1Upéi Sofar, pe Naamat pegua, ombohovái Jóbpe ha he’i:
2Ambohasaseiterei che akãme oĩva ha chembopochýva.
3Nde, Job, oreja’o heta rire, che ambohovaiva’erãmante ndéve che pytu ohechauka háicha chéve.
4Ndereikuaái piko pe añetegua oĩ ko yvy apére oiko guive hi’ári kuimba’e ha kuñakuéra:
5Iñañáva vy’a imbykyha, ha heko vaíva sapy’aiténte ovy’aha,
6oñembotuicha ramojepe ára rehe, ha iñakã oja ramojepe araíre,
7hepotikuéicha opa reiva’erã hekove, ha umi ohechava’ekue ichupe he’iva’erã: Moõpa oime.
8Ku képe ojehechava’ekuéicha oveveva’erã, ha upéi ndojejohuvéiva’erã, ogue reiva’erã ku képe ojehechava’ekuéicha.
9Umi tesa ohechava’ekue ichupe, ndohechaveiva’erã ichupe, ha hogayguakuéra ndoikuaavéima ichupe.
10Ita’yrakuéra omyengoviava’erã itúva oipe’a reiva’ekue imboriahúvagui, ha ipokuéra ome’ẽmba jevyva’erã umi mba’e ha’ekuéra ombyatyva’ekue guive.
11Hete imbarete ramojepe mitãrusúicha, oñenova’erã yvy guýpe.
12Hembiapo vai he’ẽ ramojepe ijurúpe, ha oñongatu ramojepe ikũ guýpe,
13ha ojokose ramojepe oikũmby porãve hag̃ua,
14hembi’u oñemoambueva’erã hyépe, mbói pohã vaícha oikóta hyepýpe.
15Umi mba’erepyeta omokõmbava’ekue katuete ogue’ẽmba jevýta, Ñanderuete voi ningo oguenohẽmba jevýta hyégui.
16Mbói pohã vai oipytéta, mbói kũ ojukava’erã ichupe.
17Ndohechamo’ãi eíra ha kamby o syrýva ýicha.
18Ome’ẽmba jevyva’erã hembiapo repykue, opaite mba’e ombyatýva guive nomokõmo’ãi ha ndovy’amo’ãi imba’erepy reheve.
19Ha’e oity imboriahúvape ha upéi oheja rei ichupe, omonda hogakuéra, ndoikomo’ãi katu ipype.
20Ipy’apýpe katu ndaipy’aguapýi ha imba’erepy reheve ndaikatúi okañy.
21Omokõséva guive omokõmbáma, ha mba’eve nomohembýi, upévare imba’erepy ndahi’aremo’ãi.
22Imba’erepy ojopýta ichupe, ha umi iñañáva oñemoĩ hese.
23Oñemoĩ omyenyhẽ hye, Ñanderuete katu omboúta hi’ári ipochy, amáicha ho’áta hi’ári.
24Ha’e okañy ramo jepe kyse pukúgui peteĩ hu’y bronceguiguáva ojasurúta hete rehe.
25Oguenohẽvo pe hu’y ijekutuhágui, ochororóta huguy, upémaramo oñemondyiete omanótarõ guáicha.
26Imba’erepyeta oñehundi reíta, tata yvyarigua ojatapýi’ỹva ombokusuguéta ichupe ha opaite mba’e hógape hembýva guive gueteri.
27Pe yvága omyesakãta heko vai, ha pe yvy opu’ãta hese.
28Umi mba’e oñembyatýva hógape ojeguerahapáta, katuete ha’e oñehundíta Ñanderuete ombojovakeha árape.
29Ko’ã mba’e Ñanderuete ombosako’ihína heko vaívape g̃uarã, ha péva ningo imba’erã, Ñanderuete he’iukava’ekue iñe’ẽ porãite rupi.
Who We AreWhat We EelieveWhat We Do
2025 by iamachristian.org,Inc All rights reserved.
