Provérbios 21 - Biblia en Guaraní - ?anderuete ?e’? Por? 2015

1Pe tetã ruvicha py’apy, oĩ Ñanderuete pópe ku ysyrýicha, Ha’e oipotahápe omboguata ichupe.

2Ñande ñaimo’ã ñande rape naikarẽiha, Ñanderuete katu oha’ãhína (opesa) ñande py’apýpe oĩva guive.

3Teko porã ha tembiapo heko peguáva oguerohoryve Ñanderuetépe kuave’ẽmbýgui.

4Pe tesa ojererovúva ha pe py’apy oñembotuicháva oñemoĩ Ñanderuete rehe. Pe iñañáva ojapóva guive naiporãi.

5Umi ikyre’ỹva rembiapo hi’a porãta, ha umi itarováva rembiapokue opa reíta, upévare ha’e imboriahuva’erã.

6Upe omono’õva mba’erepyeta ñembotavy rupi pya’eiterei opa jevýta, ha’e voi ojejuvýta ñemano sã rupi.

7Umi omondáva ohundipa jevýta, ndojapói haguére hekoitepeguáva.

8Pe tapicha tie’ỹ ñaña rape ikarẽ ha ipohýi, ha umi heko potĩva rembiapo katu iporã.

9Iporãiteve ojeiko pe óga kapi’i ruguáipe, ojeiko rãngue ogaguasúpe peteĩ kuña heko ñorãirõva ndive.

10Pe iñañáva ánga ojapose mba’e ivaíva; hapicha ndojohúi ñepytyvõ hesa renondépe.

11Ojehavira ramo pe heko ñembohory ipyahúvape ha’e oñemoarandúne; oñehekombo’e porã ramo pe iñarandúvape ha’e iñakãguapyve ohóvo.

12Ñanderuete, pe mbojovakehára heko peguáva, oma’ẽ porã iñañáva róga rehe, ha oity ichupekuéra tape ñembyaihápe.

13Pe ombotýva ijapysa mboriahúva sapukái asýgui, ha’e voi osapukái asyva’erã, ha noñehenduiva’erã avei ichupe.

14Pe jopói oñeme’ẽva ñemiháme ombogue pe pochy, ha pe ombopopeguáva tova mokõime omyendy pe pochy mbojovakeha árape.

15Pe heko potĩva ovy’a ojapo ramo hekoite peguáva, pe hembiapo vaíva katu okyhyjéta.

16Pe tapicha oñemboykéva pe arandu rapégui, amo ipahápe opytáta umi omanomava’ekue ndive.

17Pe tapicha okaru porãsévante ohasa asyva’erã ha upe ohayhúva víno ha mba’e ryakuã porã ndaipirapireitaiva’erã.

18Pe heko potĩva oñeguenohẽva’erã jehasa asýgui, ha pe heko vaíva katu opytáta jehasa asýpe g̃uarã.

19Iporãiteve ojeiko desiértope, ojeiko rãngue peteĩ kuña iñorãirõiterei ha ipochýva ndive.

20Mba’e hepy ha mba’e ryakuã porã oĩhína iñarandúva rógape; ha pe heko ñembotavýva katu ohundipava’erã.

21Upe oikóva teko porã ha poriahuvereko rapykuéri ojohuva’erã pe tekove, pe justícia ha terakuã porã.

22Pe iñarandúva ombopoguy umi imbaretéva retãme, ha oitypa pe imbaretéva jeroviaha.

23Pe oñangarekóva ijuru ha ikũ rehe, hi’ánga ndo’amo’ãi jepy’apýpe.

24Pe tekove oñembotuicha ha ojejapóva ha’e peteĩ oñembohorysénte, ha nohendumo’ãi tekombo’e porã oñemomirĩ hag̃ua.

25Pe iñate’ỹva rembipota vai ojuka ichupe, ipokuéra nomba’apóigui.

26Oĩ tapicha ojerure asýva hapichakuérape ha araka’eve nahyg̃uatãmo’ãi, ha pe heko porãva katu ome’ẽ, ha ndaipojopýi.

27Umi iñañáva kuave’ẽmby (Ñanderuetépe g̃uarã) mba’evai; ha ko’yteve oikuave’ẽ oñomi hag̃ua hembiapo vaikue.

28Pe techahare ijapúva omanova’erã; ha pe heko porãva ñe’ẽ opytava’erã opaite árape g̃uarã.

29Pe iñañáva oñembohova’atã; ha pe heko potĩva katu oñangareko hape rehe.

30Ñanderuete’ỹre ndaipóri arandu, ni akãguapy porã, ni tekombo’e heko peguáva.

31Tetãyguakuéra ombosako’i ikavajukuérape ñorãirõguasu árape g̃uarã, Ñanderuete katu oiporavóta mávapa ombopoguýta hesekuéra ija’e’ỹvape.