1Ou chéve Ñanderuete ñe’ẽ ha he’i:
2Kuimba’e ra’y, oikova’ekue mokõi kuña, peteĩ sy membyre,
3ha mokõivéva oiko kuña reko vai ramo Egípto retãme; ikuñataĩ ára guive oñemongy’a hikuái. Upépe ojepoko ipyti’áre, upépe ojejopy ikuñataĩ káma rehe.
4Itykéra oñehenói Ohola, ikypy’y Oholiba; ha’ekuéra oikova’ekue che mba’e ramo, imemby hikuái heta kuimba’e ha kuña. Upéicha Samáriape oñembohéra Ohola ha Jerusalénpe oñembohéra Oholiba.
5Ha Ohola chemyakãratĩ oiko aja gueteri che poguýpe; ha ou ohayhu imborayhu jarakuérape, umi Asiriayguápe, umi oñemoag̃uíva guive hendápe:
6Tetã sãmbyhyharakuéra, mburuvichakuéra ha karia’ykuéra kavaju arigua, oñemondéva ao pytãme.
7Ohola oñeha’ãmba oiko hag̃ua hendivekuéra, Asiriaygua ra’ykuéra poravopyréva ndive, ha upéicha oñemongy’a avei opaite ijára gua’u reheve.
8Ndopoíri katu heko vaígui Egíptoygua ndive, imitã ára guive oñeno heta ndive, ha’ekuéra ojopy ikuñataĩ pyti’áre ha ha’ekuéra oiko hendivekuéra kuña reko vai ramo.
9Umi mba’evai rupi amoĩ ichupe imborayhu jarakuéra poguýpe, umi Asíriaygua ñemoñarenguéra poguýpe, iñakãraku haguére hesekuéra.
10Ha’ekuéra omboi rire ichupe, ogueraha mombyry imemby kuimba’e ha kuñakuérape, ha upéi ojuka ichupe kyse pukúpe; ha oñemoherakuã ko’ã jehavira kuñakuéra apytépe.
11Ha ã mba’e Oholiba ohechapa ha oiko vaive ikypy’y Oholágui.
12Iñakã rakúgui oiko umi Asiriaygua ñemoñarẽnguéra ndive, hetã sãmbyhyharakuéra, imburuvichakuéra ha imitãrusu iporãitéva ndive, umi oñemondéva ao porãme ha oiporúva ñorãirõ rembiporu iporãva, ha umi oikóva kavaju árigua ndive.
13Upéicha Che ahecha Oholiba oñemongy’apa avei; peteĩ tape vai rupínte mokõivéva oguata.
14Ha’e omboheta hetave ikuña reko vai; ohechávo umi kuimba’e ra’ãnga pe tápia rehe, umi Caldeaygua ra’ãnga ijeguapáva,
15ha iku’akuápe osãingo ikyse puku, iñakãnguéra rehegua reheve ha opaite ko’ãva ojogua umi soldádo Babilónia peguápe, ijypykuéra ouva’ekue voi Caldéa retãgui,
16ha oñepyrũ ohayhu ichupekuéra, ha omondo hendapekuéra ñe’ẽ rerahahára Caldeaygua retãme.
17Upévare umi kuimba’e Babiloniaygua og̃uahẽ imborayhu rupápe, ha upépe oñemongy’a hikuái, ha ha’e hendivekuéra, ojeguaru peve ichuguikuéra ipy’apýpe.
18Upéicha oiko kuña reko vai ramo ha ohechauka hete opívo, upévare che ánga ikuerái ichugui, ikuerái haguéicha itykéragui.
19Ha’e omboheta hetave ikuña reko vai ha imandu’a jevy ikuñataĩ ára rehe, umi ára oiko ramoguare kuña reko vai ramo Egípto retãme.
20Ha ou iñakãraku umi kuimba’e tie’ỹ rehe, búrro hakúvaicha, ha kavaju imba’etykývaicha.
21Péicha nde, Oholiba, rehechanga’u nde reko vai ne kuñataĩ árape guare, umi Egiptoygua ojavyky ramoguare ne kamakuéra.
22Upévagui nde, Oholiba, ehendu Ñanderuete ñe’ẽ: Cháke, Che amopu’ãta nderehe umi ne mborayhu jarakue, ko’ág̃a ne ánga ikuerái rire, opáguio rei amboúta oñemoĩ hag̃ua nderehe:
23Umi Babiloniaygua, Caldeaygua, Pecodgua, Soaygua ha Coaygua, ha hendivekuéra Asiriayguakuéra; mitãrusu iporãitéva, tetã sãmbyhyharakuéra, mburuvichakuéra, karia’y iporãitéva ha kuimba’e herakuãguasúva, kavaju ári oikopa hikuái.
24Heta tetã oúta ne rendápe icárro reheve. Ipyti’a mo’ãha ha iñakã mo’ãha reheve oikóta nde jerekuévo ha Che amoĩta nde rekove ipopekuéra nembojovake hag̃ua, ha ha’ekuéra nembojovakéta hembiapoukapy rupi.
