Levítico 11 - Biblia en Guaraní - ?anderuete ?e’? Por? 2015

Tymbakuéra ipotĩva ha ipotĩ’ỹva

1Ñanderuete oñe’ẽ Moises ha Aarónpe, ha he’i ichupekuéra:

2Peñe’ẽ Israel ñemoñarenguérape ha peje ichupekuéra: Ko’ãva hína tymba ipotĩva, peẽ ikatúva pe’u tymbakuéra yvy ape árigua apytégui:

3Umi tymba ipysãpẽ pa’ũva ha oñamindu’úva guive, umíva ikatu pe’u.

4Umi oñamindu’úva térã ipysãpẽva apyteguigua katu ndape’uiva’erã pe caméllo, ha’e oñamindu’u ramojepe ipysãpẽ naipa’ũi, perekóta ichupe ipotĩ’ỹva ramo.

5Avei pe mymba ojoguáva akutípe, oñamindu’u ramojepe, naipysãpẽ pa’ũi avei, perekóta ipotĩ’ỹva ramo.

6Avei pe tapiti, oñamindu’u ramojepe, naipysãpẽ pa’ũi katu, perekóta ipotĩ’ỹva ramo avei.

7Pe kure, ipysãpẽ ramojepe, noñamindu’úi, perekóta ipotĩ’ỹva ramo avei.

8Umíva ro’okue ndape’uiva’erã ha ndapepokoiva’erã he’õnguére, perekopáta ipotĩ’ỹva ramo.

9Ikatu pe’u opaite mymba ysyry ha yguasu pegua: Opaite ipepo’íva (pira pepo roky) ha ipiréva pirapiréicha.

10Ha umi ipepo’i’ỹva ha ipirapire’ỹva yguasu pegua ha ysyry pegua, oku’éva guive perekóta mba’evaiete ramo.

11Peẽme g̃uarã mba’evaiete, ho’okuégui ndape’uiva’erã, ha he’õngue peẽme g̃uarã mba’evaiete.

12Opaite ipepo’i’ỹva ha ipirapire’ỹva oiko ramojepe ýpe, peẽme g̃uarã mba’evaiete.

13Ha guyrakuéra apytégui, ko’ãva peẽme g̃uarã mba’evaiete ha ndoje’uiva’erã: Pe ñapykani (guyra ojoguáva taguato guasúpe) cérro rupigua, ñapykani hũ, pe ñapykani para,

14pe karakara ha opaichagua guyra ojoguáva ichupe,

15opaite yryvu ha opaichagua guyra ojoguáva ichupe,

16pe ñanduguasu, pe urukure’a, pe taguato hovy y pegua, ha opaichagua ambue taguato,

17pe ñakũrutũ, pe lecúcho, pe karáũ joguaha,

18pe tujuju jegua, pe tukã y peguáva, pe yryvu akãpirãi,

19pe tujuju, pe mboguari (hoko) ha umi ojoguáva ichupe, pe aka’ẽ ha mbopi.

20Opaichagua mymba’i (bicho’i) ipepóva ha oikóva ipy irundýva ári, perekóta mba’e ipotĩ’ỹva ramo.

21Pe’ukuaa umi mymba’i ipepóva ha ipy irundýva apytégui hetyma hapykuegua ipukuve ramo hetyma henondeguágui.

22Ijapyteguikuéra pe’ukuaa: Pe tuku Arbe ha umi ojoguáva ichupe; pe tuku Solham ha umi ojoguáva ichupe; pe tuku Argol ha umi ojoguáva ichupe; ha pe tuku Hagab ha umi ojoguáva ichupe;

23opaite ambue mymba’i ipepóva ha ipy irundýva katu perekóta mba’e ky’a ramo.

24Oimeraẽva opokóva ko’ã mymba’i re’õngue rehe iky’ava’erã pyhare peve.

25Oimeraẽva ogueraháva he’õngue pehẽngue jepe, ojoheiva’erã ijao ha iky’ava’erã pyhare peve.

26Opaite mymba naipysãpẽ pa’ũiva ha noñamindu’úiva, perekóta mba’e iky’áva ramo; ha oimeraẽ ojáva hese oñemongy’a.

