Galaciayguakuérape 5 - Biblia en Guaraní - ?anderuete ?e’? Por? 2015

Pepyta hatãkena pe teko sãsóme (libertádpe

)

1Hesu Crísto ñanerenói pe teko sãsóme g̃uarã, upévare pepyta hatãkena pe teko sãsóme ha anítei peñemoĩ jevy tembiguái cangálla poguýpe.

2Peikuaa porãke, che, Páblo ha’e peẽme peẽ peñekytĩ’o ramo (peñecircuncida ramo), Hesu Crísto omano rei peẽme g̃uarã.

3Che aikuaauka jevy opavavépe, upe oñekytĩ’oukávape, ojapova’erã hekópe opaite Moises rembiapoukapykuéra.

4Oimeraẽ ojesalvaséva ojapógui Moises rembiapoukapykuéra, upéva ojeíma Hesu Crísto poriahuverekógui (omboykémagui Hesu Crísto jopói).

5Ñande ñaha’ãrõ Pytu Porãmbáva pu’aka poguýpe, Hesu Crísto ñandesalvataha, jajeroviágui hese.

6Hesu Crístope g̃uarã upe oñekytĩ’oukáva térã upe oñekytĩ’ouka’ỹva ndovaléi mba’evete, ñande jerovia rupínte uvei jahechauka ñane mborayhu ñane rembiapo porã rupi.

7Peguatava’ekue tape porãme, máva piko pendejokóra’e, anive hag̃ua peẽ peneñe’ẽrendu pe ñe’ẽ añeteguávape.

8Koichagua tekombo’e ndoúi Ñanderuetégui, penerenoimava’ekue.

9Penemandu’a porãke: Michĩmi levadúra ombovupa pe jehe’a ojepatukáva (mása) (1 Corintoyguakuérape 5,6).

10Che ningo ajerovia penderehe, Hesu Crísto rupi peẽ peñemomombyrytaha upe penembopy’amokõivagui, upéva katuete oñembojovakéta, taha’e ha’éva.

11Che hermanokuéra, che añetehápe amoherakuã ramo opaite Hesu Crísto reheguáva oñekytĩ’oukava’erãha gueteri, mba’érehepa upéicharamo Israelguakuéra chemuña gueteri, (oñemoĩ gueteri cherehe).

12Mba’eichatamora’e ojecapauka nandi voi ojupe umi penemyangekõivape.

13Che hermanokuéra, Ñanderuete ningo penerenói peiko hag̃ua teko sãsóme (libertádpe). Ani peiporu, pe teko sãso peiko jevy hag̃ua pende yvyarigua rete rembipota vai poguýpe. Peñopytyvõ uvei Hesu Crísto mborayhu reheve.

14Opaite Moises rembiapoukapykuéra oĩmbaite ko ñe’ẽ kóvape: Ehayhu nde rapichápe nde rejehayhu háicha (Levítico 19,18).

15Peẽ pejosu’úrõ ha peñomokõ ramo, pema’ẽke ani hag̃ua peñohundipa avei.

Peikókena pe Pytu Porãmbáva poguýpe

16Che katu ha’ese peẽme: Peikókena Pytu Porãmbáva poguýpe, péicharamo ndapejapomo’ãvéi pende yvyarigua rete rembipota vai (Galaciayguakuérape 5,25).

17Pe yvyarigua rete rembipota oñemoĩ pe Pytu Porãmbáva rehe, ha pe Pytu Porãmbáva oñemoĩ pe yvyarigua rete rembipota vai rehe, mokõivéva oñorãirõ oñondive ani hag̃ua pejapo umi mba’e pejaposéva.

18Pe Pytu Porãmbáva penesãmbyhy ramo, napeimevéima Moises rembiapoukapykuéra poguýpe.

19Yvyarigua rete rembiapo ningo ojehechauka voi, ko’ãva ha’e: Joguereko menda’ỹre, pensamiénto vai, tekomeg̃ua,

20umi omomba’eguasúva ambue járape, paje (encánto), umi oñemoĩ reíva hapicha rehe, ñorãirõ, takate’ỹ, pochy, ha’éntese, umi omyasãiva ñe’ẽ vai hapicha rehe, umi omboja’óva kuimba’ekuérape térã kuñakuérape aty atýpe oñemoĩ hag̃ua ojuehe,

21 envídia (py’a rasy), umi oka’úva, umi okaru hetaitereíva ha ambue koichagua mba’e. Che ha’e haguéicha peẽme, ha’ese jevy ko’ág̃a: Opavave ojapovahína ko mba’e kóva ndoikemo’ãi Ñanderuete rekohápe (yvágape).

22Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia,

23ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.

24Hesu Crísto reheguáva katu omosãingo kurusúre hete, hembipota vai ha ipy’a ojerure asýva.

25Ñanderuete ñanemoingove ramo Pytu Porãmbáva rupi, ñande jahejava’erã avei pe Pytu Porãmbáva tañanesãmbyhy.

26Ani ñañembotuichase, ani ñañombopochy rei, anive jaipota ñande rapicha mba’éva.