Isaías 49 - Biblia en Guaraní - ?anderuete ?e’? Por? 2015

Israel, Ñanderuete rembiguái

1Pecherendu, peẽ tetã y rembe’y peguáva ha peẽ tetã mombyrygua pejapysaka porãke. Ñanderuete cherenói asẽ mboyve che sy ryégui, ha che réra rehe Ha’e imandu’ava’ekue.

2Che jurúgui ojapo kyse puku hakuávaicha, ipo rupi chemo’ã porã; ha che’apo ihu’y hakuávaicha, ha chemoinge ihu’y ryrúpe;

3ha he’i chéve: Nde, Israel, che rembiguái, ndérupi añemomba’eguasúta.

4Ha che katu ha’e che py’apýpe: Heta añeha’ã, amba’apo rei, reiete añemokane’õ; che rekove katu oĩma Ñanderuete pópe, ha che rembiapo repy oĩ che Ruete ndive.

5Ko’ág̃a Ñanderuete oñe’ẽ chéve, Ha’e voi che’apova’ekue che sy ryépe aiko hag̃ua hembiguairã ramo; ambojevy hag̃ua Jacóbope hendápe ha ambyaty jevy hag̃ua Israel retã ichupe g̃uarã, ha’a porãgui Ñanderuete resa renondépe Ha’e chemombarete porã ipu’aka rupi,

6ha he’ive chéve: Che ndoroiporavói che rembiguairãnte, Che rohenói remopu’ã hag̃ua uvei Jacóbo tribukuéra, ha remyatyrõ hag̃ua Israel rembyre; regueraha hag̃ua avei che resape ha salvacion tetãnguéra yvy apýra paha peve.

7Péicha Ñanderuete he’i, Israel salvador, pe Heko porãva, tetãnguéra ndohayhúi ha omboykemava’ekue ichupe, Ha’e oikóta mburuvichakuéra ojopy asýva poguýpe, upeichavéramo jepe: Tetã ruvichakuéra ohecha joava’erã ichupe ha opu’ã joava’erã henonderãme ha mburuvichakuéra ojeityva’erã henondépe, Ñanderuete rehehápe; Israel Jára katuete ojapopáta he’imava’ekue guive, Ha’e voi noñemoambuéi ha Ha’e ndeporavova’ekue avei ichupe g̃uarã.

Ñanderuete he’i omyatyrõ jevytaha Siónpe

8Pende Ruete he’ive: Che rohendúta pe jeporiahuvereko árape, ha Che rosalváta pe jehasa asyha árape; Che añangarekóta nderehe, ha Che romoĩma amoañete hag̃ua ndérupi che ñe’ẽ ame’ẽmava’ekue ko tetã kóvape. Amopu’ãta ko tetãme ha amboja’o jevýta ichupekuéra g̃uarã ijyvytee, oñemonandiva’ekue.

9Nde ere hag̃ua umi ojepokuapývape: Pesẽ; ha umi iñypytũháme oikóvape eréta: Ojehechaukáta peẽme pende resaperã. Opaite tape ykére ojohúta hembi’urã ha umi yvy perõnguégui oikóta ikokuerã.

10Naiñembyahyimo’ãi ha ndaijy’uheimo’ãi, ha arahakúpe noñandumo’ãi pe kuarahy; pe oiporiahuverekóva ichupekuéra oisãmbyhýta avei ichupekuéra ogueraha hag̃ua yvu porãháme.

11Che cerrorusukuéra ambohapéta, ha che rapekuéra amboyvatéta.

12Pema’ẽ porãke, oĩ ningo umi og̃uahẽva táva mombyrýgui, oĩ umi oútava nórtegui ha kuarahyreikégui ha ambueve katu Sinim yvýgui (¿Chína retãgui?).

13Peĩ yvagakuéra pepurahéike, ha nde yvy evy’aitéke, peẽ cerrokuéra pesapukái puraheipópe, Ñanderuete omoangapyhýgui hetãme, ha oiporiahuvereko jevy umi ohasa asývape.

14Upeichavéramo Sion he’i: Ñanderuete opoi chehegui, ha yvága Jára hesarái chehegui.

15Hesaráinepa peteĩ kuña imemby kambúvagui, ndoiporiahuverekovéi hag̃ua imemby hyégui osẽva’ekuépe. Ha pe sy hesarái ramojepe, Che araka’eve ndacheresaraimo’ãi ndehegui.

16Peikuaa porãke, che po pytépe ahai ne ra’ãnga; ha nde korapyjere yvate tapiaite oĩ che resa renondépe.

17Ne membykuéra pya’e ou jevýta; ha umi nembyai ha nembotaperéva osẽmbáta nde apytégui.

18Ehupi nde resa ha ema’ẽ nde jerekue rehe; ne membykuéra oñembyatypahína, ha ou joa oiko hag̃ua ndepype. Añetehápe, Che rekovére, he’i pende Ruete, reñemondéta ao jeguaka porãvape; ha rejeku’akuáta ku kuñataĩ omendátavaicha.

19Ne retã yvy oñembyaipa, ichavi ha itaperepa, ha umi nde ra’y oñembyatýtava ojojopyva’erã, ndahetáigui hendag̃ua, ha umi ombyaimava’ekue ne retã mombyrýma oho.

20Ha ne membykuéra tyre’ỹmi he’iva’erã nde apysaitépe: Ko yvy kóva imichĩma oréve g̃uarã; ejei ko’águi, ikatu hag̃uáicha ore roiko.

21Ha nde Sion eréta nde py’apýpe: Mávapa imemby chéve g̃uarã ko’ãva. Che nachemembyvéi ha aiko che añónte, ha aiko ku oiko reívaicha, hetãgui oñemosẽmava’ekue; ha máva piko omongakuaára’e ko’ãva chéve g̃uarã. Mamo piko oikóra’e umía.

22Péicha he’i pende Ruete, pe Járaitéva: Pema’ẽ porãke, Che aipysóta che po ko’ã tetã rehe, ha umívape g̃uarã amopu’ãta che poyviveve; ha ha’ekuéra oguerúta ne memby kuimba’ekuérape ijyva ári, ha ne memby kuñakuérape ijati’ykuéra ári.

23Tetã ruvichakuéra oñangarekóta ne membykuéra rehe, ha tetã ruvicha rembirekokuéra ningo herekuarã; tĩndyhápe nemomba’eguasúta ndéve, ha oheréita pe yvy timbo oĩva nde py rehe; ha reikuaáta Che ha’eha nde Ruete, ha umi cherehe ojeroviáva noñemotĩriva’erãha araka’eve.

24Ikatu piko ojepe’a ipy’aguasuetévagui imba’erepyeta, ikatu piko jaipe’a pe mburuvicha oporojopývagui umi tetãygua oguerekóva ipoguýpe.

25Pende Ruete katu péicha he’i: Añetehápe pe ipy’aguasuetévagui ojepe’apava’erã imba’erepyeta, ha pe mburuvicha oporojopy asývagui ojepe’apava’erã umi tetãygua oguerekóva ipoguýpe; nde ra’ykuéra ojegueruva’erã ñorãirõgui, Che voi amosãsóta ha ambopoguýta umi oñemoĩmava’ekue nderehe.

26Ha umi nemondava’ekuépe Che voi ha’ukáta ho’otee ha huguýpe oka’upáta, ku vínope oka’u ramoguáicha; ha mayma yvyarigua oikuaáta Che, nde Rueteha, neguenohẽva nde jejopy vaietégui ha operdonáma hetãyguakuérape, pe Jacóbo pegua Ipu’akapáva ojapóta katuete umi mba’e he’imava’ekue guive.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help