Ezequiel 6 - Biblia en Guaraní - ?anderuete ?e’? Por? 2015

Ñanderuete ombyaiva’erã opaite yvy oñemomba’eguasuhápe ambue járape

1Ou chéve Ñanderuete ñe’ẽ, ha he’i:

2Nde kuimba’e ra’y, emoĩ nde rova Israel cerrokuéra gotýo, ha ere che rérape ichupekuéra,

3ha erévo: Israel cerrokuéra, pehendu pe ijyvatetéva, pende Ruete ñe’ẽ péicha he’i: Umi cerrorusu ha umi cérrope, umi yakã ha ñunguéra, peikuaa porãke, Che voi amboúta pendeári kyse puku, ha ahundíta pende apytépe umi yvy yvatekuéra oñemomba’eguasuhápe ambue jarakuérape.

4Pene kuave’ẽmby renda itaperepáta, ha pende kuarahy ra’ãngakúera ojejokapáta; ha Che aitýta umi omanótava pende jára gua’u ra’ãnga renondépe.

5Amombóta umi Israel ñemoñare retekue ijára ra’ãnga renondépe, ha pene kangue amosarambíta pene kuave’ẽmby renda jerekuévo.

6Pende táva, peikoha rupi, itaperéta, umi yvy yvate ha pene kuave’ẽmby renda itaperéta ha opyta reipáta; pende jára gua’u ra’ãnga ojejokapáta opa hag̃ua, pende kuarahy ra’ãngakuéra oñembyaipáta, ha pene rembiapokue oñehundipáta.

7Ha pende apytégui ho’áta umi ojekutútava; ha peikuaáta Cheha pende Ruete.

8Ha ahejáta pende apytégui mbovymi oikoveva’erãva ambue tetãme; umi ojeiva’ekue kyse pukúgui amosarambíta heta ambue tetãre.

9Ha umi hembýtava pende apytégui imandu’a jevýta cherehe, ojegueraha aja tetã ambuépe, Che ambohasa asýta ichupekuéra omyengovia ha oñemboyke haguére chehegui ha omomba’eguasúgui ambue jára gua’úpe ha otĩva’erã hikuái ijehegui, oñemohembiapo vai haguére.

10Ha oikuaáta hikuái Cheha Ijaratee; ndareíri ha’eva’ekue ambohasa asytaha ichupekuéra.

11Péicha he’i Yvága Atykuéra Jára, pende Ruete, ejepopete ha embota nde pýpe ere hag̃ua: Angái, angái, Israel oiko vaietégui ne rendápe og̃uahẽta: Kyse puku, ñembyahýi ha mba’asy iñasãiva (péste, varíola).

12Umi mombyry oikóva omanóta mba’asy oñemosarambíva rupi, ha umi árupi oikóva ho’áta kyse puku rupi, ha umi opytáva ha oñemongoráva itáva ryepýpe ñembyahýigui omanóta; péicha añohẽta che pochy hi’arikuéra.

13Ág̃a pehecha ramo he’õnguekuéra ojeitýva ijára gua’u ra’ãnga renondépe, ikuave’ẽmby renda jerekue rehe, opaite cérro ha opaite cerroguasu ru’ãme, opaite yvyra ikuarahy’ã tuicháva guýpe ha opaite encína máta hakã iñypytũva guýpe, ha mamo oikuave’ẽ haguépe mba’e ryakuã porãva opaite ijára gua’u ra’ãngápe, uperire ae peikuaáta Cheha pende Ruete.

14Che aipysóta che po hesekuéra, ha oikoha rupi hikuái ambotaperepáta, Diblat guive desiérto peve; sur guive nórte peve, ha oikuaáta hikuái Cheha, pe Oikovéva.