Ezequiel 20 - Biblia en Guaraní - ?anderuete ?e’? Por? 2015

Yma guive ko ára kóva peve Israel naiñe’ẽrendúi

1Ojehu pe áño 7-hápe, pe jasy 5-hápe, ha pe ára 10-hápe, umi karai anciáno ou omba’eporandu hag̃ua Ñanderuetépe, ha oguapy hikuái che renondépe.

2Ha Ñanderuete ñe’ẽ ou chéve, ha he’i:

3Kuimba’e ra’y, eñe’ẽ umi Israel ancianokuérape, ha ere ichupekuéra péicha he’i pende Ruete: Peju piko pemba’eporandu hag̃ua chéve, che rekove rehe, nda’emo’ãi mba’evete peẽme, he’i pende Ruete.

4Nerembojovakeséi piko ichupekuéra. Nde, kuimba’e ra’y embojovake ichupekuéra, ehechauka ichupekuéra ituvakuéra angaipa,

5ha ere ichupekuéra, péicha he’i pende Ruete: Upe ára aiporavo ramoguare Israélpe che mba’e ramo ame’ẽ hag̃ua che ñe’ẽme’ẽ Jacóbo róga ñemoñarenguérape, ha ajehechauka ramoguare ichupekuéra Egípto retãme, amopu’ãvo che po ame’ẽ hag̃ua che ñe’ẽ ichupekuéra, Che ha’emava’ekue: Che ningo pende Ruete, pende Jarateetéva.

6Pe ára pévape ahupi che po aguenohẽ hag̃ua ichupekuéra Egípto retãgui agueraha hag̃ua peteĩ tetãme ambosako’iva’ekue ichupekuéra g̃uarã, osyryhápe kamby ha eíra, ha pe yvy péva iporãve opaite ambue yvýgui;

7upéramo ha’eva’ekue ichupekuéra: Opavave topoi ijára gua’u ra’ãngágui oguerekóva hesakuéra renondépe, ha ani peñemongy’a umi ta’ãnga Egípto pegua rehe, Che ningo pende Ruete, pende Jaratee.

8Ha’ekuéra katu opu’ã cherehe, ha naiñe’ẽrenduséi chéve; ndoipe’ái ijára gua’u oguerekóva hesakuéra renondépe, ha nomombói Egípto jára gua’u ra’ãngápe; upévagui añohẽma che pochy hi’arikuéra, ha ambogue che ñeko’õi Egípto retãre.

9Che ajapo umi mba’e che réra rehehápe, ani hag̃ua umi tetã oikóva ijerekuévo oñe’ẽvai cherehe, upévagui Che ajehechauka ha ha’éma avei aguenohẽtaha ichupekuéra Egípto retãgui, umi ambue tetã ijerekuévo oĩva guive ohechakuaa hag̃ua che pu’aka.

10Upéicha aguenohẽ ichupekuéra Egípto retãgui, ha agueru ichupekuéra pe yvy perõme,

11ha amombe’u ichupekuéra che rembipota, ha aikuaauka ichupekuéra che rembiapoukapy, umi ojapóva guive umía oikoveva’erã katuete.

12Ha hi’ári ame’ẽ avei ichupekuéra umi pytu’uha ára, oiko hag̃ua techaukaha ramo Che ha ha’ekuéra pa’ũme, oikuaa hag̃ua hikuái Che Ijaraha, ha Che voi aiporavo hague ichupekuéra ha amboyke hague ichupekuéra che retãteerã ramo opaite tetãnguéra apytégui.

13Israel retã katu oñemoĩ cherehe pe desiértope; ndoikói che ñe’ẽ he’i háicha, ha omboyke hikuái che rembiapoukapy, umíva rupínte yvyarigua oikovekuaánte; ha’ekuéra omongy’a avei che pytu’uha ára ame’ẽmava’ekue ichupekuéra; ha upévagui, ha’éma añohẽtaha hi’arikuéra che pochy ahundi hag̃ua ichupekuéra yvy perõme.

14Che réra rehehápe katu ndajapói pya’e, ani hag̃ua oñe’ẽvai umi ambue tetã ohechamava’ekue mba’éichapa aguenohẽ Israélpe Egípto retãgui.

