Apostolkuéra 3 - Biblia en Guaraní - ?anderuete ?e’? Por? 2015

Pédro ha Juan omonguera, Hesu Crísto rérape, peteĩ kuimba’e ikarẽvape

1Pédro ha Juan oho ka’aru las 3 hóra rupi, ñembo’e hórape, Ñanderuete rogaguasúpe.

2Ha peteĩ kuimba’e ikarẽva isy rye guivéma voi ojegueru meme árape Ñanderuete rogaguasu Rokẽ Porãme ojerure hag̃ua pirapire umi oikévape Ñanderuete rogaguasúpe.

3Upe kuimba’e upéva ohechávo Pédro ha Juánpe oike jave Ñanderuete rogaguasúpe ojerure avei ichupekuéra pirapire rehe.

4Pédro ha Juan katu oma’ẽ porã hese ha he’i hikuái ichupe: Ema’ẽ porã orerehe.

5Upevove ha’e oma’ẽ hesekuéra ha oha’ãrõ ohupity hag̃ua ichuguikuéra pirapire.

6Pédro katu he’i ichupe: Pláta ha óro ndaguerekói, pe aguerekóva katu ame’ẽta ndéve: Hesu Crísto, Nazaretgua rérape, eguata.

7Ha Pédro ombohasa ipo akatúa pe ikarẽvape ha omopu’ã ichupe, ha upevove ipy ha ipy ñu’ãnguéra imbaretepa jevy.

8Ha opu’ãvo oike Pédro ha Juan ndive Ñanderuete rogaguasúpe omomba’eguasu hag̃ua Ñanderuetépe.

9Ha opaite hetãyguakuéra ohecháva guive ichupe oguataha omomba’eguasu Ñanderuetépe.

10Oikuaa porã hikuái ha’eha pe oguapyva’ekue Ñanderuete róga Rokẽ Porãme ha ojerurémi pirapire, upérõ ohecharamo joaite ha ipy’andýi hikuái umi mba’e hese oikova’ekue rehe.

Pédro omoherakuã Hesu Crístope Ñanderuete rogaguasu ykére

11Pe ikarẽva’ekue omoirũ Pédro ha Juánpe heta hetãygua ipy’andýiva reheve ha oho hikuái Ñanderuete rogaguasu korapy tuichávape, pe tenda hérava Salomon rogaguyguasúpe, (oĩva Ñanderuete rogaguasu yképe kuarahyresẽ gotýo).

12Ha Pédro ohechávo pe atyguasu, he’i ichupekuéra: Peẽ, che retãyguakuéra, mba’érehe piko pende py’andyipa joa ko’ã mba’e rehe. Térã mba’érehe piko pejesareko orerehe ore romboguatárõ guáicha ko kuimba’e kóvape ore pu’aka térã ore reko porã rupi.

13Abraham, Isaac ha Jacóbo Jára, ore rukuéra Jára, Ñanderuete voi, ombotuicha hembiguái Hesúpe, peẽ pemoĩva’ekue Piláto pópe pembotove (penega) hag̃ua ichupe Piláto renondépe ha’e omosãsose ramojepe Hesúpe.

14Peẽ katu pemboyke pe Heko Porãvape ha Heko peguávape, ha pejerure Hesu rendaguépe ojepoi hag̃ua peẽme Barrabas, peteĩ jukaháragui,

15ha pejuka pe tekove Járape, Ñanderuete katu omoingove jevy ichupe omanova’ekue apytégui, ha ore ningo opaite ko’ã mba’e rechaharekuéra.

16Ha ore rojeroviaroína ko Hesu Crísto rehe, Ha’e ningo omonguera ko ikarẽvape, peẽ peikuaáva pende resa renondépe, ndaoréi.

17Ha ko’ág̃a, che ryvykuéra che aikuaa peẽ pejapo hague ko’ã mba’e ndapeikuaa’ỹguínte, péicha avei pende ruvichakuéra.

18Ñanderuete katu oipota opaite ko’ã mba’e ojehu, Ha’e voi oikuaaukáma avei yma guive iprofetakuéra rupi: Crísto ohasa asytaha,

19upévare peñembyasy pejapo vai haguére ha pejevy Ñanderuete rendápe, ojepe’a hag̃ua pene rembiapo vai,

20ikatu hag̃uáicha og̃uahẽ umi vy’a arakuéra Ñanderuete resa renondégui ha Ha’e tombou pene rendápe pe Ha’e oiporavomava’ekue, Hesu Crístope.

21Ko’ág̃a katu Hesu opytava’erã yvágape, Ñanderuete rekohápe, og̃uahẽ meve umi ára Ñanderuete omyatyrõmba jevy hag̃ua opaite mba’e, Ha’e he’i haguéicha iproféta heko potĩva rupi umi ára atyguasu ymaguare guive (Matéo 17,11).

22Añetehápe Moises he’iva’ekue: Ñanderuete omopu’ãva’erã peẽme peteĩ proféta cheichagua pende ryvykuéra apytégui, pehendúke ichupe opaite ñe’ẽ Ha’e he’ítava guive peẽme (Deuteronómio 18,15).

23Peikuaa porãke: Ojehuva’erã katu opaite iñe’ẽrendu’ỹva pe proféta pévape, ojehapo’ova’erã hetãyguakuéra apytégui.

24Opaite proféta Samuel ára guive ha opaite uperireguáva oñe’ẽ ko ára kóva rehe.

25Peẽ ningo profetakuéra ra’y, ha Ñanderuete oñembopy’apeteĩ pende rukuéra ndive, ha Ha’e he’i Abrahámpe: Ne ñemoñarenguéra rupi opaite tetã oĩva guive yvy apére ojehovasava’erã.

26Peẽme g̃uarã raẽ katu Ñanderuete omopu’ãva’ekue Ita’ýrape, peẽ pejehovasa hag̃ua Ha’érupi, pejei hag̃ua pende rape vaígui ha pende reko vaígui (Matéo 1,21)