Apostolkuéra 17 - Biblia en Guaraní - ?anderuete ?e’? Por? 2015

Oiko apañuãi Tesalónicape

1Páblo ha Sílas ohokuévo ohasa Anfípolis ha Apolónia rupi og̃uahẽ meve Tesalónicape, upépe oĩ avei peteĩ Ñanderuete róga, Judayguakuéra oñembyatyhápe.

2Ojepokuaa háicha, Páblo oho mbohapy sábado icultohápe ombo’e hag̃ua Ñanderuete ñe’ẽ,

3ha ombo’e ichupekuéra Hesu Crísto ohasa asy hague, ha omano rire Ha’e, Ñanderuete omoingove jevy ichupe. Ha pe Hesu che aikuaaukáva peẽme ha’e voi pe Crísto.

4Ha oĩmimi Judayguakuéra apytégui omoĩrũva Páblo ha Sílaspe, ojeroviágui Hesu Crísto rehe, ha heta Greciaygua omomba’eguasúva Ñanderuetépe oñepyrũ ojerovia avei Hesu Crísto rehe, ha péicha avei heta kuñakarai imba’e hetáva ojerovia Hesu Crísto rehe.

5Ambue Judayguakuéra oñeko’õi, ndaija’éi Páblo ha Sílas rembiapo rehe ipy’arasýgui (oenvidiágui) hikuái ichupekuéra, upévare ombyaty umi tekove vai oiko reíva pe táva plázape omboapañuãi hag̃ua umi tavayguakuérape, ha oñemoĩ hag̃ua hermanokuéra rehe. Ha oho hikuái Jason rógape Páblo ha Sílas piári, omoĩ hag̃ua umívape umi tekove ñaña pópe.

6Ndojohúigui Páblo ha Sílaspe Jason rógape, ombotyryry Jason ha hermanokuérape mburuvichakuéra rendápe ha he’i hikuái: Og̃uahẽ avei ñane rendápe umi omboapañuãiva tetãyguakuérape oparupiete.

7Ha Jason omog̃uahẽ umívape hógape, umía oñemoĩmba katu Róma ruvichaguasu rehe, he’ívo Hesu Crístonte ha’eha pe mburuvichaguasu añeteguáva.

8Ohendúvo péva, umi táva ruvicha ha hetãyguakuéra oñemondyipa,

9ha ndojohúigui mba’eve ohavira pohýi hag̃ua, Jason ome’ẽva’erã pirapire mburuvichakuérape opoi hag̃ua ichuguikuéra. (Ko pirapire kóva oñeme’ẽ jevyva’erã ijarateépe noñemoañetéi ramo pe oje’eva’ekue).

Páblo ha Sílas og̃uahẽ Beréape

10Ha hermanokuéra omondo Páblo ha Sílaspe pe pyhare pévape Beréape.

11Umi Bereaygua ipy’a porãve Tesalonicayguakuéragui, ha ojapysaka porã Páblo ha Sílas ñe’ẽ rehe, ha kyre’ỹme oipyguara (oitypeka) meme árape Ñanderuete kuatiañe’ẽme añetépa Páblo ha Sílas ñe’ẽ.

12Upérõ heta Judaygua ojerovia Hesu Crísto rehe, ha heta Greciaygua kuimba’e ha kuñakaraikuéra apytégui avei.

13Ha umi Judaygua oikóva Tesalónicape, oikuaa vove Páblo ha Sílas omyasãiha Hesu Crísto evangélio Beréape oho avei upépe omboapañuãi hag̃ua umi tavaygua Páblo ha Sílas rehe.

14Upémaramo Beréa pegua hermanokuéra pya’e omondo Páblope yguasu rembe’y peve, Sílas ha Timotéo katu opyta Beréape.

15Ha umi hermáno omoirũva Páblope oho hendive Aténas peve, ha ojevývo hikuái Beréape, Páblo he’iuka Sílas ha Timotéope ikatúrõ pya’e oho hag̃ua hendápe.

Páblo Aténaspe.

16Páblo oha’ãrõ aja Sílas ha Timotéope ou hag̃ua Aténaspe, iñangekõi ipytu porãme, ohechávo opaichagua jára gua’u ra’ãngakuéra.

