Salmokuéra 40 - Biblia en Guaraní - ?anderuete ?e’? Por? 2015

David omomba’eguasu Ñanderuetépe oipytyvõ porã haguére ichupe

1Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.

2Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua.

3Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.

4Ovy’aite upe kuimba’e ojeroviáva Ñanderuete rehe, ha noma’ẽiva umi oñembotuicháva rehe, térã umi ijapúva rehe.

5Nde, che Ruete, remboheta hetave umi mba’e techapyrãva ha Nde rejepy’amongeta porã orendive g̃uarã, Ndeichagua ndaipóri ambue. Che añemoĩ ramo amombe’u ha añe’ẽ hag̃ua opaite mba’e rejapova’ekue rehe, ndaikatúi amombe’upa (che rekove pukukuépe), hetaitereígui.

6Me’ẽmby ha kuave’ẽmby ndereguerohorýi, pe apysa ojapysakáva nderehe katu rehayhu, kuave’ẽmby ojehapypáva ha kuave’ẽmby angaipa reheguáva nderejeruréi.

7Upéramo ha’éma che: Péina ápe, che aju, nde kuatiañe’ẽ oñe’ẽ chéve g̃uarã che añemoĩ hag̃ua nde pópe, (Hebréoyguakuérape 10, 5-7).

8Ajapose ne rembipota, péva chembovy’áta che Ruete, ha ne rembiapoukapy oĩ che py’apýpe.

9Amombe’úma mba’e heko peguáva atyguasúpe, ha ndajokói che juru, Nde reikuaapa voi upéva, che Ruete.

10Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe.

11Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe.

12Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre.

13Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua.

14Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva.

15Toñemotĩ ha toñemondyipa umi oñembohorýva cherehe, ha chehundiséva.

16Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi.

17Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui.