Salmokuéra 5 - Biblia en Guaraní - ?anderuete ?e’? Por? 2015

David ñembo’e pyharevegua

1Ehendumína che ñe’ẽ, ejapysakamína che Ruete che pyahẽ asy rehe.

2Eñangarekomína che mba’ejerure asy rehe, Nde voi che retã ruvicha ha che Ruete, ndéve añembo’e’aína.

3Nde, che Ruete, pyharevete ramo ehendumi che ñe’ẽ, pyharevete añemoĩ ne renondépe, ndehegui aha’ãrõ ñepytyvõrã.

4Ñaña reko nanembovy’amo’ãi, ha tekove ñaña ndoikomo’ãi nendive.

5Umi oñembotuicháva katuete ndoikomo’ãi nde resa renondépe, nande’a’éi mayma hembiapo vaíva rehe.

6Rehundiva’erã ijapúvape. Umi oñohẽva hapicha ruguy ha oporombotavýva nembopochyva’erã.

7Nde poriahuvereko tuicha rupi ikatu aike nde rógape ha añesũta kyhyjepópe nde rogaguasu rokẽ renondépe.

8Chesãmbyhymína, che Ruete, nde justícia rupive, umi cherehe ija’e’ỹva renondépe, taikarẽ’ỹ nde rape che renonderãme.

9Ijurukuérape katu ndaipóri añetegua, ñaña raitýmante oĩ ipy’apypekuéra, ijahy’o peteĩ sepultúra ojepe’apyréva, ikũmente oporombojuru he’ẽ hikuái.

10Ehavirána ichupekuéra, che Ruete, hekombo’ekuéra rupi tove to’apa hikuái, hembiapo vai hetaitereígui emosẽmba ichupekuéra okápe, opu’ã haguére nderehe.

11Upéicha ramo ovy’aite mayma ojeroviáva guive nderehe, tovy’a joaite hikuái opaite ára peve, Nde remo’ã porãgui ichupekuéra, ha tahory ndereheve umi ohayhúva guive nde réra.

12Nde ningo, che Ruete, rehovasa pe heko potĩvape, ha reñu’ãmba ichupekuéra nde poriahuvereko rupi.