Provérbios 4 - Biblia en Guaraní - ?anderuete ?e’? Por? 2015

Pe túva oavisa ita’ýrape ojapo hag̃ua hekombo’ekuéra

1Che ra’ykuéra, pehendúke pende ru rekombo’e, ha pejapysaka porã hese pehupity hag̃ua akãguapy reko.

2Mbo’epy iporãva ame’ẽgui peẽme; ani peheja reítei che rembiapoukapy.

3Che mitã ramo che ru rógape, che sy oñangareko porã cherehe,

4che ru chembo’eva’ekue ha he’i: Che ra’y, eñongatu nde py’apýpe che ñe’ẽ, ejapo che rembiapoukapy nde reikove hag̃ua.

5Ehupitýke arandu ha akãporã; aníke nderesarái ha aníke remboyke che ñe’ẽ che jurúgui osẽva’ekue.

6Aníke rehejátei pe arandu, ha’e ningo oñangarekova’erã nderehe; ehayhúke pe arandu, ha ha’e oñangarekova’erã nderehe.

7Opaite mba’e reguerekóva guive eme’ẽ arandu rehehápe, ehupitýke arandu; ha opaite ne mba’erepy eme’ẽ akãguapy rehehápe.

8Ejapyhýke pe arandu, ha ha’e nemopu’ãta; ha’e nembotuicháta reñañu’ã ramo hese,

9jeguaka ramoguáicha oñemoĩta ne akã rehe; jeguaka akã oroguiguávaicha oñeme’ẽva’erã ndéve.

10Ehendúke che ra’y, ha ejapóke che ñe’ẽ, ha oñemboheta hetavéta ndéve umi áño reikove hag̃ua.

11Arandu rape rehe che romondose, tape po’i ikare’ỹva rehe che aipota nde reguata.

12Reguata ramo reikóvo hi’ári nandepysyrymo’ãi, ha reñani ramojepe nereñepysãngamo’ãi.

13Aníke repiátei che rekombo’égui, aníke umía reheja rei; ejapopa uvei hekoitépe, upévarupi reikovereína.

14Aníke reikétei umi tekove ñaña rape po’i rehe, ha aníke rehótei umi iñañáva rape rehe.

15Eñemomombyry hapégui, aníke rehasa hapére; eñemboyke uvei ichugui ha ehasánteke rehóvo.

16Ha’ekuéra ningo ndokéi ojapo peve mba’e ivaíva, ha oho ichuguikuéra topehýi oity peve peteĩme.

17Ho’u hikuái pan ñaña reko peguaréva, ha omboy’u hikuái víno mondapyréva.

18Ha umi heko potĩva rape po’i katu ha’ete ku ko’ẽju resakãicha, hesakã hesakãve ohóvo ko’ẽmbaite peve.

19Umi tekove ñaña rape ningo ku ypytũicha; ndoikuaái mba’eicharupípa oñepysãnga.

20Che ra’y, ejapysaka porãke che ñe’ẽ rehe; emoĩnge nde apysápe che ñe’ẽ.

21Aníke remboykétei nde resa renondégui, eñongatu uvei nde py’apy mbytépe.

22Umi ojohúva arandu oikoveva’erã, ha opytáta ichupe g̃uarã pohã ramo.

23Eñangareko porãve nde py’apy rehe opaite ambue mba’égui, ichugui heñóigui pe tekovete.

24Emboykéke ndejehegui juru tie’ỹ vai, ha emomombyry nde juru pe aña rekógui.

25Upéicha ramo nde resakuéra oma’ẽ porãta ne renonderãme ha nde ropepikuéra ohecha porãta oĩva guive nde resa renondépe.

26Ema’ẽ porãke nde pykuéra rape rehe, ani hag̃ua re’a karuguápe (tuju vaípe).

27Ani repiátei nde akatúa gotýo ni nde asu gotýo, emboyke nde py mba’evaígui.