Matéo 15 - Biblia en Guaraní - ?anderuete ?e’? Por? 2015

Umi mba’e ñanemongy’áva

1Upéramo fariséo ha kuatia haiharakuéra ou Jerusaléngui Hesu rendápe ha oporandu hikuái ichupe he’ívo:

2Mba’érehepa ne remimbo’ekuéra ndojapói umi temimbo’epy karai ancianokuérape ombo’éva yma guive. Ndojepohéiri ningo hikuái okaru hag̃ua.

3Ha ha’e he’i ichupekuéra: Ha mba’érehepa peẽ avei ndapejapói Ñanderuete rembiapoukapy pende jepokuaa rehehápe.

4Ñanderuete ningo he’iva’ekue: Peguerekóke mba’e ramo pende ru ha pende sýpe, (Éxodo 20,12), ha upe omaldecíva itúva térã isýpe katuete ojejukava’erã, (Éxodo 21,17).

5Peẽ katu peje: Upe he’íva itúva térã isýpe: Ame’ẽma Ñanderuetépe g̃uarã, kuave’ẽmby ramo, ne mba’e rãngue,

6upéva rupi natekotevẽi omomba’eve itúva térã isýpe. Péicha peẽ pemboyke Ñanderuete rembiapoukapy ha hendaguépe pemoĩ pende jepokuaakuéra.

7Peẽ tova mokõi. Hekoitépe Isaías oñe’ẽ penderehe, he’i ramoguare:

8Ko’ã tetãygua chemomba’ete ijurúpente ha ipy’apykuéra katu oĩ mombyry chehegui.

9Chemomba’eguasu rei ningo hikuái, ombo’évo hekokuéra yvyarigua rembiapoukapy rei rehe.

10Ha ohenói hendápe hetãyguakuérape ha he’i ichupekuéra: Pejapysaka porãke ha peikuaa mba’épa he’ise:

11Umi mba’e oikéva ñande jurúpe nañanemongy’ái, umi ñe’ẽ ñande jurúgui osẽva katu ñanemongy’a.

12Upéramo hemimbo’ekuéra oñemboja hendápe ha oporandu Hesúpe: Reikuaa piko umi fariseokuéra ipochy hague ohendúvo ne ñe’ẽ.

13Ha Hesu he’i: Umi yvyra che Ruete noñotỹiva’ekue guive, oñemondorova’erã.

14Peheja ichupekuéra, ha’ekuéra hesatũ ha upeichavérõ omboguata ambue hesatũva, pe hesatũva omboguata ramo ambue hesatũvape, mokõivéva ho’ava’erã yvykuápe.

15Ha Pédro he’i ichupe: Eikuaaukána oréve mba’épa he’ise ko ñe’ẽ mbojoja kóva.

16Ha Hesu ombohovái: Peẽ avei piko ne’ĩra gueteri pentende mba’eve.

17Ndapeikuaái piko opaite mba’e oikéva ñande juru rupi ohoha ñande ryépe, ha upéi ojeityha ñanandýpe (báñope).

18Ha umi ñe’ẽ osẽva ñande jurúgui katu osẽ ñande py’apýgui, ha upevahína upe omongy’áva yvyariguakuérape.

19Ñande py’apýgui ningo osẽ pensamiénto vai, jeporojuka, mendare mbyairã, teko tie’ỹ, monda, ñe’ẽvai rei ñande rapicha rehe, opaichagua ambue ñe’ẽvai.

20Ko’ã mba’e ko’ãva ningo omongy’áva yvyariguakuérape; ha ojekaru ramo ojejepohei’ỹre katu nomongy’áiri avavépe.

Peteĩ kuña Canaangua ojerovia

21Hesu oho rire upégui, oho Tíro ha Sidon gotýo.

22Ha peteĩ kuñakarai Canaangua, oúva upéguio, osapukái ha he’i ichupe: Nde, che Jára, David Ra’y, cheporiahuverekomína, peteĩ mba’epochy ombohasyete che membykuñáme.

23Hesu katu nde’íri ichupe mba’eve, ha hemimbo’ekuéra oñembojávo hendápe ojerure asy ichupe, he’ívo: Eréna ichupe toho, osapukái ningo ñande rapykuéri (ha ñanemy’angekõi).

24Ha Hesu he’i: Che Ruete chembou aheka hag̃ua Israel ovecha okañyva’ekuépente.

25Pe kuñakarai katu ou ha oñesũ henondépe, ha he’i: Che Jára, chepytyvõmína.

26Ha Hesu ombohováivo he’i ichupe: Naiporãi ningo jajapyhy ta’yrakuéra pan ha jaity jagua ra’ýpe.

27Ha pe kuña katu he’i ichupe: Upeichaite che Jára, upeichavéramo jepe, umi jagua ra’y ho’u umi pan ku’ikuemimi ho’áva ijarakuéra meságui.

28Upévo Hesu he’i ichupe: Nde kuñakarai, rejerovia porãiteháre, toiko pe mba’e rejerurevéva. Ha upete guive imembykuña okuera.

Hesu omonguera heta hasývape

29Ha Hesu ohóvo upégui, og̃uahẽ Galiléa yguasu ypýpe; ha ojupi peteĩ cérrope ha oguapy upépe.

30Ha heta hetãyguakuéra ou hendápe oguerúvo hetyma parĩva, hesatũva, iñe’ẽngúva ha opaichagua ambue hasýva, ha omoĩ hikuái Hesu renondépe, ha Ha’e omonguerapa ichupekuéra.

31Ha umi tetãygua ijatýva ohechávo umi iñe’ẽngúva oñe’ẽ, umi iparĩva (oguatakuaa’ỹva) okuera, umi ikarẽva oguata porã, umi hesatũva ohecha, omomba’eguasuete hikuái Israel Járape.

Hesu omongaru 4000-pe

32Ha Hesu ohenói hemimbo’ekuérape ha he’i: Aiporiahuverekoite ningo ko’ã tetãyguakuérape, mbohapy árama ningo opyta hikuái chendive, ha nahembi’úi hikuái, ha namondoséi okaru’ỹre, ani hag̃ua ipy’amano hikuái tapére.

33Hemimbo’ekuéra katu he’i ichupe: Mamo piko ko desiértope jajohúta pan ñamohyg̃uatã hag̃ua ñane retãyguaitápe.

34Ha Hesu oporandu ichupekuéra: Mbovy pan piko peguereko. Ha ha’ekuéra he’i: 7 ha mbovymi pira’i.

35Ha Hesu omboguapyukapa hetãyguakuérape yvýpe.

36Ha ojapyhy ipópe umi 7 pan ha umi pira’i, ha oagradece rire Ñanderuetépe, oipehẽ’ã ha ome’ẽ hemimbo’ekuérape, ha’ekuéra ome’ẽ hag̃ua hetãyguakuérape.

37Okarupa ha hyg̃uatãmba joaite hikuái; ha hembývagui oñemono’õ jevy 7 ajaka renyhẽ.

38Umi okaruva’ekue ningo oĩ 4.000 kuimba’e rupi, ojepapa’ỹre kuña ha mitãkuéra.

39Ha omondopa rire hetãyguakuérape, Hesu oike peteĩ bárcope, ha oho Magadan (Magdala) gotýo.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help