1Nde voi ningo Israel rerekua, upévare ehendumína ha eñangarekomína ku ovecha rerekuáicha Israel rehe, ha Nde reguapýva querubinkuéra (angelkuéra) ári ehechaukamína nde reko jajaipa.
2Ehechauka nde pu’aka Efrain, Benjamin ha Manases renondépe, ha eju orepytyvõ hag̃ua.
3Nde, ore Ruete, oremopu’ã jevýna, tojajái nde rova, Ndémante oreguenohẽkuaa ko jejopy vaietégui.
4Yvága atykuéra Jára, ore Ruete, araka’e peve piko Nde ndepochýta ne retãyguakuéra ndive, ore roñembo’e ramo jepe ndéve.
5 Pan rãngue Nde oremboy’uka tesay, kambuchi renyhẽ tesay reheve Nde oremboy’uka.
6Umi tetã oĩva guive ore jerekuévo oñe’ẽvai orerehe ha umi orerayhu’ỹva oñembohory orerehe.
7Nde, ore Ruete, oremopu’ã jevýna, embojajái nde rova, oreguenohẽ ore jejopy vaígui.
8Egíptogui regueruva’ekue peteĩ parral ra’y, upéi remosẽ umi tetã oiko hágui ha hendaguépe reñotỹ pe parral máta (Israel) regueruva’ekue.
9Remopotĩ porã raẽ hendag̃ua, ha oñembohapo porã rire ha’e omyenyhẽ ijyvy.
10Ikuarahy’ã oñu’ã umi cérro ha hakãnguéra oñu’ã Ñanderuete cedrokuéra.
11Hoguekuéra oipyso yguasu peve, ha hoky pyahúva ysyry (Éufrates) peve.
12Mba’érehe piko remopẽ ikorapy jere, ha péicha ohasáva guive pe tape rehe oipo’o hi’akuéra.
13Pe kure ka’aguy oipehẽ’ãmba ha mymba ñu megua okaru hese.
14Nde, yvága atykuéra Jára, ejeremína ko’ág̃a, ema’ẽmi yvága guive ha eñangarekomi jevy nde parralty rehe.
15Pe parral ra’y nde po akatúa oñotỹva’ekue, ha Nde voi remongakuaava’ekue hoky porã hag̃ua,
16tatápe ojehapy, ha upéi oitypa, Nde rova pochy rupi omanomba.
17Eñangareko porã nde po rupi pe kuimba’e oĩva rehe nde akatúape, pe yvyarigua ra’y nde remongakuaava’ekue.
18Péicha ramo ore noroñemboykemo’ãi ndehegui, Nde oremoingove jevy ramo ore romomba’eguasu jevýta nde réra.
19Nde, ore Ruete, yvága atykuéra Jára, oremyatyrõ jevýna, embojajái nde rova ha oreguenohẽ ore jejopy vaígui.
Who We AreWhat We EelieveWhat We Do
2025 by iamachristian.org,Inc All rights reserved.
