Matéo 23 - Biblia en Guaraní - ?anderuete ?e’? Por? 2015

Hesu oñe’ẽ pohýi fariséo

ha kuatia haiharakuérape

1Upéramo Hesu oñe’ẽ hetãygua ha hemimbo’ekuérape, ha he’i:

2Moises guapyhápe ningo oguapy umi kuatia haihára ha fariseokuéra;

3opaite mba’e he’íva pejapo hag̃ua, pejapo, anítei peiko ha’ekuéraicha, ha’ekuéra oñe’ẽ porã, ndojapói katu pe he’íva.

4Ojokua peteĩ cárga pohýiva ha omoĩ yvyariguakuéra ati’y ári, ha’ekuéra katu ni ikuãme jepe nomomyiséi.

5Ojapo hembiapokuéra ojehechauka hag̃uánte hapichakuérape; ombope mbopeve pe vakapi inimbo oñapytĩva isyva ha ijyva rehe ha ombopuku pukuve ijahoja ruguái rague.

6Karuguasuhápe ohayhu umi guapyha tenondevegua, ha Ñanderuete rógape umi guapyha tenondegua,

7ha oipota oñemomaitei ichupekuéra pe pláza rupi karaiguasúicha ha oipota yvyariguakuéra ohenói ichupekuéra mbo’ehára.

8Ha peẽ ani peipota peñehenói mbo’ehára, peteĩnte pene mbo’ehára, ha peẽ katu hermanokuéra meme.

9Ko yvy ári ani pehenói avavépe ore ru, peteĩnte pende Túva, yvágape oĩva.

10Ani peñehenói mbo’ehára, peteĩnte pene mbo’ehára, Hesu Cristoite voi.

11Upe mba’eguasuvéva pende apytépe oikova’erã ku tembiguáicha.

12Upe oñembotuicháva ojupe oñemomirĩva’erã; ha upe oñemomirĩva, katuete oñembotuichava’erã.

13Angái peẽ kuatia haihára ha peẽ fariseokuéra rova mokõi. Pembotýgui Ñanderuete retãguasu rokẽ, ani hag̃ua yvyariguakuéra oike, ha peẽ voi ndapeikéi avei, ha ndapehejái oike umi oikesévape.

14Angái, peẽ kuatia haihára ha peẽ fariseokuéra rova mokõi, peipe’áva umi imenave’ỹva róga, ha pembotavy pende rapichakuérape pene ñembo’e puku rupi; upévare tuichave pejehavirava’erã ambuekuéragui.

15Angái, peẽ kuatia haihára ha peẽ fariseokuéra rova mokõi, peguata ha pejeréva yguasu ha yvy ape rehe pehekávo peteĩ pene remimbo’erã, ha pejohúma ramo, pejapo ichugui aña retã ra’y, ipy’a hatãvéva mokõi jevyve pendehegui.

16Angái, peẽ ningo sãmbyhyhára hesatũva, pejéva: Oime ramo ome’ẽva iñe’ẽ Ñanderuete rogaguasu rehe, ndaha’éi mba’eve; ha upe omboajéva iñe’ẽ (juraménto) pe óro Ñanderuete rogaguasu pegua rehe katu, upéva ojapova’erã he’íva guive.

17Peẽ tova tavy ha tesatũ. Mba’épa mba’eguasuve, pe óro Ñanderuete rogaguasu pegua, térãpa Ñanderuete rogaguasu omboykéva pe óro Ñanderuetépe g̃uarã.

18Ha peje avei: Upe omboajéva iñe’ẽ kuave’ẽmby renda rehe, upéva ndaha’éi mba’eve; ha upe ome’ẽva iñe’ẽ (juraménto) pe kuave’ẽmby rehe, oĩva pe kuave’ẽmby renda ári, ojapova’erã upe he’íva guive.

19Peẽ hesatũva. Mba’épa mba’eguasuve, pe kuave’ẽmby, térãpa pe kuave’ẽmby renda omboykéva pe kuave’ẽmby Ñanderuetépe g̃uarã.

20Ha upe ome’ẽva iñe’ẽ kuave’ẽmby renda rehe, ome’ẽ iñe’ẽ hese ha opaite mba’e hi’arigua rehe.

