1Roñepyrũ jevýmapa ore roñemoĩ porã orejupe, térã piko ore roikotevẽ avei kuatiañe’ẽ ambuekuéragui roñemoĩ porã hag̃ua pene renondépe.
2Peẽ voi ningo ore kuatiañe’ẽ ojehaíva ore py’apýpe, opavave ohecha ha omoñe’ẽkuaáva.
3Ojehechakuaa hag̃ua peẽ añetehápe Hesu Crísto kuatiañe’ẽha, ore rohaíva, ndojehaíriva virómepe, ojehai uvei Ñanderuete Oikovéva Pytu Porãitépe, ndojehaíri ita ape ári, ojehai uvei kuimba’e ha kuñakuéra py’apýpe.
4Ha koichagua jerovia Ñanderuete rehe jahupity Hesu Crísto rupi.
5Ñande, yvy arigua pu’aka rupi ndajahupitymo’ãi ko’ã mba’e ko’ãva, Ñanderuete pu’aka rupínte uvei.
6Ñanderuete voi ningo orembokatupyry roiko hag̃ua iñembopy’apeteĩva (jekupyty) remimondo ramo. Iñembopy’apeteĩ pyahu ndoguapýi Moises rembiapoukapykuéra ári, Ñanderuete Pytu Porãite ári uvei. Umi tembiapoukapy (Ijespiritu’ỹre) oporojuka, Ñanderuete Pytu Porãitépe katu oporomoingove.
7Moises rembiapoukapykuéra oporocondena ha ojehaiva’ekue ita rehe, Moises rova omimbipava’ekue, upévare Israel ra’ykuéra ndaikatuiva’ekue oma’ẽ hova rehe, omimbipágui, uperire katu mbeguekatu oguepa jevy.
8Ndaupéichai pe tembiapo ojejapóva Ñanderuete Pytu Porãite poguýpe, ojajaiva’erãva (ogue’ỹre).
9Moises rembiapoukapy oporomomimbi ramo, mba’eguasueteveva’erã pe ñembopy’apeteĩ pyahu ñandereraháva Ñanderuete reko jajaipápe.
10Pe teko mimbi tenondeguaréva oñemokañy pe ambue teko jajaipáva renondégui.
11Mba’eguasu ramo pe teko mimbi sapy’a g̃uarãva, mba’eguasueteve katu pe teko jajaipa tapia g̃uarãva.
12Roguerekógui koichagua esperánza tuichaitéva ore roñe’ẽ rotĩ’ỹre.
13Ore ndorojapói Moises ojapo haguéicha, ha’e ojaho’i ramoguare hova peteĩ ahojápe ani hag̃ua Israel ra’ykuéra ohecha mba’éichapa heko mimbi ogue jevy ohóvo.
14Israelguakuéra naiñe’ẽrenduséigui, Ñanderuete omohatã ipy’apy, ha ko’ág̃a peve ojejaho’i gueteri hovakuéra peichagua ahojápe; omoñe’ẽ ramojepe Ñanderuete kuatiañe’ẽ ndoikuaái mba’épa he’ise, pe ñembopy’apeteĩ tenondeguaréva ojeígui Hesu Crísto rupímante.
15Ko ára kóva peve omoñe’ẽ ramojepe hikuái Moises kuatiañe’ẽ, peteĩ ahoja ojaho’i gueteri ipy’apykuéra (iñe’ãnguéra).
16Ipy’a oñemboykeha ára Hesu Crístope g̃uarã, pe ahoja katuete ojeiva’erã ichuguikuéra.
17Ñanderuete ningo Pytu Porãite ha Ñanderuete Pytu Porãite oĩháme, upépe oĩ sãso (libertad).
18Upéicharamo opavave ñande, ahoja’ỹre ñama’ẽ Hesu Crísto reko jajaipa rehe espéjope ramoguáicha ha ñañemoambueve jahávo Hesu Crísto reko ojajaipávape, péva katu Ñanderuete rembiapo.
Who We AreWhat We EelieveWhat We Do
2025 by iamachristian.org,Inc All rights reserved.
