanotaha

22Oiko aja hikuái Galiléa departaméntope, Hesu he’i ichupekuéra: Pe yvyarigua Ra’y ningo oĩma oñeme’ẽ hag̃uáicha tetãyguakuéra pópe,

23ha ojukáta ichupe hikuái; ha mbohapy ára haguépe ha’e oikove jevýta, upévare hemimbo’ekuéra oñembyasyeterei.

Ñanderuete rogaguasu impuésto (contribucion

)

24Ha og̃uahẽvo hikuái Capernaúmpe, umi ombyatýva Ñanderuete róga impuésto og̃uahẽ Pédro rendápe ha oporandu ichupe: Pene mbo’ehára piko nome’ẽi 6 grámo óro morotĩ (pláta), Ñanderuete rogaguasu impuésto ramo.

25Ha Pédro he’i. Ome’ẽ. Ha Pédro oikévo pe ógape, Hesu oñemotenonde ha he’i ichupe: Mba’épa nde ere Simon umi tetã ruvicha, ko yvy arigua, mávaguipa oguenohẽ pe impuésto repy, ita’yrakuéragui térãpa ambuekuéragui.

26Ha Pédro he’i: Ambuekuéragui, ha Hesu he’i ichupe: Upéicha ramojepe ita’yrakuéra nome’ẽiva’erã mba’eve.

27Ha ani hag̃ua ñambopochy ichupekuéra, tereho yguasúpe eity ne pinda, ha upe pira reguenohẽ tenondéva embojurupe’a, ha rejohúta pe pirapire ñande mokõivépe g̃uarã, ejapyhy ha eme’ẽ ichupekuéra, cherehe ha nderehe avei.