Zacarías 14 - Biblia en Guaraní - ?anderuete ?e’? Por? 2015

Jerusalen ha ambue tetãnguéra

1Pehendu porãke, Ñanderuete ára outahína, ha pene mbytépe oñemboja’ova’erã umi mba’erepy ñorãirõ megua.

2Ha Che ambyatypáta tetãnguéra maymávape ojeity hag̃ua Jerusalen ári, ha pe táva ho’ava’erã ipoguýpe, hogakuéragui oñemondapava’erã, ha ikuñakuérape oñerãirõva’erã, ha pe tavaygua mbytere ohopava’erã jepokuapyhápe ha ambue tetã rembyre opytava’erã itavapýpe.

3Upéramo Ñanderuete osẽta oñorãirõ hag̃ua umi tetãnguéra ndive, oñeñorãirõ háicha ñorãirõguasuha árape.

4Ha upe ára upévape omoĩta ipy Olívo cérro ári, oĩva Jerusalen renondépe kuarahyresẽ gotýo, ha pe Olívo cérro oñemboja’ova’erã mbyte rupi, kuarahyresẽ guio kuarahyreike gotýo, ha oikóta peteĩ cérro pa’ũ ndetuicháva, ha upe cérro mbytere oñemboykéta nórte gotýo, ha ambue imbytere omýita sur gotýo.

5Ha peẽ pekañy joaitéta upe cérro pa’ũ rupi, peg̃uahẽ meve Azálpe, peẽ pekañýta pende ypykuéra okañy haguéicha Juda retã ruvicha Uzías árape pe yvy ryrýigui, ha Ñanderuete, Ñandejára ouva’erã ha hendive opaite heko potĩva.

6Ha ojehuva’erã upe ára upévape ndaiporimo’ãi ára resakã, araro’y ni heláda.

7Upe ára upévape Ñanderuetémante oikuaáta, ára ha pyhare opava’erã, tesape (Ñanderuetégui) katu og̃uahẽta ohesape hag̃ua ka’aruetépe.

8Ha ojehuva’erã avei upe árape, Jerusaléngui osẽta y oikovéva, ha péva oñemboja’óta avei, ha peteĩ imbytere osyrýta (Mar Muérto) kuarahyresẽha gotýo, ha ambue imbytere osyrýta pe yguasu (Mar Mediterráneo) kuarahyreikeha gotýo, arahaku ha araro’ýpe osyryva’erã (ndahypamo’ãi).

9Upérõ Ñanderuete oikóta tetã ruvichaguasuete ramo ko yvy tuichakuépe. Upe ára upévape peteĩ Jára ramónte oikóta, Jahve, Ñanderuete, ha ndaiporimo’ãi ambue Jára réra.

10Upe tetãpy tuichakuégui oikóta peteĩ ñuguasu, peteĩ yvype Geba guive Rimon peve, opytáva Jerusalen sur gotýo, Jerusalen oñembotuicháta ha ojeikóta ipype Benjamin rokẽguasu guive Hakãmby rokẽ meve, ha pe Hananeel róga yvate guive tetã ruvicha parral’a ojehykue’oha peve.

11Ha oikova’erã hikuái ipype ha araka’eve ndaiporimo’ãvéima maldicion, ha Jerusalénpe ojeikóta kyhyje’ỹre.

12Koatahína pe jehavira Ñanderuete omboútava umi tetã ojeitývape Jerusalen ári: Ho’okuéra itujúta oñembo’y jave gueteri, ha itujupáta hesakuéra, ikũnguéra ha ijuru.

13Ha upe ára upévape Ñanderuete tuichaite omondýita ichupekuéra, ha peteĩteĩva ohupíta ipo hapicha rehe, oñorãirõmbáta oñondive hikuái.

14Ha Judaygua avei oñorãirõta Jerusalénpe. Oñembyatyva’erã tetã ambueygua mba’erepyeta: Óro, pláta ha hetaiterei ao iporãva.

15Oñehundipáta avei ikavaju, imburika, icaméllo, ibúrro ha hymbakuéra oĩva guive pe ñorãirõhára atyguasu apytépe.

16Ha umi tetãygua hembýva pe ñorãirõguasúgui og̃uahẽta Jerusalénpe, ou joava’erã opaite áño omomba’eguasu hag̃ua Jerusalen ruvichaguasuetépe, ángel atykuéra Járape, omboarete hag̃ua pe arete róga yvyra rakãguiguáva (enramáda).

17Ha oĩ ramo umi tetã apytégui upe og̃uahẽ’ỹva Jerusalénpe omomba’eguasu hag̃ua Ñanderuete ha hetã ruvichaguasuetépe, upérõ ndokymo’ãvéi ijyvýpe.

18Ha Egiptoyguakuéra ndoúi ramo Jerusalénpe, Ñanderuete ohaviráta ichupekuéra, ohavira háicha ambue tetãnguéra ou’ỹva omboarete hag̃ua pe arete róga yvyra rakãngueguýpe.

19Kóvata hína pe Egípto jehavirarã ha avei opaite ambue tetãnguéra ndoúi ramo omboarete hag̃ua pe arete róga yvyra rakãngueguýpe (Jerusalénpe).

20Upe ára upévape ojehaíta umi kavaju campanílla rehe jepe: Oñemboykéma Ñanderuetépe g̃uarã, ha umi japepo (ólla) Ñanderuete róga pegua jepe oñemboyke avei Ñanderuetépe g̃uarã oñemboyke háicha umi ña’ẽmbe ojeporúva kuave’ẽmby rendápe g̃uarã.

21Ha opaite japepo oĩva guive Jerusalen ha Judápe oñemboykepáta ángel atykuéra Járape g̃uarã, ha umi oikuave’ẽséva guive ouva’erã ojapyhy umi japepo ha omomimói ipype hikuái, ha upe ára upévape ndaiporimo’ãvéima avave oñemúva ángel atykuéra Jára rogaguasu porãitépe.