1Che ahayhuva’ekue Israel imitãrusu guive, che ra’y voi ningo ha Egíptogui ahenói ichupe.
2Che ahenói heta ramojepe ichupekuéra ha’ekuéra ojeive chehegui, oikuaave’ẽ Baalkuérape ha omotĩmbo mba’e ryakuã porã ambue jára ra’ãngakuérape.
3Upeichavéramo jepe Che aisãmbyhy Efraínpe ha ahupi ichupekuéra che jyva ári ha noñandúi hikuái Che voi amonguera hague ichupekuéra.
4Mborayhu sãme opyta porã hag̃uáicha Che aruse ichupekuéra che rendápe, ha Che ahupimi icangálla ijajúragui ivevuive hag̃ua, ha Che añemboyke hendapekuéra amongaru hag̃ua ichupekuéra.
5Ndojevymo’ãi Egípto retãme, Asíria retã ruvicha katu oikóta imburuvicha ramo,
6ndojevyséigui hikuái che rendápe, pe kyse puku ho’úta itavakuéra ha omokõta imburuvichakuérape oguatáva iñakã vai rupi.
7Che retã oñemoĩse voínte cherehe, amopu’ãse ramojepe yvate ichupekuéra, ha’ekuéra ndoipotái.
8Mba’éicha piko apoíta ndehegui Efrain. Che piko ambotovéta Israélpe. Ajapo nga’u piko nderehe ajapo haguéicha Adama ha Zeboim rehe (Deuteronómio 29,23). Che py’a ojepoka che retepýpe, Che voi roiporiahuverekoitereígui ndéve.
9Che ndajoramo’ãi che pochy, nambyaipamo’ãi Efraínpe, Che ha’égui Yvága Jára ha ndaikomo’ãi yvyariguáicha, Che ningo pe heko porãitéva, aikóva pende apytépe; ha nag̃uahẽmo’ãi che pochy reheve pene rendápe.
10Oguata jevýta hikuái pende Ruete rapykuéri, Ha’e okororõta leõicha, añetehápe okororõ hatãta leõicha, ha ita’yrakuéra oko’íta ryryipópe oúta kuarahyreikéguio,
11oku’e pya’e guyráicha Egíptogui, ha Asíria retãgui pykasúicha. Ha Che ahejáta oiko jevy hag̃ua py’aguapýpe hogakuérape, he’i pende Ruete.
12Efrain chembojere ijapúpe ha Israelgua iñembotavýpe: Juda katu ipy’a mokõi gueteri ndoikuaa porãi mávarehepa ojeroviáta, Cherehe térã ambue jára gua’u rehe.
Who We AreWhat We EelieveWhat We Do
2025 by iamachristian.org,Inc All rights reserved.
