2 Réyes 20 - Biblia en Guaraní - ?anderuete ?e’? Por? 2015

Ezequías mba’asy

1Umi ára umívape Ezequías ho’a hasyete omano hag̃uáicha. Ha Isaías, Amos ra’y, ou hendápe ha he’i ichupe: Embosako’ipa nde rogapy, remanótagui.

2Upémaramo Ezequías omboyke hova tápia gotýo ha oñembo’e Ñanderuetépe, he’ívo:

3Ajerure ndéve, ore Ruete, nemandu’ami aiko hague hekoitépe ne renondépe, py’apy potĩ reheve, ha ajapopa hague Nde reipotáva guive. Ha Ezequías ojahe’o puku.

4Ha Isaías ohupity mboyve pe pláza mbytépe, Ñanderuete ñe’ẽ ou jevy ichupe he’ívo:

5Ejevy, ha ere Ezequíaspe, che retã ruvichápe: Péicha he’i pende Ruete, David, nde ru Jára: Che ahendúkuri ne ñembo’e, ha ahecha nde resay, péina ápe Che romongueráta; mbohapy arahápe rejupíta che rogaguasúpe.

6Ha ambojoapýta nde rekove ára 15 añove, rosalváta ndéve ha avei ko táva kóvape Asíria retã ruvicha pógui; Che amo’ãta ko távape che réra rehehápe, ha che rembiguái David rehehápe.

7Ha Isaías he’i: Pejapyhy higo’a jejosopyre. Ha ojapyhy rire, omoĩ hikuái ijai rehe okuera hag̃ua.

8Ha Ezequías he’i Isaíaspe: Mba’eichagua techaukapy piko aguerekóta aikuaa hag̃ua Ñanderuete chemonguerataha, ha ajupitaha Ñanderuete rógape mbohapy arahápe.

9Ha Isaías ombohovái ichupe: Ko techaukapy kóva reguerekóta Ñanderuetégui, Ha’e ojapóta ko’ã mba’e he’iva’ekue: Pe kuarahy’ã ohovéta 10 grádo (igrádo=una hóra rupi) pe escaléra (kuarahy reloj) rupi, térãpa oguevíta 10 grádo pe escaléra rupi.

10Ha Ezequías he’i: Ndahasýi pe kuarahy’ã ohove hag̃ua 10 grádo pe escaléra rupi; ág̃a katu ndaupéichai oguevi jevy hag̃ua 10 grádo pe escaléra rupi.

11Upémaramo pe proféta Isaías ojerure asy Ñanderuetépe; ha Ha’e omboguevi pe kuarahy’ã Acaz relójpe 10 grádo pe escaléra rupi hapykuere gotýo.

Ezequías omog̃uahẽ hógape Babilónia remimondokuérape

12Umi ára umívape Merodac-baldan, Baldan ra’y, Babilónia retã ruvicha, omondo ñe’ẽ rerahahára kuatiañe’ẽ jopoikuéra reheve Ezequías rendápe, ohendúgui Ezequías hasy hague.

13Ha Ezequías ohendu ichupekuéra, ha ohechauka ichupekuéra pe óga oñongatuhápe opaite mba’erepy: pláta, óro, mba’e ryakuã asy ha ñorãirõ rembiporu, ha opaite mba’e oĩva imba’erepyeta apytépe; nahembýi mba’eve Ezequías ohechauka’ỹva’ekue ichupekuéra, pe hóga pegua ha opaite mba’e ipoguy pegua oĩva guive.

14Upéramo pe proféta Isaías ou tetã ruvicha Ezequías rendápe, ha he’i ichupe: Mba’e piko he’íra’e umi kuimba’e, ha mamógui ou hikuái ne rendápe. Ha Ezequías ombohovái ichupe: Tetã mombyrýgui ou hikuái, Babilóniagui.

15Ha ha’e he’i jevy ichupe: Mba’épa ohechára’e nde rógape. Ha Ezequías he’i ichupe: Ohecha opaite mba’e oĩva guive che rógape; mba’eve nahembýi che mba’eita repy apytégui ahechauka’ỹva’ekue ichupekuéra.

16Upéramo Isaías he’i Ezequíaspe, ehendu Ñanderuete ñe’ẽ:

17Péina ápe outahína pe ára opaite mba’e oĩva guive nde rógape, ha opaite mba’e nde rukuéra oñongatumava’ekue ko ára kóva peve, ojererahapáta Babilóniape, opyta’ỹre mba’eve, he’iuka ndéve Ñanderuete.

18Ha nde ra’ykuéra remoheñóitava apytégui ojeapresáta oiko hag̃ua Babilónia retã ruvicha rogaguasu rembiguaikuéra ramo ha ojecapáta hikuái.

19Upéramo Ezequías he’i Isaíaspe: Ñanderuete ñe’ẽ iporã. Ha upéi he’i: Avy’a oĩtaha py’aguapy ha kyhyje’ỹ che aikove aja pukukue.

Ezequías ómano

20Ambue Ezequías rembiapokue ojapova’ekue, mba’éichapa ombyaty pe y ha mba’éichapa omog̃uahẽ y Jerusalén távape ojehaipa umi Juda retã ruvichakuéra rembiapoukapy kuatiañe’ẽme.

21Ha Ezequías omano rire, ita’ýra Manases oisãmbyhy hendaguépe.