Salmokuéra 4 - Biblia en Guaraní - ?anderuete ?e’? Por? 2015

David omoĩ ijerovia ka’aru pytũ megua ñembo’épe

1Cherendumíkena che rohenói jave, Nde, che Ruete, che ahasa asy jave Nde reñangareko porã cherehe, Nde chemoangapyhy akyhyje jave, cheporiahuverekomína ha ehendumína che ñembo’e.

2Peẽ, karaiguasu ra’ykuéra, araka’e pevépa chekutúta pene ñe’ẽ vai rupi ha pehayhúta mba’e gua’u rei pehekávo umi ñe’ẽ japu reheguáva. Selah

3Peikuaa porãkena, Ñanderuete omboguata porãha umi hese ojeroviávape, Ñanderuete cherendúta katuete amba’ejerure asy ramo ichupe.

4Peẽ pendepochy ramo, ani peñemohembiapo vai, pejepy’amongeta porã peime jave pende rupápe ha pekirirĩ. Selah

5Peikuave’ẽ kuave’ẽmby heko peguáva ha pejerovia añetehápe Ñanderuete rehe.

6Heta oĩ he’íva: Máva piko ohechaukáta ñandéve mba’e iporãva. Nde, ore Ruete, ehupína oreári nde rova ojajaipáva.

7Che py’a Nde rembohoryve ipy’akuéragui, ha’ekuéra omono’õ jave heta ikoga’a ha iparral rykue iñemono’õha árape.

8Py’aguapypópe añeno ha upeichaite ake avei, che Ruete, Nde rupínte aiko porãkuaa.