Salmokuéra 16 - Biblia en Guaraní - ?anderuete ?e’? Por? 2015

Tekove rape - David Sálmo

1Eñangarekomína cherehe, Nde, che Ruete, ajeroviágui nderehe.

2Che ánga he’íma Ñanderuetépe: Nde, che Jára, ndeichagua ndaipóri.

3Umi heko potĩvape ha oikóva ijyvyetépe che ha’e: Ko’ãva ningo umi heko porãva chembovy’áva.

4Umi omomba’eguasúva ambue jára gua’úpe ohasa asyetéta. Che ndaikuave’ẽséi ikuave’ẽmby tuguy peguáva ha che rembekuéra nde’imo’ãi ijára gua’u réra.

5Ñanderuete ome’ẽ chéve che mba’e ha che váso (iporiahuvereko). Nde reñangareko porã che rekove rehe.

6Umi mba’e ho’a chéve g̃uarã po’a jeporavo rupive chembovy’aite ha iporãite pe yvy cherupitýma che mba’erã ramo.

7Amomba’eguasu Ñanderuetépe, cherekombo’e porã haguére; ha pyharekue jepeve che py’apyñe’ẽme cheavisa (amboete hag̃ua ichupe).

8Ñanderuete tapia oĩ che resa renondépe; ha Ha’e oĩgui che akatúape nda’amo’ãi.

9Upévagui che py’a hory ha che pytu ovy’a, Ha’e oñangareko porã avei che retére.

10Nderehejamo’ãi che ánga omanómava retãme, ha nderehejamo’ãi umi ojeroviáva nderehe oñehundi hag̃ua.

11Rehechaukáta chéve pe tekove rape, nde ypýpe oĩ vy’a añetetéva, ha péva ndopamo’ãi araka’eve.