Josue 6 - Biblia en Guaraní - ?anderuete ?e’? Por? 2015

Jerico ho’a

1Ha Jerico táva oñemboty porãite Israel ñemoñarenguéra renondépe; ndaipóri oikéva ni osẽva.

2Ñanderuete katu he’i Josuépe: Ema’ẽ porã, Che amoĩma nde pópe Jerico ruvicha ha isoldadokuéra.

3Pende soldádo aty ojeréta Jerico rehe 6 ára, peteĩ jevy meme árape.

4Upejave 7 pa’i ogueraháta 7 turu ovecha ratĩguiguáva pe karameg̃ua renonderãme; ha pe ára 7-hápe pejeréta pe táva rehe 7 jevy, ha umi pa’i ombopuva’erã iturukuéra.

5Ha ombopu are vove pe turu ovecha ratĩguiguáva, mayma Israelgua osapukái hatãva’erã, ha pe táva korapy jere ho’áta; upévo mayma tetãygua oikéta Jericópe henonderã ryepy gotýo.

6Ha Josue ohenói pa’ikuérape ha he’i ichupekuéra: Pegueraháta pe karameg̃ua ñembopy’apeteĩ reheguáva, ha 7 pa’i togueraha turu ovecha ratĩguiguáva Ñanderuete karameg̃ua renonderãme.

7Ha he’ive hetãyguakuérape: Pehasa ha pejere pe táva rehe; ha pende soldádo iñorãirõ rembiporu reheve ohóta Ñanderuete karameg̃ua renonderãme.

8Ha Josue oñe’ẽmbávo hetãyguakuérape, umi 7 pa’i ogueraha 7 turu ovecha ratĩguiguáva ha oho Ñanderuete karameg̃ua renonderãme, ombopu joa ituru; ha Ñanderuete karameg̃ua oho hapykuéri.

9Ha umi soldádo ikatupyryvéva iñorãirõ rembiporu reheve oho umi pa’i turu mbopuha renonderãme, ha ambue soldadokuéra oho pe karameg̃ua rapykuéri, oñembopu jave turukuéra.

10Ha Josue he’i hetãyguakuérape: Peẽ pekirirĩva’erã ha noñehenduiva’erã pene ñe’ẽ, nosẽiva’erã ñe’ẽ pende jurúgui, ág̃a che ha’e ramo peẽme: Pesapukái, upévo ae pesapukái hatãta.

11Ha ha’e ombojereuka Ñanderuete karameg̃ua pe táva jerekue rehe, ha upéi oupa jevy hikuái hekoha oĩháme, ha upépe ohasa hikuái pe pyharekue.

12Ha Josue opu’ã ambue pyhareve, ha pa’ikuéra ojapyhy Ñanderuete karameg̃ua.

13Ha umi 7 pa’i oho ituru ovecha ratĩguiguáva reheve pe karameg̃ua renondépe, ha oguatahápe ombopuhína ituru ha umi soldádo ikatupyryvéva iñorãirõ rembiporu reheve oho henonderãme, ha ambue soldádo aty oho pe karameg̃ua rapykuéri, umi turu ipu aja oho hikuái.

14Ha upéicha ojere jevy hikuái pe táva rehe pe ára mokõiháme, ha ou jevy hikuái hekoha oĩháme; ha upéicha ojapo 6 ára javeve.

15Pe ára 7-hápe katu opu’ã hikuái ko’ẽtĩ jave ha peichaite ojere jevy jey pe táva rehe 7 jevy (véces); ko árapente ojere hikuái Jerico táva rehe 7 jevy.

16Ha ojerévo hikuái 7 jevy Jerico rehe ha pa’ikuéra ombopu areve iturukuéra, Josue he’i hetãyguakuérape: Pesapukái, Ñanderuete omoĩmagui pende pópe ko táva kóva.

17Pehundipaite itavayguápe imba’e heta reheve, Ñanderuete omaldeci haguére; Rahab, pe kuña heko vaívamante oikovéta, ha mayma oĩva guive hendive hógape, omokañýgui Israel kuimba’e oma’ẽ ñemívape.

18Ha peñangarekóke pendejehe, ani pepokótei mba’eve oñemaldecipyréva rehe ani hag̃ua pe maldicion ho’a Israel rekoha ári ha ñanemyangekõi avei.

19Mayma pláta, óro, tembiporu brónce ha hiérro peguáva pemboyke Ñanderuetépe g̃uarã, ha pegueru Ñanderuete mba’erepyeta apytépe.

20Ha upévo umi tetãygua osapukái, pa’ikuéra ombopu aja iturukuéra; ha hetãyguakuéra ohendúvo pe turu pu, osapukái hatãiterei, ha pe táva tápia yvate ho’apa. Upéi umi tetãygua oike pe távape, peteĩteĩva henonderãite gotýo, ha ombopoguy hikuái Jerico.

21Ikyse puku rãimbépe Israelguakuéra ohundipa oĩva guive pe tavapýpe: Kuimba’e ha kuñakuérape, mitãrusu ha tujakuérape, gueikuéra, ovecha ha burrokuéra jepe nahembýi.

22Josue he’íkuri umi mokõi kuimba’e ohova’ekuépe omaña ñemi hag̃ua pe yvýre: Peike pe kuña reko vaíva rendápe, ha peguenohẽ hógagui pe kuña ha opaite mba’e, imba’éva guive, peñe’ẽme’ẽ haguéicha.

23Ha umi mokõi kuimba’e oike ha oguenohẽ Rahab rógagui: Rahab, itúva, isy, ikyvykuéra ha ikypy’ykuérape, opaite imba’e reheve; ha ogueru hikuái mayma hogayguakuérape, Israel rekoha okápe.

24Ha tatápe ombokusugue hikuái pe táva, ha opaite mba’e ipype oĩva guive; omboykénte pláta, óro, tembiporu brónce ha hierroguigua, ha oñongatu Ñanderuete róga mba’erepy oĩháme.

25Ha Josue osalva Rahábpe, pe kuña heko vaíva, ha itúva rogayguakuérape, ha opaite imba’e reheve; ha pe kuña oiko Israelguakuéra apytépe ko ára peve, omokañy haguére umi mokõi kuimba’e Josue omondova’ekue omaña ñemi hag̃ua Jericóre.

26Umi árape Josue oñe’ẽme’ẽ ha he’i: Toñemaldeci Ñanderuete renondépe pe kuimba’épe omyatyrõ jevýtava ko Jerico táva, ita’ýra tenonde tomano omopu’ãvo pe ita peteĩha, ha ita’ýra imitãvéva tomano omohenda ramo hokẽnguéra, (1 Réyes 16,34).

27Ñanderuete oĩkuri Josue ndive ha héra oñemoherakuã porã opaite tetã rupi.