Jeremías 36 - Biblia en Guaraní - ?anderuete ?e’? Por? 2015

Pe tetã ruvicha ohapy pe kuatiañe’ẽ

1Ojehu Joacim, Josías ra’y, Juda retã ruvicha irundyha áñope, Ñanderuete ñe’ẽ ou Jeremíaspe, ha he’i:

2Ejapyhy peteĩ kuatia, ha ehai opaite mba’e ha’étava ndéve Israel, Juda ha mayma tetãnguéra rehe, Josías oisãmbyhy guive ko ára kóva peve.

3Ikatu Judayguakuéra opáy ohendu ramo opaite mba’evai ajapótava hesekuéra, ha oheja hape vaígui, Che aperdona hag̃ua heko ha hembiapo vaikuéra.

4Ha Jeremías ohenói Baruc, Nerías ra’ýpe ohai hag̃ua peteĩ kuatiañe’ẽme, opaite mba’e Ñanderuete he’iva’ekue guive ichupe.

5Upéi Jeremías he’i Barúcpe: Chéve ndojehejái aike Ñanderuete rogaguasúpe,

6upévare tereho nde, eike Ñanderuete rogaguasúpe ha emoñe’ẽ ko Ñanderuete kuatiañe’ẽ che jurúgui rehendu ha rehaiva’ekue, opaite tetãyguakuéra apysápe peteĩ arete árape pekaru’ỹva ha remoñe’ẽta avei umi Judaygua apysápe og̃uahẽtavahína ko távape.

7Ikatu porãnte iñembo’ekuéra og̃uahẽ Ñanderuete rendápe, ha opia joaite hikuái hape vaígui; ituichaiterei ningo Ñanderuete pochy ko tetã kóva rehe.

8Ha Baruc, Nerías ra’y, ojapo opaite mba’e pe proféta Jeremías he’imava’ekue ichupe, ha oho omoñe’ẽmba hag̃ua Ñanderuete rogaguasúpe.

9Ha ojehu ningo Joacim, Josías ra’y, Juda retã ruvicha oisãmbyhy aja 5 áño, pe jasy 9-hápe, oje’e mayma Jerusalenguápe ha mayma Judaygua oúva Jerusalénpe opyta hag̃ua okaru’ỹre Ñanderuete renondépe.

10Upérõ Baruc oho Ñanderuete rogaguasúpe ha oike pe haihára Gemarías kotýpe, itúva réra Safan, ha pe koty opyta pe korapy yvateoguápe, Ñanderuete róga rokẽ pyahu ypýpe.

11Ha Miquéas, Gemarías ra’y, Safan niéto, ohendupa rire Ñanderuete kuatiañe’ẽ,

12oho tetã ruvicha rógape, ikuatiañe’ẽ haihára kotýpe, ha upépe oguapy joa mburuvichakuéra: Elisama, pe kuatiañe’ẽ haihára; Delaía, Semaías ra’y; Elnatan, Acbor ra’y; Gemarías, Safan ra’y; Sedequías, Ananías ra’y, ha opaite ambue mburuvichakuéra.

13Ha Miquéas omombe’u ichupekuéra opaite mba’e ohendumava’ekue Baruc jurúgui omoñe’ẽ jave Ñanderuete kuatiañe’ẽ hetãyguakuéra apytépe.

14Upéramo umi mburuvicha oĩva guive he’i hikuái Jehudípe, Netanías ra’y, kóva Selemías ra’y, kóva Cusi ra’y, he’i hag̃ua Barúcpe: Ejapyhy pe kuatiañe’ẽ remoñe’ẽmava’ekue tetãyguakuéra apytépe ha eju. Ha Baruc, Nerías ra’y, ojapyhy pe kuatiañe’ẽ ha ou hendapekuéra.

15Ha he’i hikuái ichupe: Eguapy ha emoñe’ẽ avei oréve. Ha Baruc omoñe’ẽ ichupekuéra.

16Ha ohendupáma ramo hikuái, oñemondýi joaite, ha he’i hikuái Barúcpe: Añetehápe romombe’úta ko’ã ñe’ẽ tetã ruvichápe.

17Ha upéi oporandu hikuái Barúcpe, he’ívo: Emombe’u ko’ág̃a oréve mba’eichaitépa rehaíra’e Jeremías jurúgui ko’ã ñe’ẽ.

