2 Crónicas 34 - Biblia en Guaraní - ?anderuete ?e’? Por? 2015

Josías oiko tetã ruvicha ramo.

1Josías oguereko 8 áño oñepyrũvo oisãmbyhy ha 31 áño oisãmbyhy Jerusalénpe.

2Kóva ojapo iporãva Ñanderuete resa renondépe, ha oiko ijypykue David rape rehe, oñemboyke’ỹ rehe akatúa gotýo ni asu gotýo.

Josías omyatyrõ heta mba’e.

3Josías oisãmbyhýma ramo 8 año, imitãrusu gueteri oñepyrũ oheka ijypykue David Járape; ha 12 añohápe oñepyrũ omopotĩ Juda ha Jerusalenpy umi yvy yvatégui, Asera ra’ãngakuéragui, ha ambue ta’ãngakuéragui.

4Ha hovaképe ojeitypa hikuái umi Baal kuave’ẽmby renda, ha oipehẽ’amba umi kuarahy ra’ãnga, oĩva hi’arikuéra; ha oipehẽ’amba avei umi Asera ra’ãnga, umi ta’ãnga mba’eykupyreguiguáva, ha omongu’ipa ha omosarambipa iku’ikue umi ichupe omomba’eguasuva’ekue sepulturakuéra ári.

5Ohapy avei umi pa’i kanguekue ikuave’ẽmby rendakuéra ári, upéicha omopotĩ Juda ha Jerusalénpe.

6Upeichaite ojapo avei Manases, Efrain, Simeon ha Neftali tavakuérape ha ijerekuévo.

7Ha oity riréma umi kuave’ẽmby renda ha Asera ra’ãngakuéra, ha ojoka ha omongu’ipa riréma ta’ãngakuéra Israel retãpy rehegua, ou jevy Jerusalénpe.

Ojejohu pe kuatianẽ’ẽ

8Tetã ruvicha oisãmbyhývo 18 áño ha omopotĩ rire tetãpy ha Ñanderuete rogaguasu, omondo Safan, Azalía ra’ýpe, pe táva sãmbyhyhára Maasías rendápe ha Joa, Joacaz ra’y, pe omoakãva pe tetã ñemu rendápe, omyatyrõ hag̃ua Ñanderuete rogaguasu.

9Ko’ãva ou pa’i guasu Hilcías rendápe, ha ome’ẽ hikuái pirapire ojegueruva’ekue Ñanderuete rogaguasúpe, ha Levigua okẽ ñangarekoharakuéra oñongatuva’ekue, Manasesguágui, Efrainguágui ha mayma Israel hembyva’ekue pokuéragui, ha avei mayma Judaygua, Benjamingua ha Jerusalenguágui.

10Ha omoĩ hikuái umi mba’apohára ruvicha pópe, ha’ekuéra ome’ẽ hag̃ua umi Ñanderuete rogaguasu rehe omba’apóvape, omyatyrõ ha omoĩ porã jevy hag̃ua Ñanderuete rogaguasu.

11Ha péicha ome’ẽ avei umi yvyra ha umi ita rehe omba’apóvape ojogua hag̃ua hikuái ita ojejokapyréva ha yvyra oñemyatyrõ hag̃ua Ñanderuete rogaguasu, Juda ruvichakuéra noñangarekoveiva’ekue rehe.

12Ko’ã kuimba’e ojapo hekoitépe hembiapo; ha umi Levigua, Jáhat ha Abdías, Merari ñemoñarenguéra; ha Zacarías ha Mesulam, Coat ra’yrekuéra, omoakã ko tembiapo kóva; ha umi Levigua ombopukuaáva peteĩ mba’epu,

13oñangareko umi mba’e rerojahakuéra rehe, ha opaichagua ambue mba’apohára rehe; Leviguakuéra apytégui oĩ avei kuatia haihára, sãmbyhyhára ha okẽ ñangarekoharakuéra.

14Ha oguenohẽvo pe pirapire ojegueruva’ekue Ñanderuete rogaguasúpe, pa’i Hilcías ojohu pe kuatiañe’ẽ tembiapoukapy reheguáva Ñanderuete ome’ẽva’ekue Moiséspe.

15Upéi Hilcías omombe’u kuatia haihára Safánpe ha he’i ichupe: Che ajohu pe kuatiañe’ẽ tembiapoukapy reheguáva Ñanderuete rogaguasúpe. Ha Hilcías ome’ẽ pe kuatiañe’ẽ haihára Safánpe.

16Ha Safan ogueraha tetã ruvichápe, ha omba’emombe’u ichupe, he’ívo: Ne rembiguaikuéra ojapopaite oje’eva’ekue guive ichupekuéra.

17Ombyaty hikuái pe pirapire Ñanderuete rogaguasu pegua, ha omoĩ hikuái umi tembiaporã ñangarekohára ha mba’apohára pópe.

