Hebreoyguakuérape 2 - Biblia en Guaraní - ?anderuete ?e’? Por? 2015

Ñaneñe’ẽrenduva’erã

1Upévare jajapysaka porãva’erã umi mba’e ñahenduva’ekue rehe ani hag̃ua japia tape porãgui.

2Umi mba’e yvága rembiguái he’iva’ekue ojejapova’erã ha umi iñe’ẽrendu’ỹva ha ojapo’ỹva, ojehaviráta (ojecastigáta) hekoitépe.

3Ha mba’éichapa ñakañýta (pe jehavirágui) ñande nañamomba’éirõ ha ñamboykérõ pe salvacion, Hesu Crísto raẽ voi omyasãiva’ekue pe salvacion rape, ha Hesu Crísto rire ambue techahare hekoite peguáva (apostolkuéra) ombohasa jevy iñe’ẽ ñandéve g̃uarã.

4Ha Ñanderuete omoañeteva’ekue iñe’ẽ techapyrã, mba’eguasuete (milágro) ipu’aka rupi. Ñanderuete ome’ẽ avei pe Pytu Porãmbáva oimeraẽvape, Ha’e oipota haichaite.

Hesu Crísto ou ñandesalva

hag̃ua

5Ñanderuete ningo nomoĩriva’ekue yvága rembiguaikuéra (angelkuéra) poguýpe upe múndo pyahu ouva’erãva, ñande ñañemongetáva rehe.

6Pe ñembo’e purahéipe, he’i voi: Mba’e piko pe kuimba’e, Nde nemandu’a hag̃ua hese, térã pe Yvyarigua Ra’y Nde rejepy’apy hag̃ua hese, (Salmokuéra 8,5-7).

7Rejapo ichupe michĩve yvága rembiguaikuéragui sapy’ami g̃uarãnte, uperire katu rembotuicha ha reñe’ẽ porã hese.

8Opaite mba’e nde remoĩ ipy guýpe. Oñemoĩvo opaite mba’e ipy guýpe, mba’eve ndaipóri oñembopoguy’ỹva’ekue henondépe. Ko’ág̃a katu ñande ndajahechái gueteri oñemoĩmbáma hague opaite mba’e ipo guýpe.

9Opáichavo jahecha Hesúpe, Ñanderuete omomichĩve sapy’ami g̃uarãnte ijyvága rembiguaikuéragui, Ha’e omano hag̃ua, ko’ág̃a katu oñembotuicha ha oñe’ẽ porãma hese; imano rupi, Ñanderuete oiporiahuverekógui opavave tetayguakuérape.

10Ñanderuetépe g̃uarã ojejapo opaite mba’e ha Ha’érupi opaite mba’e oikohína avei. Ñanderuete ogueru heta ta’ýra ha tajýra isalvacion rapépe Hesu Crísto ñemano rupi. Hesu Crísto ohasa asyetégui hekovépe heko oĩ porãmba hag̃ua.

11Hesu Crístope g̃uarã oporomboheko porã ha umi oñemboheko porãmava oguereko hag̃ua Itúva peteĩnte, upévare Hesu notĩri, ohenói hag̃ua ichupekuéra che hermanokuéra.

12Ñanderuete ñe’ẽ he’i voi: Amombe’úta nde réra che hermanokuérape, Che romomba’eguasuve umi oñehenoiva’ekue ijatyguasuhápe (he’ise ijiglésiape), (Salmokuéra 22,23),

13ha he’i avei: Che ajeroviáta hese; (Isaías 8,17) ha he’i avei: Ápe Che aĩ che ra’ykuéra ndive, Ñanderuete voi ome’ẽmava’ekue chéve, (Isaías 8,18).

14Ita’yrakuéra ho’o ha huguýgui, oñeme’ẽ avei Hesu Crístope to’o ha tuguy, imano rupi Ha’e ombopoguy hag̃ua Satanáme, pe ñemano jarakuépe,

15upéicha Hesu Crísto osalva umi okyhyjévape ñemanógui ha oikova’ekue hembiguái ramo hekove pukukue aja.

16Hesu Crísto noipytyvõi yvága rembiguaikuérape, Abraham ñemoñarenguérape oipytyvõ uvei.

17Upévare Hesu ojogua raẽva’erã opaite mba’épe iñermanokuérape ikatu hag̃uáicha oiko ichugui pa’iguasu añeteguáva ha oporoporiahuverekóva, ha oipe’a hag̃ua tetãyguakuéra angaipa imano rupi.

18Ha’e ohasa asýgui ha ojepy’ara’ã haguére ikatu oipytyvõ umi ojepy’ara’ãvape avei.