17Páblo oñe’ẽjoapi Judayguakuéra ndive ha umi omomba’eguasúva Ñanderuetépe Ñanderuete rógape, ha’e oho meme árape pe táva plázape oñemongeta hag̃ua ojohúva ndive.

18Umi mbo’ehára epicúreo ha estóico escuéla rehegua oñoñe’ẽ’api Páblo ndive, ha oime he’íva: Mba’e piko ko tekove ñe’ẽngatúva he’ise. Ambuekuéra katu he’i: Ha’e ningo ojogua ambue jára moherakuãhárape, Páblo oñemoñe’ẽgui ichupekuéra Hesu ha jeikove jevy rehe omanova’ekue apytégui.

19Upérõ ogueraha hikuái Páblope mbojovakeharakuéra rendápe, hérava Aerópago, ha he’i hikuái ichupe: Ikatúpa roikuaa porãve pe mbo’epy pyahu remoherakuãva.

20Nde ningo rehenduka oréve ko’ã mba’e ndoroikuaáiva, roikuaase ningo mba’épa upéva he’ise.

21Opaite Aténas pegua ha opaite tetã ambueyguakuéra upépe oĩva guive omombe’usénte térã ohendusénte mba’e ipyahu.

22Páblo oñembo’y Aerópago mbytépe ha he’i: Kuimba’e Aténas pegua, che ahechakuaa peẽ pemomba’eguasuha pende jarakuérape.

23Ahasávo pende jára rogakuéra rupi ahecha peteĩ kuave’ẽmby renda, ojehaihápe: Pe jára ojekuaa’ỹvape g̃uarã. Upe Jára peẽ peikuaa’ỹva, péva che aikuaaukase peẽme.

24Pe Jára ojapova’ekue ko yvy (múndo, univérso) ha opaite mba’e ipype oĩva guive, Ha’e ningo yvy ha yvága Jára, ha ndoikói peteĩ óga, kuimba’ekuéra omopu’ãva’ekuépe.

25Yvyariguakuéra ndaikatúi oipytyvõ ichupe ha Ha’e noikotevẽi mba’everehe ichuguikuéra, Ha’e voi ningo ome’ẽ opavavépe hekove pytuhẽ opaite ambue mba’e reheve.

26Ha’e omoingo peteĩ kuimba’épente, ha ichugui oñemoña opaite tetãnguéra oĩva guive ko yvy apére. Ha’e ningo ome’ẽ opaite tetãnguérape hekove arakuéra ha omoĩ meme tetãnguérape hetã rembe’y oiko hag̃ua,

27ha oheka hag̃ua Ijapoharépe, sapy’árõ g̃uarã ojepovyvyhápe ojohu ichupe, añetehápe Ha’e noĩri mombyry ñandehegui.

28Ipype ningo jaikove, ñamýi ha jaikoñaína. Pene ñe’ẽ yvoty apohára (poéta) he’imava’ekue voi: Ñande ningo iñemoñare.

29Ñande ha’égui ñande Apohare ñemoñarenguéra, anítei ñaimo’ã umi jára gua’u, kuimba’ekuéra ojapóva órogui, plátagui térã itágui, iñakãme ou háicha ojoguaha ñande Apoharépe.

30Ñande Apohare, Ñanderuete, oheja ohasa umi ára atyguasu tetãyguakuéra oikuaa’ỹre ichupe, ko’ág̃a katu oipota opavave ojevy hendápe ha oñembyasy oñemboheko vai haguére.

31Ñanderuete omoĩma peteĩ ára ñane renonderãme peteĩ mbojovakehára Ha’e oiporavova’ekue ombojovake hag̃ua hekópe opavave reko ha opavave rembiapokue. Ha Ñanderuete ohechauka opavavépe, péva hi’añeteha omoingove jevývo pe mbojovakehararã omanova’ekue apytégui.

32Ha umi Atenasgua ohendúvo pe mbojovakehararã oñemoingove jevymaha omanova’ekue apytégui, oĩ umi oñembohorýva ha oĩ umi he’íva: Ambue ára iporã ñahendu jevy ichupe.

33Upéramo Páblo osẽ ijapyteguikuéra.

34Ijapytégui katu oĩmimi kuimba’e ha kuñáva omoirũva Páblope ojeroviágui avei (Hesu Crístore), ha ko’ãva apytépe oĩ Dionísio, peteĩ mbojovakehára, ha peteĩ kuñakarai Dámaris ha ambueve avei.