Salmokuéra 102 - Biblia en Guaraní - ?anderuete ?e’? Por? 2015

Oñembo’e oñembyasýva rehe

1Ore Ruete, ehendumína che ñembo’e ha tog̃uahẽ ne rendápe che mba’ejerure asy.

2Ani reñomítei chehegui nde rova che ajepy’apy asy jave, emboykemína chéve nde apysa, pya’emína Nde chembohovái hag̃ua, che añembo’e ramo.

3Tatatĩcha oho che arakuéra, ha che kanguekuéra hendy ku tatapỹicha.

4Che py’a katu ikangypa ku ñana pirúicha, ha upévagui cheresarái ha’u hag̃ua che pan.

5Che ñe’ẽ pyahẽ rupi che kanguekuéra ojapa che ro’o rehe.

6Ajoguaite ku tujuju yvy perõme oĩvape, aiko ku ñakurutũ tapere rupi oikóvaicha.

7Ndakekuaavéima ha aiko ku guyra ha’eño oikóva óga apére.

8Ko’ẽ ko’ẽre chemotĩ umi cherehe ija’e’ỹva, umi cherehe ipochýva, oñemoĩmba oñoñe’ẽme opu’ã hag̃ua cherehe.

9Upévare ha’u rãngue pan ha’u tanimbu, ha pe y hay’úva ojehe’áma che resay reheve.

10Ndepochy ha reñeko’õiháre Nde chemopu’ã yvate chereity hag̃ua.

11Che rekove ningo ohasa ku kuarahy’ãicha ha che rete ku ñana pirúicha.

12Nde katu, ore Ruete, opaite árape reisãmbyhyva’erã, ha nderehe oñemomandu’a che ypykue ára guive iñemoñarenguéra jevy jey peve.

13Repu’ãta ha reiporiahuverekóta Jerusalénpe og̃uahẽgui pe ára reiporiahuvereko jevy hag̃ua, upe ára upéva og̃uahẽtama.

14Ne rembiguaikuéra ohayhu Jerusalen itakuéra, ha oñembyasy itapere haguére.

15Upéicha umi tetã okyhyje ore Ruete réragui, ha opaite tetã ruvicha tanemomba’eguasu.

16Ñanderuete omopu’ã jevýma Jerusalen, ha ohechaukáma ichupekuéra heko jajaipa.

17Ñanderuete ombojere hova umi imboriahúva gotýo ha nomboykemo’ãi iñembo’ekuéra.

18Ko’ã mba’e ojehaíta iñemoñarépe g̃uarã, ha pe tetã oñemopu’ãtava tomomba’eguasu Ñanderuetépe.

19Ha’e oma’ẽ henda yvate porãite guive, Ñanderuete oma’ẽ yvága guive yvy rehe.

20Ohendu hag̃ua umi iñapytĩmbýva pyahẽ asy ha opoi hag̃ua umi ojejukátava guive,

21omyasãi hag̃ua Jerusalénpe Ñanderuete réra, ha omomba’eguasu hag̃ua herakuã porãite pe táva pévape.

22Umi tetã ha tetã ruvichakuéra oñembyaty ojapo hag̃ua Ñanderuete rembipota.

23Tapére Ha’e omokangy che mbaretekue ha omombyky che rekove arakuéra.

24Upévagui che ha’éma: Che Jára, anína reikytĩtei che rekove arakuéra mbyte rupi, Nde ningo reiko tapia g̃uarãva.

25Iñepyrũmbýpe rejapo ko yvy, ha umi yvága nde po rembiapokue voi.

26Ko’ãva opava’erã, Nde katu reikóta tapia g̃uarã, ko’ãva oiko ku ao oñembyaívaicha, ku ao oñemoambuévaicha, Nde embopyahu jevy katu ichupekuéra.

27Nde katu repyta tapia g̃uarã ymaguaréicha, ha ne añokuéra ndopamo’ãi araka’eve.

28Umi ne rembiguái ra’ykuéra oikova’erã kyhyje’ỹme ha iñemoñarenguéra oikova’erã ne renondépe.