15 Desiértope amopu’ã avei che po ame’ẽ hag̃ua che ñe’ẽ ndaguerahamo’ãiha ichupekuéra pe yvy ame’ẽva’ekuépe Israélpe, osyryhápe kamby eíra, ha iporãitevéva opaite ambue tetãnguéragui,

16omboykégui hikuái che rembiapoukapykuéra, ha ndoikóigui hikuái Che aipota háicha ha hi’ári omongy’a haguére che pytu’uha arakuéra ha ipy’apýpe ohoségui ijára gua’u rapykuéri.

17Ha upeichavéramo jepe Che aperdona ichupekuéra, ani hag̃ua ajuka ha ahundipa ichupekuéra desiérto rupi;

18upéicha rãngue ha’eva’ekue ita’yrakuérape pe desiértope: Ani peikótei pende tuvakuéra oiko haguéicha, ani pejapótei hembiapo vai, ha ani peñemongy’átei ijára gua’ukuéra rehe.

19Chénte pende Ruete, pende Jára; pejapopa katu che ñe’ẽ ha che rembiapoukapy;

20peñongatu che pytu’u ára, oiko hag̃ua techaukaha (señal) ramo Che ha pene pa’ũme, ha peikuaa hag̃ua Cheha pende Ruete, pende Jaratee.

21Ita’yrakuéra katu opu’ã jevy cherehe ha ndoikói hikuái che ñe’ẽ he’i háicha, ha ndojapói che rembiapoukapykuéra, umíva rupínte yvyariguakuéra ojapóva guive oikoveva’erã; omongy’a jevy katu hikuái che pytu’uha ára. Upémaramo ha’eva’ekue añohẽtaha hi’arikuéra che pochy, ahundipa peve ichupekuéra desiértore.

22Ha che réra rehehápente ajokova’ekue che po, ani hag̃ua oñembohory hesekuéra umi tetã, hesakuéra renondégui aguenohẽva’ekue Israélpe Egípto retãgui.

23Upévare ahupi che po desiértope ko tetã kóvare, ha ame’ẽ che ñe’ẽ Che amosarambipataha ichupekuéra tetãnguéra apytépe, opaite yvy apére,

24ha’ekuéra omboyke haguére che ñe’ẽ, che rembiapoukapykuéra, ha omongy’águi che pytu’uha ára, ha omomba’eguasúgui ituvakuéra jára gua’u ra’ãngakuérape,

25upévagui Che ame’ẽ ichupekuéra ñe’ẽ naiporãiva, ha tembiapoukapy umíva rupi ndaikatúi oikove.

26Iky’áva ramo aguereko ichupekuéra, oikuave’ẽgui hikuái ita’ýra tenonderépe tata rendýpe, ha ambohasa asy ichupekuéra aikuaauka hag̃ua ichupekuéra Chenteha Ijaratee.

27Upéicharupi, kuimba’e ra’y, eñe’ẽ Israel retãme, ha ere ichupekuéra péicha he’i pende Ruete: Ko’ã mba’e ko’ãva rupi pende rukuéra oñembohory cherehe ha oñemoĩ cherehe pe desiértope.

28Che ame’ẽma che ñe’ẽ ame’ẽtaha ichupekuéra ko yvy kóva ha agueru avei ichupekuéra ko yvy kóvape, ha’ekuéra katu oma’ẽ mayma cérro ijyvatéva rehe ha mayma yvyra ikuarahy’ã porãva rehe, ha upépe oikuave’ẽ ambue járape chembopochy hag̃ua, ha upépe avei omoĩ hikuái imba’e ryakuã porãva, ha upépe oikuave’ẽ avei ivíno.

29Ha Che aporandu ichupekuéra: Ma’erãpa peho jepi umi yvy yvatépe, upévagui oñembohéra pe ára péva guive yvy yvate.

30Upévare ere Israel retãme: Péicha he’i pende Ruete, mba’érehepa peñemongy’a pende ypykuéraicha, ha pejapo jevy avei hembiapo vaikuerakue.

