2 Tesalonicayguakuérape 2 - Biblia en Guaraní - ?anderuete ?e’? Por? 2015

Umi oñemoĩva Ñanderuete rehe

1Ore rojerure peẽme, ore hermanokuéra, Ñandejára Hesu Crísto ou jevyha ára ramo g̃uarã rehe ha ñañembyaty ramog̃uarã hendive rehe (araípe),

2ani hag̃ua peheja avave omoinge pene akãme ambue mba’e ha peñemondýi rei peteĩ ñe’ẽ rupi, térã pytu ñe’ẽ gua’u rupi, térã peteĩ kuatiañe’ẽ rupi oje’éva oreheguiha, ha omombe’u Hesu Crísto ouha ára ojekuaa porãma térã og̃uahẽmaha.

3Anítei avave penembotavy mba’evéicharõ. Upe ára upéva mboyve oikóta jepoiguasu (Hesu Crísto reheguáva apytégui), ha og̃uahẽ raẽva’erã avei pe kuimba’e ñaña (anticrísto) omboykéva opaichagua tembiapoukapy; Ha’e oporohundíta ha uperire ha’e voi oñehundiva’erã avei.

4Ha’e oñemoĩta Ñanderuete rehe ha oñeha’ãmbáta ombyai hag̃ua Ñanderuete rembiapo ha ndorespetamo’ãi avavépe ni mba’evépe, upévare ha’e voi oguapýta avei Ñanderuete rogaguasúpe (témplope) ha he’íta ijehe ha’e Ñandejaraha.

5Napenemandu’áipa, aimérõ penendive, ha’e hague peẽme opaite ko’ã mba’e.

6Ko’ág̃a ningo peẽ peikuaa upe ojokóva gueteri (ichupe), ha’e ojehechauka hag̃ua hi’árape.

7Upe mba’evai ñemi oñemoĩva opaichagua tembiapoukapy rehe omba’apomahína, upe ojokóva (ichupe) katu ojepe’a mbarete raẽva’erã imbytégui.

8Uperire ae ojehechaukáta upe oñemoĩva opaichagua tembiapoukapy rehe, Ñandejára Hesu Crísto katu ojukáta ichupe ipytuhẽ pu’aka rupi ha ohundíta ichupe Ha’e ou jevyha árape.

9Upe oñemoĩva opaichagua tembiapoukapy rehe Satana remimbou voi, ha og̃uahẽvo Satana ome’ẽta ichupe pu’aka ojapo hag̃ua mba’e tuicháva, techaukaha (señáles), ha techapyrã (milagrokuéra) gua’u.

10Opaite ko’ã mba’e rupi ombotavýta umi oñehundítavape, ha’ekuéra ndohayhúi ha omboyke haguére pe añetegua ha pe salvacion rape.

11Upévarehe Ñanderuete oheja ichupekuéra ñembotavyharakuéra pópe oñembotavyuka porã hag̃ua. Oñembotavyuka ichupekuéra oguerovia hag̃ua ko’ã japu ko’ãva.

12Oñembojovake hag̃ua opaite umi ndogueroviaiva’ekue pe añetegua ha ovy’a hikuái heko vai reheve.

Ñanderuete oheka tetãyguakuérape osalva

hag̃ua ichupekuéra

13Ore roagradeceva’erã tapia Ñanderuetépe penderehe, ore hermanokuéra, Hesu Crísto ohayhúvape, Ñanderuete pendeporavógui ñepyrũ guive isalvaciónpe g̃uarã, pe Pytu Porãmbáva penemboheko porãgui ha peẽ peguerovia haguére pe añetegua.

14Upevarã Ha’e penerenoiva’ekue, Ñanderuete ñe’ẽ porãite rupi, ore pomombe’uva’ekue, pehupity hag̃ua avei Ñandejára Hesu Crísto reko jajaipa.

15Upéichakena, ore hermanokuéra, peñembo’y hatãkena pende jeroviápe ha peñongatu porã pende py’apýpe umi mbo’epy oñemombe’umava’ekue peẽme ore juru térã ore kuatiañe’ẽ rupi.

16Ñandejára Hesu Crísto ha Ñandejára Ñanderuete ñanderayhúva ha ñanemoangapyhýva tapia iporiahuvereko rupi, péva ningo pe esperánza jaguerekóva.

17Ha’e tomokyre’ỹ pende py’apy ha tapenemombarete opaichagua ñe’ẽ ha tembiapo porã rupi, pejéva ha pejapóva guivépe.