Rut 1 - Biblia en Guaraní - ?anderuete ?e’? Por? 2015

1Umi mbojovakehára oisãmbyhy aja Israélpe, peteĩ ñembyahýi ndetuicháva ou Israel retãme. Ha peteĩ karai, Belen Juda pegua, oho oiko hag̃ua Moab retãme, hembireko ha ita’ýra mokõi ndive.

2Pe karai réra Elimelec ha hembireko réra Noemi, ita’yrakuéra réra Mahlon ha Quilion, umíva ningo Efrataygua, Belen Juda pegua. Ha og̃uahẽ hikuái Moab retãme, ha opyta upépe.

3Ha Elimelec, Noemi ména, omano upépe, Noemi katu imemby mokõi ndive opyta Moab retãme.

4Umíva omenda Moabgua kuña rehe, Orfa héra peteĩ ha ambue Rut, ha oiko hikuái upépe 10 año rupi.

5Ha omano avei Noemi memby mokõivéva, Mahlon ha Quilion, ha Noemi opyta ha’eño, imemby’ỹre ha imena’ỹre.

6Upémaramo ha’e opu’ã, imembyre rembirekokuérakue ndive ojevy hag̃ua Israel retãme, ohendúgui Ñanderuetépe ohovasa jevymaha Israélpe, ome’ẽvo ichupekuéra hembi’urã.

7Ha Noemi osẽ oiko haguégui ha hendive oho imembyre rembirekokuérakue, ha ojevy hikuái Juda retãme.

8Ha Noemi he’i umi imembyre rembirekokuérape: Tapeho, pejevy pende sy rogakuérape, Ñanderuetépe tapenderovasa ha tomyengovia pe mborayhu peẽ peme’ẽva’ekue chéve ha che membykuérape.

9Ñanderuete tome’ẽ peẽme pytu’u pene menarã rógape. Upéi ohetũ ichupekuéra, ha ha’ekuéra ojahe’o soro.

10Ha he’i ichupe: Añetehápe, ore rohose nendive ne retãme.

11Ha Noemi he’i: Pejevýna, che membykuéra, ma’erãpa pehóta chendive. Aguereko piko che ryépe pene menarã.

12Pejevýna, che membykuéra, tapejevy, che ningo cheg̃uaig̃uíma amenda jevy hag̃ua. Ha ha’e ramo jepe: Arekoha esperánza, ko pyharépe jepe ajohu ramo che menarã, ha chememby jevýrõ jepe,

13peẽ piko peha’arõta okakuaapa peve. Pepytáta piko pemenda’ỹ rehe pehayhúgui ichupekuéra, tove che membykuéra, che ningo ajepy’apy tuicha penderehe, Ñanderuete po oja pohýi cherehe.

14Ha ha’ekuéra ojahe’o soro jevy, ha Orfa ohetũ Noemíme ha ojevy, Rut katu opyta hendive.

15Upérõ Noemi he’i ichupe: Péina nde rovaja ojevýma hetãme ha ijarakuérape, ejevýna nde avei hapykuéri.

16Rut ombohovái ichupe: Anivéna rejerure chéve roheja ha ajei hag̃ua nde ykéregui, che ahava’erã nde rehohápe, ha aikova’erã nde reikohápe. Ne retã che retãrã ha nde Jára che Jararã avei.

17Nde remanoháme amanova’erã che, ha upépe cheñotỹva’erã avei, Ñanderuetépe tachemaldeci che apoíta ramo ndehegui, pe mano añoite ningo ñandepe’ava’erã ojuehegui.

18Noemi ohecháma ramo, ohoseha katuete hendive, okirirĩ.

19Oje’ói mokõivéva og̃uahẽ meve Belénpe, ha oike rire Belénpe mayma upepeguáva ombyasy ichupekuéra ha he’i: Péva piko ndaha’éi Noemi.

20Ha ha’e ombohovái jepi ichupekuéra: Anive chembohéra Noemi (he’ise ojehayhúva), pejénte Mára (he’ise iróva), Ñanderuete chemyenyhẽgui ñembyasy iróvagui.

21Heta mba’e reheve asẽ, Ñanderuete katu chembojevy po nandíre, mba’érepa chembohéra Noemi, Ñanderuete ipochy chendive ha pe Ipu’akapáva chembohasa asy.

22Péicha Noemi ha Rut, peteĩ Moabgua, imembyre rembirekokue ndive, ojevy Moab retãgui ha og̃uahẽ Belénpe, oñepyrũvo oñemono’õ pe cebáda (ojogua trígope).