21Pe omboajéva iñe’ẽ Ñanderuete rogaguasu rehe, ome’ẽ iñe’ẽ Ñanderuete rogaguasu ha opaite mba’e oĩva guive ipype rehe.

22Ha upe omboajéva iñe’ẽ yvága rehe, ome’ẽ iñe’ẽ Ñanderuete guapyha rehe, ha pe guapyha ári oguapýva rehe avei.

23Angái, peẽ kuatia haihára ha peẽ fariseokuéra rova mokõi. Peme’ẽva pe diézmo ménta, enéldo ha comínogui (ombohe hag̃ua pe tembi’u) ha napemomba’éi pe tembiapoukapy imba’eguasuvéva, ni pe justícia, ni poriahuvereko, ni jerovia; ko’ã mba’e ningo pejapova’erãmo’ã peheja’ỹre umíva.

24Peẽ sãmbyhyhára hesatũva. Pemboguáva ñati’ũ ha pemokõ pe caméllo (ojogua guéipe).

25Angái, peẽ kuatia haihára ha fariseokuéra rova mokõi pemopotĩ porãva ijapéguio pende váso ha pene mba’yru, ha pende ryepy gotýo katu penerenyhẽ monda ha teko ñañágui.

26Peẽ fariséo hesatũva, pemopotĩ raẽ pende py’apy, ipotĩ hag̃ua avei pende ape (pene rembiapo).

27Angái, peẽ kuatia haihára ha peẽ fariseokuéra rova mokõi. Pejoguaite umi omanova’ekue oñeñotỹha renda morotĩ porãvape, okáguio iporãite ha hyepýpe katu henyhẽ te’õngue ha kanguekue ha opaite mba’e ky’a inetévagui.

28Péicha avei peẽ, okáguio peẽ peiko heko potĩvaicha ha pende ryepýpe katu penerenyhẽ tova mokõi ha teko ñañágui.

29Angái, peẽ kuatia haihára ha peẽ fariseokuéra rova mokõi. Pemopu’ãgui umi proféta sepultúra ha pembojeguakapa umi heko porãva oñeñotỹ haguépe,

30ha peje: Roikove rire umi ñande rukuéra árape noroipytyvõiva’erãmo’ã ichupekuéra oñohẽ hag̃ua umi proféta ruguy.

31Ha péicha ningo peẽ voi pehechauka peẽha voi umi proféta jukahare ñemoñarenguerateetéva.

32Peẽ voi pemyenyhẽ pende rukuéra reko vai.

33Peẽ mbói ha mbói ñemoñarenguéra. Mba’éichapa pekañýta pe jehavira aña retã meguágui.

34Upévare pema’ẽ, che amboúta peẽme profetakuéra, kuimba’e arandukuéra ha mbo’ehára heko peguáva, ha umíva apytépe oĩta umi peẽ pejukátava ha pemosãingótava kurusu rehe, ha peinupãta pende Ruete rogayguakuérape ha pemuñáta ichupekuéra peteĩ távagui ambue táva peve.

35Upéicha ho’apáta pendeári umi heko potĩva ruguy oñeñohẽva’ekue ko yvy ári, pe heko potĩva Abel ruguy guive pe Zacarías, Berequías ra’y peve, pejukava’ekue pe kuave’ẽmby renda ha Ñanderuete rogaguasu pa’ũme.

36Añetehápe Che ha’e peẽme, ko’ã mba’e ko’ãva oupava’erã ko’ã ñemoñarenguéra ári.

Hesu ojahe’o Jerusalen rehe

37Jerusalen, Jerusalen, rejukáva nde profetakuérape, ha rejukáva itápe umi oñemboúva ne rendápe. Hetaite jevy ningo ambyatysékuri nde ra’ykuérape ku ryguasu kuru ombyaty háicha imembykuéra ipepo guýpe, peẽ katu ndapeipotái.

38Peikuaa porãke pende róga ojehejataha taperéicha.

39Ko’ag̃aite guivéma Che ha’e peẽme ndapecherechamo’ãveimaha ág̃a pejeha ára peve: Toñemomba’eguasu katu pe oúva Ñanderuete rérape.