31Peikuave’ẽ haguére pene kuave’ẽmby ambue járape ha pehapýgui pende ra’ykuéra tatápe ha peñemongy’a haguére avei mayma pende jára gua’u ra’ãnga rupi ko ára kóva peve nambohovaimo’ãvéima peẽme, Israel retãyguápe, pemba’eporandu ramo jepe chéve. Che rekove rehe, he’i pende Ruete, Che nañe’ẽmo’ãvéi peẽme.

32Ndojehumo’ãi peẽ pejepy’amongetáva. Peẽ ningo peje: Jaikóna ambue tetãnguéraicha, omomba’eguasúva ijarakuérape, ojejapóva ita ha yvyrágui.

33Che rekove rehe, he’i pende Ruete, che pu’aka mbarete pochypópe peikóta che poguýpe,

34ha Che pombyatýta yvy apéregui che po mbarete rupi ha pochypópe aipysóta che jyva pendeári,

35ha poguerúta umi tetãgui peteĩ desiérto perõme, ha upépe Che pombojovakéta.

36Che ahavira haguéicha pende rukuéra Egípto desiértope, péicha ajapo jevýta penendive, he’i pende Ruete.

37Che pombohasáta che yvyra po’iguy rupi, ku ovecha rerekua ojapo háicha oipapa ramo ijovechakuérape, ha Che pojopýta pejapo peve pe ñe’ẽ ñame’ẽmava’ekue ojupe.

38Che amboykéta pende apytégui umi oñemoĩva ha umi opu’ãva’ekue cherehe; poguenohẽmbáta umi tetã peikohágui, Israel yvýpe katu umi iñañáva ndoikemo’ãi, peikuaa hag̃ua Che ha’eha pende Ruete.

39Ha peẽ Israel rogayguáva, péicha he’i pende Ruete: Peẽ napeneñe’ẽrenduséi ha pemomba’eguasuse pende jára gua’úpe, ág̃a katuete og̃uahẽta pe ára peẽ napemongy’avéi hag̃ua che reraguasu.

40Upévare he’i pende Ruete: Che cérro poravopyrépe, Israel retãme, opaite Israelgua chemomba’eguasúta ha Che poiporiahuverekóta ha peẽ peikuave’ẽ jevýta chéve pene kuave’ẽmbynguéra.

41Che ahetũ ramo pene kuave’ẽmby hyakuã porãva Che poiporiahuvereko jevýta, ha Che pombyatýta umi tetã Che pomosarambipa haguégui poguenohẽ jevy hag̃ua umi tetã apytégui, ha uperire ae Che pomopotĩ jevýta ambue tetãnguéra resa renondépe.

42Ha peikuaáta Che ha’eha pende Ruete, ág̃a Che pogueru jevy ramo Israel yvýpe, pe yvy Che ame’ẽmava’ekue pende rukuérape, ame’ẽ haguépe che ñe’ẽ ahupívo che po.

43Upépe ae penemandu’áta pende rapekuéra rehe ha opaite mba’e peñemongy’ava’ekue rehe, pejeguaru hag̃ua pene rembiapo vaietekuégui.

44Ha peikuaáta Che ha’eha pende Ruete, ajapo umi mba’e penderehe che réra rehehápe, pende reko ha pende rape vaiete ramojepe, he’i pende Ruete.

Profecía Négev rehegua

45Ñanderuete ñe’ẽ ou chéve, ha he’i:

46Kuimba’e ra’y, emoĩ nde rova sur gotýo, ha emyasãi che ñe’ẽ upérupi, eprofetiza Négev ka’aguy rehe.

47Ha eréta Négev ka’aguýpe: Ehendúke Ñanderuete ñe’ẽ, péicha he’i pende Ruete: Ema’ẽ porãke, Che ambojepota nderehe tata ahundi hag̃ua opaite yvyra rogue hovy ha ipirúva; ndoguemo’ãi pe tata rendy; ha ojehapýta opaite yvyarigua rova, yvy guive yvatévo peve.

48Ha mayma yvyarigua ohecháta Che, pende Jára, ambojepota hague ha avave nomboguekuaamo’ãi.

49Ha che ha’e: Nde che Jára, ha’ekuéra ningo he’íta cherehe, noñe’ẽi piko kóa ñe’ẽñemi rupi.