1Peẽ peporanduva’ekue avei chéve pe tembi’u oñekuave’ẽmava rehe jára gua’úpe g̃uarã. Ñande jaikuaáma opavave jarekoha kuaapy. Pe kuaapy ñanembojerovu, pe mborayhu katu oporomopu’ã.
2Oime ramo peteĩ oimo’ãva oikuaa porãha peteĩ mba’e, ne’ĩra gueteri oikuaa mba’eve oikuaa hag̃uáicha.
3Upe ohayhúva Ñanderuetépe, upévape Ñanderuete oikuaa.
4Ha añe’ẽse umi tembi’u oñekuave’ẽva rehe jára gua’úpe, jaikuaa voi ningo pe jára gua’u ndaha’eiha mba’eve añeteguáva ko múndope, ndaipóri ambue jára, peteĩnte oĩ, ha’éva Ñanderuete.
5Oje’e ningo oĩha heta jára yvágape ha yvy ape ári, ko’ã tupãnguérape ha jarakuérape oñekuave’ẽhína (1 Corintoyguakuérape 10,19-22).
6Ñandéve g̃uarã katu oĩ peteĩnte ñande apohare, Ñanderuete voi; Ha’e opaite mba’e Jára, ha ñande imba’e voi; ha oĩ peteĩnte Hesu Crísto añeteguáva, ha Ha’érupi oikohína opaite mba’e, ha ñande jaiko avei Ha’érupi.
7Ndaopavavéi ningo oikuaa porã ko añetegua kóva, upévare oĩ gueteri avei pende apytépe umi ojepokuaáva gueteri omomba’eguasúvo jára gua’úpe, ho’úvo pe so’o oñekuave’ẽrõguáicha jára gua’úpe ha ipy’apyñe’ẽ ikangýgui, oñemongy’a jevy umi mba’épe.
8Pe tembi’u nañanemoĩ porãvéi Ñanderuete ndive, upéicha ramo nañaneporãvéi jakaru ramo, ni nañandevaivéi ndajakarúi ramo.
9Peñeñangareko porãke ani hag̃ua pene sãso rupi peẽ pemoñepysãnga ikangývape ijeroviápe.
10Oime ramo peteĩ nderecháva, ne sãso kuaapy reheve, reguapy jave mesápe rekaru hag̃ua peteĩ jára gua’u tupã’ópe, upéicharamo nde neremoñepysãngaichénepa ne hermáno ikangývape ha’e ho’u hag̃ua avei pe kuave’ẽmbýgui.
11Ha péicha ne hermáno ikangýva oñehundíta nde kuaapy arandu rupi, Hesu Crísto omano ramojepe avei hesehápe.
12Peẽ peñemohembiapo vai pene hermanokuéra rehe, pehunga ramo pene hermáno ikangýva py’apyñe’ẽ, ha peñemoangaipa vai avei Hesu Crísto rehe,
13upéicharamo hína che nda’umo’ãvéi máramo koichagua so’o (oñekuave’ẽva jára gua’úpe) ani hag̃ua che kuaapy arandu rupi che aity che hermáno ikangývape.
Who We AreWhat We EelieveWhat We Do
2025 by iamachristian.org,Inc All rights reserved.
