Salmokuéra 50 - Biblia en Guaraní - ?anderuete ?e’? Por? 2015

Ñanderuete ombojovake kuimba’e ha kuñakuérape - Asaf purahéi

1Ñanderuete ningo pe Jára ijyvatevéva, Jahve, oñe’ẽmava’ekue ha ohenói yvyariguakuérape, kuarahyresẽ guive kuarahyreike peve.

2Jerusalen, pe tavaguasu iporãitevéva guive, Ñanderuete ojajaipahína,

3oúta Ñanderuete ha nokirirĩmo’ãvéima, henonderãme hata ohundipáta, ha peteĩ yvytu ratã ipu’akapáva oúta hendive.

4Ohenoimbáta umi yvagayguápe, ha avei yvyariguakuérape, ohecha hag̃ua hikuái mba’éichapa Ñanderuete ombojovakéta hetãme.

5Pembyatypáke chéve umi heko potĩvape, umi oikeva’ekuépe chendive peteĩ jekupytýpe oikuave’ẽ jave.

6Ha umi yvagaygua omombe’u joáta Ñanderuete justícia, Ha’e voi ombojovakepáta ichupekuéra.

7Ehendúkena, che retãtee, ha añe’ẽta Che; ejapysaka Israel, ha Che pohechaukáta, pende reko ivaiha Che ningo pende Ruete, pende Jaratee.

8Che ndapoja’ói pene kuave’ẽmby rehe térã pene kuave’ẽmby ojehapypáva rehe, umía oĩ voi che resa renondépe.

9Che ndajeruréi pende tóro ra’yrusu rehe, ni pende kavara mácho rehe pene rymbakuéra atýgui.

10Che mba’e voi opaite mymba ñu rupigua, ha umi 1.000 jo’a jo’a mymba cérro rupi oikóva guive.

11Aikuaapa peteĩteĩ guyra cérro pegua, ha opaite umi oikóva guive umi ñu rupi che mba’e meme voínte.

12Cheñembyahýi rire, ndéve namombe’uiva’erãmo’ã, chemba’égui voi ningo ko yvy ha opaite mba’e oĩva guive ipype.

13Chépa ha’úne pe tóro ro’okue, térãpa amboy’úne pe kavara mácho ruguykue.

14Eikuave’ẽ nde Ruetépe nde agradecimiénto, ha ejapo añetehápe nde promésa reme’ẽva’ekue pe Ipu’akaitévape.

15Ha cherenói nde jepy’apyha árape, Che roipytyvõta ha nde chemomba’eguasúta.

16Ha iñañávape katu Ñanderuete he’i: Mba’éicharupi piko nde reiporu rei che rembiapoukapy, ha mba’eicharupípa nde jurúpe oĩ rei che ñe’ẽme’ẽ.

17Nde ningo ndereikuaaséi che rekombo’e, ha remombo nde rapykue gotýo che ñe’ẽnguéra.

18Rehecha ramo pe mondahápe nde reikóta hendive ha remoirũta umi oikóva kuña rapykuéripe.

19Nde rejoko rãngue nde juru ani hag̃ua reñe’ẽ vai, tuichave reñe’ẽ ha hi’ári reñeha’ãmba rembotavy hag̃ua nde rapichápe.

20Nde reguapy guive reñe’ẽvai ne pehẽngue rehe ha nde sy membykuimba’ére reñe’ẽvai.

21Opaite ko’ã mba’e rejapova’ekue, ha upeichavérõ jepe Che akirirĩ, reimo’ãra’e Che ndeichagua voi avei, Che katu añeko’õi nderehe, ha ko’ã mba’e amoĩmbáta nde resa renondépe nde rejepy’amongeta porã hag̃ua umi mba’ére.

22Pehechakuaa ko’ã mba’e, peẽ penderesaráiva pende Ruetégui, ani hag̃ua Che pombyai, ha napenepohãvéima.

23Upe oikuave’ẽva chéve agradecimiénto chembotuicha, ha upe omyatyrõ porãva hapekuéra, Che ahechaukáta ichupe yvága Jára salvacion.