Salmokuéra 144 - Biblia en Guaraní - ?anderuete ?e’? Por? 2015

Ñembo’e ojeruréva ñepytyvõ ha ñemopu’ã - David purahéi

1Toñemomba’eguasu Ñanderuete, Ha’e voi che ñangarekohára, Ha’e ningo ombokatupyrýva che pokuéra ñorãirõme, ha che kuãnguéra ñorãirõguasúpe g̃uarã.

2Nde cheporiahuvereko ha Nde chepytyvõhína, Nde ha’e chéve g̃uarã ku óga oñemombaretévaicha ha Nde voi che pytyvõhára. Nde cheguenohẽ mba’evaígui ha Nde remoĩ tetãnguéra che poguýpe.

3Nde, che Ruete, mba’e piko pe kuimba’e ha kuña, Nde nemandu’a hag̃ua hesekuéra, térã mba’éiko hína iñemoñare reguerohory hag̃ua ichupekuéra.

4Pe yvyarigua ha’eténte ku yvytu térã mba’e výro rei, hi’arakuéra ha’eténte pe kuarahy’ã ohasáramo g̃uáicha.

5Nde, che Ruete, emboguejy yvagakuéra ha eju, epokomi umi cérro rehe ha tahatatĩmba.

6Eguenohẽ umi aratiri ha emyasãi, emombo nde hu’ykuéra ha emosarambi ichupekuéra.

7Yvatete guive embou nde po, chepytyvõ ha cheguenohẽ hag̃ua ysyry pochýgui ha tetã ambueygua poguýgui.

8Ijurukuéra ombotavysénte ha ohupi ramojepe ipo akatúa omoañete hag̃ua iñe’ẽ ndojapomo’ãi ijuru he’íva.

9Nde, che Ruete, ndéve apurahéita sálmo ipyahúva, ambopuse che árpa ndéve g̃uarã.

10Nde reme’ẽ pu’aka tetã ruvichakuérape, ha reguenohẽ ne rembiguái Davídpe iñañáva poguýgui ha ikyse pukúgui.

11Cheguenohẽmína ha chepytyvõ ambue tetãygua poguýgui, ijurukuéra oporombotavysénte, umía ohupíta ijakatúa ome’ẽ reiete hag̃ua iñe’ẽ (ipromésa).

12Ejapomína ore ra’ykuéra tojoguaite imitãrusu árape ku yvyra okakuaapávape, ha ore rajykuéra tojoguaite ku óga guasu horcon ojeguapávape.

13Ore róga tahenyhẽ opaichagua koga’águi oñeñongatúva ipype ha ore ovecha toñemoñamoñave 1.000 jevy ha tomyenyhẽmba ore ñunguéra.

14Ore vakakuéra tahyeguasupaite, tahesãimba ha anítei oĩ umi vaka okañýva, térã oiko pe ñorãirõ ayvu ore táva ryepýpe.

15Ovy’aite pe tetã oikóva Ñanderuete poguýpe ha Ha’e oikórõ Ijaratee ramo.