18Ha Baruc he’i ichupekuéra: Jeremías he’i chéve ahaipa hag̃ua umi ñe’ẽ osẽva guive ijurúgui ha che ahaipa tíntape ko kuatiañe’ẽ kóvape.

19Upéramo umi mburuvicha he’i Barúcpe: Tereho ha pekañy, nde ha Jeremías, ani hag̃ua avave oikuaa moõpa peime.

20Ha oike hikuái tetã ruvicha korapýpe, oñongatu rire pe kuatiañe’ẽ kuatia haihára Elisama kotýpe; ha omombe’upa hikuái ko’ã ñe’ẽ tetã ruvicha apysápe.

21Ha pe tetã ruvicha omondo Jehudípe ojapyhy hag̃ua pe kuatiañe’ẽ, ha ojapyhy rire pe kuatiañe’ẽ pe haihára Elisama kotýgui, Jehudi omoñe’ẽmba tetã ruvichápe, ha mburuvichakuérape oñembyatypa avei tetã ruvicha ndive.

22Ha tetã ruvicha ojepe’ehína hóga ro’yha árape pe jasy jere 9-hápe jave, ha oĩ henondépe peteĩ tatapỹi ryru hendyvahína.

23Ha Jehudi omoñe’ẽmimi rire, tetã ruvicha oikytĩ peteĩ kysépe, umi kuatia haihára oiporu háicha, umi ñe’ẽ oñemoñe’ẽramóva, ha omombo tatapỹi hendýva ári, upéicha ohapypa hogue ñemondopýre rehe Ñanderuete kuatiañe’ẽ.

24Ha tetã ruvicha ha hembiguaikuéra ohendúva guive ko’ã ñe’ẽ ndokyhyjeiete hikuái ni nomondorói ijaokuéra.

25Elnatan, Delaía ha Gemarías ojerure asy ramojepe tetã ruvichápe, ani hag̃ua ohapy pe kuatiañe’ẽ, ha’e katu nohenduséi voi.

26Uperire tetã ruvicha he’i Jerameel, Hamelec ra’ýpe; Seraías, Azriel ra’ýpe; ha Selemías, Abdeel ra’ýpe, ojapyhy hag̃ua kuatia haihára Barúcpe ha proféta Jeremíaspe, Ñanderuete katu oñongatuka ichupekuéra.

27Ha ou Ñanderuete ñe’ẽ Jeremíaspe, tetã ruvicha ohapy rire pe kuatiañe’ẽ, Baruc ohaiva’ekue ohendu rire Jeremías jurúgui, ha he’i ichupe:

28Ejapyhy jevy ambue kuatia, ha ehaipa jevy ipype umi ñe’ẽ oĩmava’ekue ambue kuatiañe’ẽme, Joacim, Juda retã ruvicha, ohapymava’ekue.

29Ha eréta Joacim, Juda retã ruvichápe: Péicha he’i Ñanderuete, nde rehapýgui pe kuatiañe’ẽ, Che ahaiukava’ekue: Eikuaa porãke, katuete Babilónia retã ruvicha oúta ha ohundíta ko tetã kóva ha ndohejamo’ãi ipype hetãygua ni tymbakuéra.

30Upévare Ñanderuete he’i Juda retã ruvicha Joacim rehe: Iñemoñare ndoguapymo’ãi David guapyhaguasúpe ha hetekue oñemombóta kuarahy aku ha pyhare ro’ysãme.

31Iñañágui ha’e Che ahaviráta ichupe, iñemoñarenguéra ha hembiguaikuéra ndive; ha aguerúta hi’arikuéra, Jerusalen ha Judayguakuéra ári, opaite mba’evai ha’emava’ekue guive ichupekuéra katuete oikotaha, naiñe’ẽrendúi haguére hikuái.

32Ha Jeremías ojapyhy ambue kuatia ha ome’ẽ kuatia haihára Baruc, Nerías ra’ýpe; ha ha’e ohai jevy opaite ñe’ẽ osẽva guive Jeremías jurúgui ha oĩva’ekue ambue kuatiañe’ẽme Joacim, Juda retã ruvicha, ohapyva’ekue; ha oñemoĩve katu hi’ári ambue ñe’ẽ koichagua.