Números 34 - Biblia en Guaraní - ?anderuete ?e’? Por? 2015

1Ha Ñanderuete oñe’ẽ Moiséspe, ha he’i:

2Eñe’ẽ Israel rogaguasukuérape ha ere ichupekuéra: Ág̃a peike vove Canaan retãme, pe yvy tuichakue péva opytáta peẽme g̃uarã pene mba’etee ramo.

3Yvy gotyove pene mba’erã Zin desiérto guive, Edom retã rembe’y rehe, Yguasu Juky pegua (Mar Saládo) apýra peve, opytáva kuarahyresẽ gotýo.

4Pene retã rembe’y ojere ohóvo yvýguio Acrabím ojeikeha peve, ha ohasáta Zin peve; upéi ojepysóta yvýguio Cades-barnéa peve; ha ohasáta Hasaradad peve, og̃uahẽ meve Asmónpe.

5Ha pene retã rembe’y ohóta Asmon guive Egípto ysyry peve ha opáta kuarahyreikeha gotýo,

6og̃uahẽ meve Yguasu Mediterráneo rembe’y peve, kóva pene retã rembe’y kuarahyreike gotyogua.

7Ha pene retã rembe’y yvate gotyogua katu Yguasu Mediterráneo guive ohóta Hor cérro peve.

8Ha Hor cérro guive ohóta Hamat ojeikeha peve, upéi ojepysóta Zedad peve,

9upeguive ohóta Zifron peve, opa hag̃ua Hazar-enánpe; kóva pene retã rembe’y yvateogua.

10Pene retã rembe’y kuarahyresẽ gotyogua katu ohóta Hazar-enan guive Sefam peve;

11ha Sefam guive oguejýta Ribla peve, opytáva Aíngui kuarahy resẽ gotýo; ha oguejy ohóvo og̃uahẽ meve Yguasu Quineret (Galiléa) rembe’y peve, kuarahyresẽ gotýo.

12Upéi pene retã rembe’y oguejýta Jordan ysyry rehe og̃uahẽ meve Yguasu Juky peguápe (Mar Saládope), kóva hína pene retã ha hembe’y ijerekuevogua.

13Ha Moises oñe’ẽ Israelguakuérape ha he’i: Kóva hína pe yvy oñemboja’ótava peẽme pene mba’eteéva ramo, po’a jeporavo rupi, Ñanderuete he’iuka haguéicha oñeme’ẽ hag̃ua umi 9 tríbu ha pe tríbu mbyterépe.

14Ruben tríbu rogaguasukuéra, Gad tríbu rogaguasukuéra ha Manases tríbu mbytere rogaguasukuérape oñeme’ẽma ijyvyrã.

15Mokõi tríbu ha pe tríbu mbytere oñeme’ẽma ijyvy pe Jordan asu ykére, kuarahy resẽ gotýo, Jerico rovái.

16Ha Ñanderuete oñe’ẽ Moiséspe, ha he’i:

17Pa’i Eleazar ha Josue, Nun ra’y, omboja’óta peẽme pene yvyrã.

18Peiporavo avei peteĩteĩ tríbugui peteĩ mburuvicha omboja’o hag̃ua idepartaménto yvy, ilóte jarakuerarã.

19Ko’ãva umi kuimba’e réra: Juda tríbugui ojeporavo Caleb, Jefune ra’y, imburuvicha ramo.

20Simeon tríbugui ojeporavo Semuel, Amiud ra’y, imburuvicha ramo.

21Benjamin tríbugui ojeporavo Elidad, Quislon ra’y, imburuvicha ramo.

22Dan tríbugui ojeporavo mburuvicha Buqui, Jogli ra’y.

23Jose ra’ykuéragui: Manases tríbugui ojeporavo pe mburuvicha Haniel, Efod ra’y.

24Efrain tríbugui ojeporavo pe mburuvicha Kemuel, Siftan ra’y.

25Zabulon tríbugui ojeporavo mburuvicha Elizafan, Parnac ra’y.

26Isacar tríbugui ojeporavo pe mburuvicha Paltiel, Azan ra’y.

27Aser tríbugui ojeporavo pe mburuvicha Ahiud, Selomi ra’y.

28Ha Neftali tríbugui ojeporavo pe mburuvicha Pedael, Amiud ra’y.

29Ko’ãvape Ñanderuete oiporavo omboja’o hag̃ua Canaan retã Israel tribukuérape g̃uarã.