27Ha opaite ambue mymba oikóva ipy irundy rehe, perekova’erã mba’e iky’áva ramo, ha oimeraẽ ojáva guive he’õngue rehe iky’ava’erã pyhare peve.

28Ha pe ogueraháva he’õngue, ojoheiva’erã ijao ha ha’e iky’ava’erã pyhare peve; ha peguerekova’erã ichupe iky’áva ramo.

29Peguerekóta avei iky’áva ramo: Pe eira, pe anguja, pe kururu ha opaichagua mymba ojoguáva ichupekuéra,

30pe teju, pe jakare, pe tejuguasu, pe teju’i ha pe tejutara.

31Ko’ãva peguerekóta iky’áva ramo mymbakuéra apytégui, ha oimeraẽva opokóva he’õngue rehe iky’ava’erã pyhare peve.

32Ha oimeraẽ mba’e ho’áva he’õngue ári iky’ava’erã pyhare peve, taha’e mba’e yvyraguiguáva, ao, tymba pirekue, vosa térã oime haichagua tembiporu oñemba’apoha, oñemoingeva’erã ýpe ha iky’ava’erã pyhare peve, uperire ipotĩ jevýta.

33Ha ã mba’e ho’a ramo kambuchípe, upéva iky’a, ha opaite mba’e oĩva guive ipype avei, ha pejokamanteva’erã pe kambuchi.

34Ha pe y oĩva pe kambuchípe, oñehẽ ramo tembi’u ári omongy’apava’erã avei.

35Peteĩ mymba re’õngue ho’a ramo japepo (ólla) térã páila ári, ojejokava’erã iky’águi avei.

36Peteĩ mymba re’õngue ho’a ramo yvúpe térã ysyrýpe nomongy’amo’ãi umía, upe oguenohẽva katu pe mymba re’õngue oñemongy’a avei.

37Peteĩ mymba re’õngue ho’a ramo mba’e ra’ỹi (semílla) oñeñotỹtava ári, ko’ãva opyta ipotĩ.

38Ha umi mba’e ra’ỹi oñemoinge ramo ýpe, ha hi’ári ho’a ramo peteĩ mymba re’õngue omongy’ava’erã avei pe mba’e ra’ỹi ha pehechakuaáta mba’e iky’áva ramo.

39Ha oimeraẽ mymba peguerekóva pe’u hag̃ua, omano ramo, upe opokóva he’õngue rehe iky’ava’erã pyhare peve.

40Ha pe ho’úva mymba re’õnguégui, ojoheiva’erã ijao ha iky’ava’erã pyhare peve; upéicha avei upe oguenohẽva mymba re’õngue, ojoheiva’erã ijao ha iky’ava’erã pyhare peve.

41Opaichagua mymba otyryrýva yvy apére mba’evaiete peẽme g̃uarã ha ndape’uiva’erã.

42Opaite mymba otyryrýva hye rehe ha avei umi ambue mymba otyryrýva ha oikóva ipo ha ipy ári térã hetave py ári ndape’uiva’erã, iky’águi.

43Anítei peñemoangaipa mba’eveichagua mymba otyryrýva rehe, ha ani peñemongy’átei hesekuéra, anítei pendeky’a umívarupi.

44Che ningo pende Ruete, pende Jára; upévagui peẽ peñemboheko porãva’erã, Che ha che reko porãgui avei; upévagui napeñemongy’aiva’erã mba’eveichaguáre mymba otyryrýva yvy apére rupi.

45Che, pende Ruete, poguenohẽva’ekue Egípto retãgui aiko hag̃ua pende Jára ramo: Peñemboheko porãva’erã, Che ha che reko porãgui.

46Ko’ãva ningo umi tembiapoukapy mymbakuéra, guyrakuéra, opaichagua mymba oikovéva guive ýpe ha opaichagua mymba otyryrýva guive yvy apére.

47Pembojuavy hag̃ua mymba iky’áva ha ipotĩva apytégui ha umi tymba ikatúva ha ndaikatúiva oje’u.