25Che pochy aitýta ndeári, ha pochypópe ojahéita hikuái nderehe; netĩ’o ha nenambi’óta hikuái, ha umi hembymíva ho’áta kyse puku rupi. Ogueraháta hikuái ne memby, kuimba’e ha kuñakuéra, ha umi hembymíva oñehundíta tatápe.
26Ha’ekuéra nemboíta ha oipe’apáta nde jeguaka porãita rerekóva.
27Ha Che aipe’áta ndehegui ne kuña reko vai ha nde reko ky’a rejapóva Egípto retãme; anive hag̃ua rejesarekove hesekuéra ha nanemandu’avéi hag̃ua Egípto rehe.
28Péicha he’i pende Ruete: Cháke, Che roitýta umi rejeguaruháva poguýpe, umi ne ánga mongueraiharéva poguýpe;
29ojahéi hag̃ua nderehe, oipe’apa hag̃ua nde ry’ái repykue, ha nderejáta hikuái opivoite; ha ojekuaáta ne kuña reko ivaiha.
30Ko’ã mba’e oikóta nderehe reiko haguére kuña reko vai ramo umi tetãygua ndive ha reñemongy’a haguére avei ijára gua’u ra’ãnga reheve.
31Nde reiko nde ryke rape vai rehe, upévare Che amoĩta avei nde pópe iváso nde jehaviraha árape.
32Péicha he’i pende Ruete: Romboy’úta nde ryke váso tuicha ha ipypukúvape; ha tetãnguéra oñembohorypáta nderehe.
33Oka’úvaicha reikóta py’a ñembyasypópe, nde ryke Samária váso oguerúgui tapere ha jepy’apy vai.
34Remboy’u ha remboy’upava’erã rejokáta pe váso ha ijekakuépe reikarãita nde pyti’a, Che añe’ẽma, he’i pende Ruete.
35Uperire Ñanderuete he’ive: Nderesarái haguére chehegui, ha chereity haguére nde atukupe gotýo, upévagui Che aitýta avei nde ári ne kuña reko vaieta.
36Ha Ñanderuete he’i chéve: Kuimba’e ra’y, embojovake Ohola ha Oholibápe, ehechauka ichupekuéra hembiapo vaieta:
37Oiko hikuái kuña reko vai ramo, ipokuéra oñohẽ hapicha ruguy, omomba’eguasu ambue jára gua’u ra’ãnga; ha imembykuéra ogueruva’ekue yvy apére oity hikuái tatápe, oikuave’ẽ hag̃ua ijára gua’úpe g̃uarã (Molócpe g̃uarã).
38Ko’ã mba’e ko’ãva rupi oñemoĩ hikuái cherehe, upéi omongy’a hikuái avei che rogaguasu ha nomomba’éi che pytu’uha ára.
39Ha’ekuéra oikuave’ẽ imembykuéra ijára gua’úpe g̃uarã ha upe ára upévape oike gueteri che rogaguasúpe omongy’a hag̃ua; ha peikuaa porãke, ko’ã mba’e ojapo hikuái che rogaguasu ryepýpe:
40Ha’ekuéra omondo kuimba’ekuéra mombyrygua piári, omondo hendapekuéra ñe’ẽ rerahahára ou hag̃ua; ha ou vove hikuái nde rejahu, remohũ nde resakua ha reñembojeguakapa rehayhúgui ichupekuéra;
41reguapy guapyha iporãitéva ári, rembosako’iuka peteĩ mesa henondépe ha remoĩ hi’ári che mba’e ryakuã porã ha che acéite.
42Upépe oñehendu opurahéi joáva hendive; ha ko’ã kuimba’e ko’ãva apytépe ojegueru umi Saba pegua desiertoguasúgui, ha omoĩ joa hikuái jeguaka ipyapy rehe ha iñakã rehegua iporãitéva.
43Che katu ha’e chejupe: Oikovénepa gueteri ha’e kuña reko vai ramo hendivekuéra, ig̃uaig̃ui ramojepe.
44Ou hikuái hendápe ku kuña reko vai rendápe ramoguáicha; péicha ou hikuái Ohola ha Oholiba rendápe, ha’ekuéra ningo kuña reko vaietéva.
45Upévare umi kuimba’e heko potĩva ombojovakéta ichupekuéra ikuña reko vai rupi ha umi tuguy oñohẽva’ekuére ha ojáva gueteri ipokuéra rehe.
46Upévare péicha he’i pende Ruete: Che amboúta hi’arikuéra soldádo aty, ombopy’atarova ha omondapa hag̃ua ichupekuéra.
47Ha pe kuimba’e aty tojapi ichupekuéra itápe, ha toikutu ichupekuéra ikyse pukúpe, tojuka imemby kuimba’e ha kuñakuérape, ha hogakuéra tombokusuguepa tatápe.
48Ha Che aipe’áta yvy ape árigui peichagua teko ky’a, toikuaa opaite kuña, ha toñemondýi ani hag̃ua oho pende reko ky’a rapykuéri.
49Ojeitýta pendeári pende reko vai, oñemyengoviáta peẽme pene rembiapo vai rehe pemomba’eguasu haguére ambue járape, upéicha peikuaáta Che ha’eha pende Ruete, pe Jaraitéva.
Who We AreWhat We EelieveWhat We Do
2025 by iamachristian.org,Inc All rights reserved.