18Ko’ã mba’e rire pe kuatia haihára Safan omba’emombe’u avei tetã ruvichápe, he’ívo: Pe pa’i Hilcías ome’ẽ chéve peteĩ kuatiañe’ẽ. Ha omoñe’ẽ tetã ruvicha renondépe umi ñe’ẽ ojehaíva pe kuatiañe’ẽ pévape.

19Ha tetã ruvicha ohendúvo pe kuatiañe’ẽ tembiapoukapy rehegua he’íva, omondoro ijaokuéra;

20ha he’i Hilcíaspe ha Ahicam, Safan ra’ýpe, ha Abdon, Mica ra’ýpe, ha kuatia haihára Safánpe, ha Asaías tetã ruvicha rembiguáipe:

21Tapeho ha pemba’eporandu Ñanderuetépe cherehe, Juda ha Israelgua hembyva’ekue rehe ko kuatiañe’ẽ ojejohuva’ekue he’íva rehe; tuichaitégui Ñanderuete pochy ho’ava’ekue ñandeári, ñande rukuéra ndojapóigui Ñanderuete ñe’ẽ, ko kuatiañe’ẽme ojehai háicha.

22Upémaramo Hilcías ha umi tetã ruvicha ndive oho pe profetísa Hulda rendápe, Salum rembireko, Tocat ra’y, Hasra ra’yre, aokuéra ñangarekohára, oikóva Jerusalénpe pe táva rembe’ýre, ha he’i hikuái ichupe umi ñe’ẽ oje’eva’ekue.

23Ha Hulda he’i ichupekuéra, Ñanderuete, Israel Jára, péicha he’i: Peje pe kuimba’e penembouva’ekuépe che rendápe, péicha he’i Ñanderuete:

24Péina ápe Che voi agueru ko’ã mba’e ivaíva ko yvy kóva ári, ha mayma ipýpe oikóva ári, umi ñe’ẽ vaiete ojehaíva pe kuatiañe’ẽme pemoñe’ẽva’ekue Juda retã ruvicha renondépe;

25ojehu peẽ pepoi haguére chehegui, ha peikuave’ẽ haguére ambue járape, peẽ chembopochy opaite pene rembiapo vai rupi; upévagui añohẽta che pochy ko yvy kóva ári, ha ndoguemo’ãvéi.

26Ha Juda retã ruvichápe, penembouva’ekue pemba’eporandúvo pende Ruetépe, péicha pejéta ichupe: Pende Ruete, Israel Jára, péicha he’i: Rehendúgui pe kuatiañe’ẽme he’íva,

27reñembyasy ha reñemomirĩgui pende Ruete renondépe, rehendúvo ha rejeroviágui iñe’ẽ pohýi rehe Che ha’emava’ekue ko yvy kóva rehe ha remondorógui avei nde aokuéra ha nerasẽgui che renondépe, Che avei rohendúma, he’iuka ndéve pende Ruete.

28Upévare, eikuaa porãke, Che rombyatýta nde rukuéra ndive, ha nde remanóta angapytu’upópe, ha nde resa ndohechamo’ãi mba’evaieta Che aguerútava ko yvy ha ipype oikóva ári. Ha ha’ekuéra ou omombe’u tetã ruvichápe opaite ñe’ẽ oje’eva’ekue ichupekuéra.

29Upémaramo tetã ruvicha omondo ombyatyukapa karai ancianokuérape oikóva guive Juda ha Jerusalénpe.

30Ha tetã ruvicha ojupi Ñanderuete rogaguasúpe, ha hendive oho opaite pa’ikuéra, Leviguakuéra, Judaygua ha Jerusalengua kuimba’ekuéra, pe tuichavéva guive pe michĩvéva peve, omoñe’ẽ hag̃ua ichupekuéra pe kuatiañe’ẽ ñembopy’apeteĩ reheguáva (jekupyty reheguáva) ojejohumava’ekue Ñanderuete rogaguasúpe.

31Ha tetã ruvicha oĩhína ñembo’yhápe pe yvy ha’e oĩháme jepi, upépe ome’ẽ iñe’ẽ Ñanderuete renondépe, ha’e oikotaha Ñanderuete rapykuéri ipy’aite ha hi’ánga mbytete guive, ojehai háicha ko kuatiañe’ẽ kóvape.

32Upéi omoñe’ẽme’ẽuka avei opaite Jerusalengua ha Benjamingua ojapopa hag̃ua avei Ñanderuete rembiapoukapykuéra, ituvakuéra Jára kuatiañe’ẽme he’i háicha.

33Ha Josías oipe’a opaite mba’e omongy’áva guive Israel ñemoñare yvýpe, ha he’iuka opaite Israelgua ojerovia hag̃ua Ñanderuete, Israel Jára rehe. Josías noñemboykéiri Ñanderuete rapégui, ha’e oikove aja pukukue.